వెనిజులా అధ్యక్షుడు నికోలస్ (Venezuelan President Nicolas) మదురో అరెస్ట్ (maduros arrest) వెనుక అసలు కారణం ఏమిటన్న అంశం ఇప్పుడు అంతర్జాతీయ రాజకీయాల్లో హాట్ టాపిక్గా మారింది. బయటకు కనిపిస్తున్నది ప్రజాస్వామ్యం, మానవ హక్కులు, చట్టపాలన అనే మాటలైతే… లోపల మాత్రం ప్రపంచంలోనే అతిపెద్ద చమురు నిక్షేపాలపై నియంత్రణ సాధించాలన్న భౌగోళిక ఆర్థిక వ్యూహమే దాగి ఉందా అనే అనుమానాలు బలంగా వినిపిస్తున్నాయి.
వెనిజులాలో సుమారు 303 బిలియన్ బ్యారెళ్ల ఆయిల్ రిజర్వులు ఉన్నాయని అంచనా. అంతర్జాతీయ మార్కెట్ ధరల ప్రకారం వీటి విలువ దాదాపు 17.3 ట్రిలియన్ డాలర్లు. ఈ మొత్తాన్ని సగం ధరకు విక్రయించినా దాదాపు 8.7 ట్రిలియన్ డాలర్లు వస్తాయి. ఇది జపాన్ మొత్తం GDP కంటే దాదాపు నాలుగు రెట్లు ఎక్కువగా ఉండటం గమనార్హం. అందుకే “మదురో అరెస్ట్ వెనుక చమురు సంపదే అసలు లక్ష్యం” అనే వాదనకు బలం చేకూరుతోంది.
మదురో పాలనలో వెనిజులా తీవ్ర ఆర్థిక సంక్షోభాన్ని ఎదుర్కొంది. అదుపు తప్పిన ద్రవ్యోల్బణం, కరెన్సీ విలువ పతనం, ఆహార–ఇంధన కొరత, నిరుద్యోగం వంటి సమస్యలు ప్రజల జీవితాలను నరకప్రాయంగా మార్చాయి. ఎన్నికల్లో ప్రత్యర్థులు లేకుండా నిబంధనలు మార్చడం, విపక్ష నేతలను జైలుకు పంపడం, మీడియాపై ఆంక్షలు విధించడం వంటి చర్యలతో మదురోపై నియంత అన్న ముద్ర పడింది. ఈ నేపథ్యంలో ఆయన అరెస్ట్ వార్త వెలువడగానే వెనిజులాలోని పలుచోట్ల ప్రజలు వీధుల్లోకి వచ్చి సంబరాలు చేసుకున్నారని కథనాలు వచ్చాయి. “ట్రంప్ థాంక్స్” అంటూ ర్యాలీలు నిర్వహించడం ద్వారా తమ ఆగ్రహాన్ని, అలాగే ఊరటను వ్యక్తం చేశారు.
అయితే ఆనందంతో పాటు భయం, ఆందోళన కూడా వెనిజులా ప్రజల్లో కనిపిస్తోంది. మదురో తర్వాత దేశాన్ని ఎవరు పాలిస్తారు? కొత్త ప్రభుత్వం నిజంగా ప్రజాస్వామ్యబద్ధంగా వ్యవహరిస్తుందా? లేక అమెరికా ప్రభావంలో మరో బొమ్మ ప్రభుత్వమే వస్తుందా? అన్న ప్రశ్నలు సామాన్యులను వెంటాడుతున్నాయి. ముఖ్యంగా చమురు రంగంలో అమెరికా కంపెనీల ఆధిపత్యం పెరిగితే దేశ సంపద మళ్లీ విదేశాల చేతుల్లోకి వెళ్లిపోతుందా అన్న అనుమానాలు వ్యక్తమవుతున్నాయి.
ఇదిలా ఉండగా, వెనిజులా ప్రతిపక్ష నేత, నోబెల్ గ్రహీత మరియా కొరినా మచాడో ఈ పరిణామాలను “స్వేచ్ఛా గడియల ఆరంభం”గా అభివర్ణించారు. మదురో తన నేరాలకు శిక్ష అనుభవిస్తున్నారని, చర్చల ద్వారా సమస్యలు పరిష్కరించేందుకు ఆయన నిరాకరించడంతో అమెరికా చట్టాన్ని అమలు చేసిందని ఆమె పేర్కొన్నారు. ఇకపై దేశంలో ప్రజాస్వామ్యం రాజ్యమేలుతుందని, రాజకీయ ఖైదీలను విడుదల చేస్తామని ఆమె X వేదికగా హామీ ఇచ్చారు.
మొత్తానికి మదురో అరెస్ట్ వెనిజులాకు నిజంగా విముక్తిని తెస్తుందా లేక చమురు సంపదపై కొత్త ఆధిపత్యానికి దారి తీస్తుందా? అన్నది కాలమే నిర్ణయించాలి. ప్రస్తుతం మాత్రం వెనిజులా ఒక చారిత్రక మలుపు వద్ద నిలబడి ఉంది. ప్రజల ఆశలు, భయాలు, అంతర్జాతీయ శక్తుల ప్రయోజనాలు కలిసిన ఈ పరిణామం లాటిన్ అమెరికా రాజకీయాల దిశనే మార్చే అవకాశముందని విశ్లేషకులు అభిప్రాయపడుతున్నారు.
