వెనిజులా అధ్యక్షుడు నికోలస్ మదురోను అమెరికా సైన్యం అదుపులోకి తీసుకున్న ఘటన ప్రపంచ రాజకీయ వేదికపై తీవ్ర దుమారం రేపింది. ఈ పరిణామంపై ఐక్యరాజ్యసమితి (యూఎన్) తీవ్ర ఆందోళన వ్యక్తం చేసింది. అమెరికా చేపట్టిన ఈ సైనిక చర్య అంతర్జాతీయ చట్టాలకు విరుద్ధమై, ప్రమాదకరమైన సంప్రదాయానికి దారి తీసే అవకాశం ఉందని యూఎన్ సెక్రటరీ జనరల్ ఆంటోనియో గుటెర్రస్ హెచ్చరించారు. ఒక దేశాధ్యక్షుడిని మరో దేశం సైనిక చర్య ద్వారా అరెస్ట్ చేయడం ప్రపంచ వ్యవస్థను అస్థిరత వైపు నెట్టే ప్రమాదం ఉందని ఆయన అభిప్రాయపడ్డారు.
శనివారం తెల్లవారుజామున అమెరికాకు చెందిన డెల్టా ఫోర్స్ ప్రత్యేక దళాలు వెనిజులాలోని ఒక కీలక సైనిక స్థావరంపై ఆకస్మిక దాడి నిర్వహించాయి. ఈ ఆపరేషన్లో అధ్యక్షుడు మదురోతో పాటు ఆయన భార్య సిలియా ఫ్లోరెస్ను కూడా అదుపులోకి తీసుకున్నట్లు అమెరికా అధికారులు ప్రకటించారు. వారిని వెంటనే ఒక యుద్ధనౌకలో తరలించి, అనంతరం న్యూయార్క్కు తీసుకెళ్తున్నట్లు వెల్లడించారు. మదురోపై న్యూయార్క్లోని ఫెడరల్ కోర్టులో నార్కో-టెర్రరిజం, డ్రగ్స్ అక్రమ రవాణా ఆరోపణలపై కేసులు నమోదు చేసినట్లు సమాచారం.
ఈ ఘటనపై యూఎన్ సెక్రటరీ జనరల్ ప్రతినిధి స్టీఫెన్ డుజారిక్ అధికారిక ప్రకటన విడుదల చేశారు. “అంతర్జాతీయ చట్టాలు, యూఎన్ చార్టర్ను ప్రతి దేశం గౌరవించాల్సిందే. కానీ ఈ సందర్భంలో ఆ సూత్రాలు ఉల్లంఘించబడినట్లు స్పష్టంగా కనిపిస్తోంది. ఈ చర్య లాటిన్ అమెరికా ప్రాంతంలో రాజకీయ ఉద్రిక్తతలను మరింత పెంచే ప్రమాదం ఉంది” అని పేర్కొన్నారు. బలప్రయోగానికి బదులు చర్చలు, రాజనీతిక మార్గాల ద్వారానే సమస్యలను పరిష్కరించాలని యూఎన్ పునరుద్ఘాటించింది. మానవ హక్కులు, చట్టబద్ధ పాలనను కాపాడాల్సిన బాధ్యత అన్ని దేశాలపై ఉందని గుటెర్రస్ స్పష్టం చేశారు.
ఇదిలా ఉండగా, మదురో అరెస్టుపై అమెరికా అధ్యక్షుడు డొనాల్డ్ ట్రంప్ స్పందిస్తూ వివాదాస్పద వ్యాఖ్యలు చేశారు. “వారిని ఒక నౌకలో న్యూయార్క్కు తరలిస్తున్నాం. హెలికాప్టర్లో మంచి ప్రయాణమే అయి ఉంటుంది” అని ఫాక్స్ న్యూస్కు తెలిపారు. మదురో డ్రగ్స్ కార్టెళ్లతో కుమ్మక్కయ్యారని, అమెరికాకు ముప్పుగా మారారని ట్రంప్ గత కొంతకాలంగా ఆరోపణలు చేస్తున్న విషయం తెలిసిందే. అయితే ఈ చర్యపై రష్యా, చైనా సహా పలు దేశాలు ఆందోళన వ్యక్తం చేయనున్నట్లు సంకేతాలు కనిపిస్తున్నాయి. ఈ ఘటన అంతర్జాతీయ రాజకీయాల్లో కొత్త ఉద్రిక్తతలకు దారి తీసే అవకాశముందని విశ్లేషకులు భావిస్తున్నారు.
