ఈ రోజుల్లో చదువు పూర్తయ్యాక మంచి ఉద్యోగం కోసం నగరాలకు వెళ్లడం చాలా మందికి సాధారణ మార్గం. కానీ సమాజానికి సేవ చేయాలి, ప్రజల సమస్యలు పరిష్కరించాలి, గ్రామ అభివృద్ధికి తాను ఏదైనా చేయాలి అన్న ఆలోచన కలిగిన యువత చాలా అరుదుగా కనిపిస్తున్నారు. అలాంటి అరుదైన ఉదాహరణగా నిలిచారు ఉత్తరాఖండ్కు చెందిన 22 ఏళ్ల సాక్షి రావత్. డిగ్రీ, పీజీ పూర్తయ్యాక పట్టణాలకు వెళ్లకుండా, గ్రామ ప్రజల సమస్యలు అర్థం చేసుకొని, వాటి పరిష్కారానికి తానే నాయకత్వం వహించాలని సంకల్పించి సర్పంచ్ ఎన్నికలకు పోటీ చేశారు. గ్రామ అభివృద్ధి పై ఆమె చూపిన దృక్పథం, యువత సామర్థ్యంపై నమ్మకం, గ్రామ ప్రజల కోసం తాను పనిచేస్తానన్న హామీ ఇవన్నీ ప్రజలను బలంగా ఆకట్టుకున్నాయి.
ఎన్నికల్లో ఆమె ఘన విజయాన్ని సాధించి కుయ్ గ్రామ సర్పంచ్గా ఎన్నికయ్యారు. ఎన్నికల ఫలితాలు బయటకు రాగానే గ్రామంలో ఆనందం వెల్లివిరిసింది. గ్రామ ప్రజల ఆశలు తీర్చడానికి తాను శక్తివంచన లేకుండా కృషి చేస్తానని ఆమె స్పష్టంగా చెప్పారు. జిల్లాలోని గ్రామాలు అభివృద్ధి చెందడానికి నాయకత్వం ఎంత ముఖ్యమో ఈ విజయం మరోసారి నిరూపించింది. సాక్షి రావత్ ముందుగా చేయాలనుకుంటున్న పనుల్లో విద్యా రంగ సదుపాయాల మెరుగుదల, ఆరోగ్య సేవల బలోపేతం, గ్రామీణ ఉపాధి అవకాశాల పెరుగుదల, రహదారి మరియు నీటి సదుపాయాల అభివృద్ధి ఉన్నాయి. ముఖ్యంగా యువత చేతకావలసిన పనుల్లో భాగస్వామ్యం కావాలని ఆమె కోరుతున్నారు.
ప్రజలకు తన నాయకత్వంపై ఉన్న విశ్వాసమే తనకు పెద్ద బలం అని సాక్షి చెప్పారు. “గ్రామం అభివృద్ధి చెందితేనే నిజమైన ప్రగతి సాధ్యమవుతుంది. యువత గ్రామాల నుండి పారిపోకుండా సేవకు ముందుకు రావాలి” అని ఆమె చెప్పిన మాటలు అందరికీ ప్రేరణగా మారాయి. గ్రామ ప్రజలు కూడా ఆమె విజయం పై సంతోషం వ్యక్తం చేస్తూ, ఇంత చిన్న వయసులో నాయకత్వం చేపడుతున్న సాక్షి గ్రామానికి మోడల్ అభివృద్ధి తీసుకొస్తారని నమ్ముతున్నారు. గ్రామభవిష్యత్తును మార్చాలని కలలు కంటూ, వాటిని నిజం చేసేందుకు కష్టపడే సాక్షి రావత్ విజయకథ యువతకు స్ఫూర్తిగా నిలుస్తోంది. దేశంలో ఇలాంటి నాయకులు ఎక్కువైతే గ్రామాలు మాత్రమే కాదు, మొత్తం దేశం ముందుకు సాగుతుంది అనడంలో సందేహమే లేదు.
