Modi: అబుదాబి పర్యటనకు ప్రధాని మోదీ.. ఇంధన భద్రత, వ్యూహాత్మక భాగస్వామ్యంపై కీలక చర్చలు!

హోర్ముజ్ జలసంధి సమస్యల కారణంగా గ్లోబల్ ఎనర్జీ సరఫరాలో ఆటంకాలు..

ప్రధాని నరేంద్ర మోదీ ఈ శుక్రవారం అబుదాబి పర్యటన..

న్యూఢిల్లీ: ప్రధాని నరేంద్ర మోదీ ఈ శుక్రవారం అబుదాబి పర్యటనకు వెళ్లనున్నారు. యూఏఈతో ప్రారంభమయ్యే ఈ ఐదు దేశాల పర్యటనలో నెదర్లాండ్స్, స్వీడన్, నార్వే, ఇటలీ దేశాలను కూడా ఆయన సందర్శించనున్నారు. ఈ నెల 20 వరకు కొనసాగే ఈ విదేశీ పర్యటనకు అంతర్జాతీయంగా ప్రత్యేక ప్రాధాన్యం ఏర్పడింది.

ప్రస్తుతం పశ్చిమ ఆసియాలో నెలకొన్న ఉద్రిక్త పరిస్థితులు ప్రపంచవ్యాప్తంగా చమురు ధరలపై ప్రభావం చూపుతున్నాయి. ముఖ్యంగా అమెరికా-ఇరాన్ మధ్య నెలకొన్న కాల్పుల విరమణ ఒప్పందం అనిశ్చితిలో ఉండటం, హోర్ముజ్ జలసంధి సమస్యల కారణంగా గ్లోబల్ ఎనర్జీ సరఫరాలో ఆటంకాలు ఎదురవుతున్నాయి. ఈ నేపథ్యంలో భారత ఇంధన భద్రత అంశం ప్రధాని మోదీ పర్యటనలో ప్రధాన చర్చగా మారనుంది.

అబుదాబిలో యూఏఈ అధ్యక్షుడు షేక్ మహ్మద్ బిన్ జాయెద్ అల్ నహ్యాన్‌తో ప్రధాని మోదీ సమావేశం కానున్నారు. గత ఐదు నెలల్లో ఇద్దరు నేతలు ముఖాముఖిగా కలుసుకోవడం ఇది రెండోసారి. ఈ ఏడాది జనవరిలో యూఏఈ అధ్యక్షుడు భారత్‌ పర్యటనకు వచ్చిన సమయంలో టెక్నాలజీ, ఆర్టిఫిషియల్ ఇంటెలిజెన్స్, వాణిజ్యం, ఆహార భద్రత వంటి పలు రంగాల్లో కీలక ఒప్పందాలు కుదిరాయి.

ఈ పర్యటనకు ముందు భారత విదేశాంగ శాఖ గల్ఫ్ వ్యవహారాల అదనపు కార్యదర్శి అసీమ్ మహాజన్ మాట్లాడుతూ, భారత ఇంధన భద్రతలో యూఏఈ కీలక భాగస్వామి అని తెలిపారు. గత ఏడాది భారత్‌కు అవసరమైన ముడి చమురులో దాదాపు 11 శాతం యూఏఈ నుంచే వచ్చిందని వెల్లడించారు.

అలాగే ద్రవీభవించిన సహజ వాయువు (LNG) సరఫరాలో కూడా యూఏఈతో భారత్‌కు బలమైన సంబంధాలు ఉన్నాయని చెప్పారు. భారత సంస్థలు, ADNOC గ్యాస్ సంస్థల మధ్య ఏడాదికి 4.5 మిలియన్ టన్నుల LNG సరఫరాకు దీర్ఘకాలిక ఒప్పందాలు కుదిరాయని తెలిపారు. దీంతో యూఏఈ LNGకి భారత్ అతిపెద్ద కొనుగోలుదారుగా మారిందన్నారు.

ఎల్పీజీ సరఫరాలో కూడా యూఏఈ భారత్‌కు అతిపెద్ద వనరుగా ఉందని, దేశ అవసరాల్లో దాదాపు 40 శాతం అక్కడి నుంచే వస్తోందని వివరించారు. మరోవైపు భారత పెట్రోలియం ఉత్పత్తులకు యూఏఈ రెండో అతిపెద్ద మార్కెట్‌గా కొనసాగుతోందన్నారు.

ఇంధన రంగంలో భారత కంపెనీలు యూఏఈలో 1.2 బిలియన్ డాలర్లకు పైగా పెట్టుబడులు పెట్టినట్లు తెలిపారు. ఈ ఏడాది జనవరిలో భారత్‌కు చెందిన భారత్ పెట్రో రిసోర్సెస్ లిమిటెడ్ అబుదాబి ఆన్‌షోర్ బ్లాక్-1లో చమురు నిల్వలను గుర్తించడం విశేషమన్నారు. మిడిల్ ఈస్ట్ ప్రాంతంలో భారత సంస్థ సాధించిన తొలి అప్‌స్ట్రీమ్ చమురు ఆవిష్కరణ ఇదేనని పేర్కొన్నారు.

భారత్ వ్యూహాత్మక చమురు నిల్వల విషయంలో కూడా యూఏఈ కీలక భాగస్వామిగా నిలిచిందన్నారు. మంగళూరులోని భారత వ్యూహాత్మక పెట్రోలియం నిల్వ కేంద్రంలో యూఏఈ ఇప్పటికే ఐదు మిలియన్ బ్యారెల్లకు పైగా ముడి చమురును నిల్వ ఉంచిందని తెలిపారు.

ఇక డిజిటల్ లావాదేవీల్లో కూడా రెండు దేశాల మధ్య సహకారం పెరుగుతోంది. భారత యూపీఐ వ్యవస్థను యూఏఈ AANI ప్లాట్‌ఫారంతో అనుసంధానం చేయడం వల్ల వ్యాపారాలు, ప్రవాస భారతీయులకు అంతర్జాతీయ చెల్లింపులు మరింత సులభమయ్యాయి.

యూఏఈ ప్రస్తుతం భారత్‌కు మూడో అతిపెద్ద వాణిజ్య భాగస్వామిగా ఉండగా, గత 25 ఏళ్లలో భారత్‌లో అత్యధిక పెట్టుబడులు పెట్టిన దేశాల్లో ఏడో స్థానంలో నిలిచింది. పశ్చిమ ఆసియా ప్రాంతం ఉద్రిక్త పరిస్థితులను ఎదుర్కొంటున్న ఈ సమయంలో ప్రధాని మోదీ అబుదాబి పర్యటన రెండు దేశాల మధ్య వ్యూహాత్మక సంబంధాలను మరింత బలోపేతం చేసే కీలక అడుగుగా భావిస్తున్నారు.