జపాన్ ప్రధాని సనే తకైచి ఇటీవల తన వ్యక్తిగత జీవనశైలి మరియు పనిచేసే అలవాట్ల గురించి ఆసక్తికరమైన విషయాలను వెల్లడించారు. ప్రపంచంలో అత్యంత కట్టుబాటు, క్రమశిక్షణ కలిగిన నాయకుల్లో ఒకరిగా గుర్తింపు పొందిన తకైచి, రోజూ రాత్రి ఎంతసేపు నిద్రపోతారన్న ప్రశ్నకు ఆశ్చర్యానికి గురిచేసే సమాధానమిచ్చారు. తాను సాధారణంగా కేవలం 2 గంటలే నిద్రపోతానని, కొన్ని సందర్భాల్లో అత్యధికంగా 4 గంటలు మాత్రమే నిద్రించే అవకాశం వస్తుందని తెలిపారు. దేశ అభివృద్ధి కోసం, వివిధ విధానాల రూపకల్పన కోసం, అంతర్జాతీయ సమావేశాలపై సమీక్ష కోసం ఎక్కువ సమయం కేటాయించాల్సి వస్తుందని ఆమె వివరించారు. అయితే, ఈ అలవాటు తన ఆరోగ్యంపై, ముఖ్యంగా చర్మంపై ప్రతికూల ప్రభావం చూపుతుందని కూడా నిజాయితీగా అంగీకరించారు. తాను తక్కువ నిద్రపోవడం వల్ల స్కిన్ డ్యామేజ్ అవుతుందని, వైద్యులు చెప్పినా పని ఒత్తిడి కారణంగా మార్గం లేకపోతున్నదని ఆమె వ్యాఖ్యానించారు.
ఇటీవల జరిగిన పార్లమెంట్ సమావేశాల నేపథ్యంలో, అధికారులతో అర్ధరాత్రి 3 గంటల వరకు మీటింగ్‌లు నిర్వహించినట్లు వెలుగులోకి రావడంతో ఆమెపై విమర్శలు వెల్లువెత్తాయి. ఉద్యోగులపై భారీ ఒత్తిడి పెడుతున్నారన్న ఆరోపణలు, వర్క్–లైఫ్ బ్యాలెన్స్‌ను మరింత దెబ్బతీస్తున్నారన్న అభిప్రాయాలు జపాన్ ప్రజల్లో వ్యక్తమయ్యాయి. జపాన్‌లో ఉద్యోగులు రోజుకు ఎక్కువ గంటలు పనిచేయడం, విశ్రాంతి లేకుండా పని ఒత్తిడిలో జీవించడం అనేది చాలా సంవత్సరాలుగా చర్చనీయాంశంగా ఉంది. 'కరోషి' (అతి పని చేసి మరణం) అనే పదం జపాన్‌లోనే పుట్టినంత తీవ్రత అక్కడి పనిచేసే సంస్కృతిలో ఉంది. ఈ పరిస్థితుల్లో ప్రధానమంత్రి సనే తకైచి స్వయంగా తాము కూడా రోజు 2–4 గంటలే నిద్రపోతామని చెప్పడం ప్రజల్లో మిశ్రమ స్పందనకు దారితీసింది.
ఒకవైపు, దేశానికి అంకితభావంతో పనిచేస్తున్న నాయకురాలిగా ఆమెను కొందరు అభినందిస్తుండగా, మరోవైపు, ఆమె చూపుతున్న ఈ అలవాటు ప్రభుత్వంలో పని ఒత్తిడి సంస్కృతిని మరింత ప్రోత్సహిస్తోందని విమర్శలు వ్యక్తమవుతున్నాయి. నాయకులు సరైన విశ్రాంతి తీసుకుంటేనే ఉన్నత నిర్ణయాలు తీసుకునే మానసిక స్థితి కలుగుతుందని, ఆరోగ్యకరమైన పనివాతావరణాన్ని ప్రభుత్వమే ముందు చూపించవలసిందని కొంత మంది నిపుణులు అభిప్రాయపడుతున్నారు. ఉద్యోగుల సంక్షేమం, మానసిక ఆరోగ్యం, సమతుల్య జీవనశైలి ఇవన్నీ దేశ అభివృద్ధికి కూడా కీలకమని శోధనల్లో నిరూపించబడింది.
జపాన్ ఇప్పటికే వర్క్–లైఫ్ బ్యాలెన్స్ మెరుగుపరిచేందుకు పలు సంస్కరణలను చేపడుతోంది. ఈ నేపథ్యంలోనే ప్రధానమంత్రి చేసిన తాజా వ్యాఖ్యలు మరోసారి జపాన్‌లోని పని సంస్కృతి పై చర్చను మరింత తీవ్రం చేశాయి. తకైచి తన ఆరోగ్యంపై ప్రభావం పడుతున్నప్పటికీ, దేశాభివృద్ధి కోసం సమయాన్ని వెచ్చించడం ఆపనని చెబుతుండడం నాయకత్వం పట్ల ఆమె అంకితభావాన్ని చూపుతుంది. అయితే, ఇది ఉద్యోగుల జీవన ప్రమాణాలపై ప్రభావం చూపకూడదని ప్రజలు కోరుకుంటున్నారు.
