దేశంలోనే తొలిసారిగా కేరళ ప్రభుత్వం పూర్తి ఏసీ గదులతో కూడిన ప్రాథమిక పాఠశాల నిర్మాణాన్ని పూర్తి చేసింది. మల్లప్పురం జిల్లాలోని మేల్మురి ముట్టిపాడులో ఈ ఆధునిక పాఠశాల విద్యార్థుల కోసం కొత్త శకానికి నాంది పలుకనుంది. ప్రభుత్వ ఆధ్వర్యంలో నిర్మితమైన ఈ పాఠశాల పూర్తిగా అత్యాధునిక సౌకర్యాలతో అలంకరించబడింది. పాఠశాలలో ఎనిమిది తరగతి గదులు, కంప్యూటర్ ల్యాబ్‌, లైబ్రరీ, స్టాఫ్ రూమ్‌, హెడ్‌మాస్టర్ గది వంటి అన్ని విభాగాలకు ఏసీ సదుపాయం కల్పించారు.
ఈ రెండు అంతస్తుల భవనం సుమారు 10,000 చదరపు అడుగుల విస్తీర్ణంలో నిర్మించబడింది. పాఠశాలలోని ప్రతి గదిలో FRP మెటీరియల్‌తో తయారు చేసిన ఆధునిక బెంచీలు, డెస్క్‌లు ఏర్పాటు చేశారు. ప్రతి తరగతి గదిలో డిజిటల్ డిస్‌ప్లే స్క్రీన్‌లను అమర్చడం ద్వారా విద్యార్థులు స్మార్ట్‌ లెర్నింగ్‌ పద్ధతిలో నేర్చుకునేలా చర్యలు తీసుకున్నారు. అంతేకాక, క్యాంపస్ అంతటా ఇంటిగ్రేటెడ్ సౌండ్ సిస్టమ్‌ను ఏర్పాటు చేయడం ద్వారా పాఠశాల వాతావరణాన్ని మరింత ఆకర్షణీయంగా తీర్చిదిద్దారు.
విద్యార్థుల సౌకర్యార్థం ప్రతి తరగతి గదిలో చిన్న లైబ్రరీ, షూ ర్యాక్‌, తాగునీటి సదుపాయం వంటి సౌకర్యాలను కల్పించారు. పాఠశాల అభివృద్ధి పనులకు ప్రభుత్వం సుమారు రూ.5 కోట్ల మేర ఖర్చు చేసింది. అదనంగా, స్థానిక ఎమ్మెల్యే పి. ఉబైదుల్ తన నిధుల నుండి రూ.50 లక్షల రూపాయలు అందించారు. ఈ నూతన సదుపాయాలతో కూడిన పాఠశాల ప్రారంభం గ్రామీణ విద్యా మౌలిక వసతుల అభివృద్ధిలో ఒక చారిత్రాత్మక అడుగుగా నిలవనుంది.
కేరళ ప్రభుత్వం చేపట్టిన ఈ ప్రాజెక్ట్ దేశవ్యాప్తంగా ప్రభుత్వ పాఠశాలల అభివృద్ధికి ఆదర్శంగా నిలుస్తుందని నిపుణులు భావిస్తున్నారు. గతంలో పంజాబ్‌ ప్రభుత్వం కూడా ఏసీ పాఠశాల నిర్మాణం చేపట్టినా, అది పూర్తిస్థాయిలో ప్రారంభం కాలేదు. అయితే కేరళలోని ఈ పాఠశాల పూర్తి స్థాయి ఏసీ సదుపాయాలతో దేశానికి మోడల్‌గా మారనుంది. ఈ ప్రాజెక్ట్ ద్వారా గ్రామీణ ప్రాంతాల విద్యార్థులకు మెరుగైన విద్యా వాతావరణం అందించడమే కాకుండా, ప్రభుత్వ విద్యా రంగం పట్ల ప్రజల నమ్మకాన్ని మరింత పెంచనుంది.
