మారుతీ సుజుకి భారతీయ మార్కెట్లో SUV విభాగంలో తన స్థానాన్ని మరింత బలోపేతం చేసుకునేందుకు సిద్ధమవుతోంది. ఈ ఏడాదిలోనే కంపెనీ ఐదు కొత్త SUV మోడళ్లను మార్కెట్లోకి తెచ్చే ప్రణాళిక రూపొందించింది. వీటిలో విక్టరీ, ఈ విటారా (ఎలక్ట్రిక్ SUV), గ్రాండ్ విటారా 7-సీటర్, మైక్రో SUV, ఫ్రాంక్స్ హైబ్రిడ్ ఉన్నాయి. ఎలక్ట్రిక్, పెట్రోల్, హైబ్రిడ్, CNG ఆప్షన్లతో వస్తున్న ఈ వాహనాలు, భారతీయ వినియోగదారుల డిమాండ్‌కు తగినట్లు రూపకల్పన చేయబడ్డాయి.
విక్టరీ SUV, గ్రాండ్ విటారా కంటే కొద్దిగా తక్కువ రేంజ్‌లో ఉంటూ హ్యుందాయ్ క్రెటా, కియా సెల్టోస్ వంటి మోడళ్లతో పోటీ పడనుంది. ఇది పెట్రోల్, హైబ్రిడ్, CNG ఆప్షన్లతో రావడం విశేషం. అదనంగా, లెవెల్ 2 ADAS, ఆధునిక భద్రతా ఫీచర్లు ఇందులో ప్రత్యేక ఆకర్షణలు. దీని ధర 10 నుంచి 18 లక్షల మధ్య ఉండవచ్చని అంచనా.
ఈ విటారా మాత్రం మారుతీ యొక్క తొలి పూర్తి ఎలక్ట్రిక్ SUV. ఇది 49kWh, 61kWh బ్యాటరీ ప్యాక్‌లతో వస్తూ ఒక్కసారి ఛార్జ్‌తో 500 కిలోమీటర్లకు పైగా రేంజ్ అందిస్తుంది. ఇందులో 360-డిగ్రీ కెమెరా, ఎలక్ట్రిక్ సన్‌రూఫ్, ADAS వంటి ఫీచర్లు ఉండగా, ధర 20 నుంచి 30 లక్షల మధ్య ఉండవచ్చని భావిస్తున్నారు. ఈ మోడల్ 2025 మార్చిలో లాంచ్ కానుంది.
మారుతీ మరో బలమైన ఎంట్రీగా 7-సీటర్ గ్రాండ్ విటారాని తీసుకురానుంది. టాటా సఫారీ, మహీంద్రా XUV700 వంటి మోడళ్లకు పోటీగా వస్తున్న ఈ SUV, 1.5 లీటర్ పెట్రోల్ మరియు హైబ్రిడ్ ఆప్షన్లలో అందుబాటులో ఉంటుంది. పనోరమిక్ సన్‌రూఫ్, డిజిటల్ ఇన్‌స్ట్రుమెంట్ కన్సోల్ వంటి ఫీచర్లతో ఇది 12 నుంచి 22 లక్షల మధ్య ధరలో రానుంది. అలాగే మైక్రో SUV (Y43 కోడ్‌నేమ్) కూడా రాబోతుంది. ఇది హ్యుందాయ్ ఎక్స్‌టర్, టాటా పంచ్‌లకు పోటీగా 2026 చివర్లో లాంచ్ అవుతుంది.
ఇక చివరగా, ఫ్రాంక్స్ హైబ్రిడ్ ఫేస్‌లిఫ్ట్ 2025లో లాంచ్ కానుంది. ఇది 1.2L Z-సిరీస్ ఇంజిన్, హైబ్రిడ్ సిస్టమ్తో వస్తూ 30 kmplకు పైగా మైలేజ్ ఇస్తుందని అంచనా. ADAS, లేన్ కీప్ అసిస్ట్ వంటి ఫీచర్లు ఇందులో ఉన్నాయి. మొత్తం మీద, మారుతీ సుజుకి తన SUV లైనప్‌లో కొత్త డిజైన్‌లు, ఆధునిక టెక్నాలజీ, భద్రతా ఫీచర్లతో వినియోగదారులను ఆకర్షించేలా బలమైన ప్రణాళికలు వేసింది.
