శ్రావణమాసం ప్రారంభంతో పండగ సీజన్ వచ్చేసింది. ఈ సమయంలో పర్యాటకాలు, పుణ్యక్షేత్రాల సందర్శనల కోసం ప్రజల రాకపోకలు భారీగా పెరుగుతుంటాయి. రైళ్లపై అధికంగా ఆధారపడే ప్రయాణికుల రద్దీని దృష్టిలో పెట్టుకుని దక్షిణ మధ్య రైల్వే అధికారులు ప్రత్యేక రైళ్లను నడిపేందుకు ముందుకొచ్చారు. ఈ ప్రత్యేక రైళ్లు ప్రధానంగా సికింద్రాబాద్, చర్లపల్లి స్టేషన్ల నుంచి మైసూరు, కాకినాడ వంటి ప్రాంతాలకు నడవనున్నాయి.
సికింద్రాబాద్ నుంచి మైసూరుకు నంబర్ 07033 ప్రత్యేక రైలు ప్రతి శుక్రవారం, సోమవారం రాత్రి 10:10 గంటలకు బయలుదేరి, మరుసటి రోజు మధ్యాహ్నం 4:00 గంటలకు మైసూరుకు చేరుతుంది. అలాగే మైసూరు నుంచి సికింద్రాబాద్‌కు నంబర్ 07034 రైలు ప్రతి శని, మంగళవారాల్లో సాయంత్రం 5:20 గంటలకు బయలుదేరి, మరుసటి రోజు ఉదయం 11:00 గంటలకు చేరుతుంది. ఈ రైలు ప్రయాణం బెంగళూరు, అనంతపురం, రాయచూరు, గుంతకల్ వంటి ప్రధాన స్టేషన్ల మీదుగా సాగుతుంది.
ఇక చర్లపల్లి నుంచి కాకినాడకు ఒక ప్రత్యేక రైలు నంబర్ 07031 ఈ నెల 8వ తేదీ శుక్రవారం సాయంత్రం 7:30 గంటలకు బయలుదేరి, మరుసటి రోజు ఉదయం 9:00 గంటలకు కాకినాడ టౌన్‌కు చేరుతుంది. అదే రూట్లో తిరిగి వచ్చే నంబర్ 07032 రైలు 10వ తేదీ ఆదివారం రాత్రి 8:10 గంటలకు కాకినాడ నుంచి బయలుదేరి, మరుసటి రోజు ఉదయం 8:30 గంటలకు చర్లపల్లికి చేరుతుంది. ఈ రైలు గుంటూరు, విజయవాడ, రాజమండ్రి వంటి ప్రధాన స్టేషన్లను దాటి ప్రయాణిస్తుంది. ప్రయాణికుల సౌకర్యార్థం ఈ ప్రత్యేక రైళ్ల షెడ్యూల్‌ను ఇప్పటికే రైల్వే అధికారులు విడుదల చేశారు.
