CM Chandrababu: తుమ్మలపల్లి కళాక్షేత్రంలో అత్యంత వైభవంగా ఉగాది వేడుకలు..! పాల్గొన్న సీఎం చంద్రబాబు!

కష్టసుఖాల కలయికపై ముఖ్యమంత్రి సందేశం…

ఐటీతో ఉపాధి - సంప్రదాయంతో సంస్కారం…

పరాభవ నామ సంవత్సరం అందరికీ శుభప్రదం…

CM Chandrababu: విజయవాడలోని తుమ్మలపల్లి కళాక్షేత్రంలో ఉగాది వేడుకలు అత్యంత వైభవంగా జరిగాయి. ఈ కార్యక్రమంలో ముఖ్యమంత్రి నారా చంద్రబాబు నాయుడు పాల్గొని రాష్ట్ర ప్రజలందరికీ ఉగాది శుభాకాంక్షలు తెలియజేశారు. ప్రముఖ సిద్ధాంతి మాడుగుల నాగఫణిశర్మ గారు పరాభవ నామ సంవత్సర పంచాంగ శ్రవణాన్ని భక్తులకు, ప్రజలకు అర్థమయ్యేలా వివరించారు. ఆయన వాక్చాతుర్యాన్ని మెచ్చుకున్న ముఖ్యమంత్రి, ఈ కొత్త ఏడాది తెలుగు ప్రజలందరికీ అన్ని విధాలా శుభాలను చేకూరుస్తుందని ఆశాభావం వ్యక్తం చేశారు.

ఉగాది పండుగ విశిష్టతను వివరిస్తూ, ఉగాది పచ్చడి మన జీవితాలకు ఒక గొప్ప పాఠమని ముఖ్యమంత్రి పేర్కొన్నారు. పచ్చడిలోని షడ్రుచులు ఎలాగైతే కలిసి ఉంటాయో, మన జీవితంలో కూడా కష్టసుఖాలు, తీపి చేదులు అంతే సహజమని ఆయన గుర్తు చేశారు. ఉగాది పచ్చడిని మనం ఎంత ఇష్టంగా స్వీకరిస్తామో, రాబోయే కాలం గురించి చెప్పే పంచాంగ శ్రవణాన్ని కూడా అంతే ఆసక్తితో వింటామని చెప్పారు. పండుగలు కేవలం వేడుకలు మాత్రమే కాదని, అవి మనకు ఆరోగ్యకరమైన జీవనశైలిని, మంచి చెడుల విచక్షణను నేర్పిస్తాయని ఆయన అభిప్రాయపడ్డారు.

సాంస్కృతిక వారసత్వాన్ని గౌరవిస్తూ, ఈ సందర్భంగా వివిధ రంగాల్లో ప్రతిభ కనబరిచిన 38 మందికి 'కళారత్న' పురస్కారాలను, 122 మందికి 'ఉగాది పురస్కారాలను' ప్రభుత్వం తరపున అందజేశారు. రాష్ట్ర అభివృద్ధిలో నీటి భద్రత, ప్రకృతి పరిరక్షణ కీలకమని చెబుతూ, ప్రస్తుతం జలాశయాలన్నీ నీటితో కళకళలాడటం శుభపరిణామమని చంద్రబాబు అన్నారు. తాను ముఖ్యమంత్రిగా ఉన్న సమయంలోనే మూడోసారి గోదావరి పుష్కరాలను నిర్వహించే భాగ్యం కలిగిందని, అదే ఉత్సాహంతో కృష్ణా పుష్కరాలను కూడా అత్యంత వైభవంగా నిర్వహిస్తామని ఆయన ప్రకటించారు.

గతంలో ఐటీ రంగాన్ని ప్రోత్సహించడం వల్ల నేడు ప్రపంచవ్యాప్తంగా తెలుగువారు ఉన్నత స్థానాల్లో ఉన్నారని ముఖ్యమంత్రి గర్వంగా చెప్పారు. ఐటీ కేవలం ఉద్యోగాలను, జీవనోపాధిని మాత్రమే ఇస్తుందని, కానీ మన సంస్కృతి, సంప్రదాయాలు మాత్రమే మనలో విలువలను పెంపొందిస్తాయని ఆయన స్పష్టం చేశారు. సంపద అనేది కేవలం కొందరికే పరిమితం కాకూడదని, సమాజంలోని అందరూ ఆనందంగా ఉన్నప్పుడే నిజమైన అభివృద్ధి సాధ్యమవుతుందని ఆయన తన ప్రసంగంలో నొక్కి చెప్పారు.