డెల్టా ఎయిర్ లైన్స్ కు చెందిన విమానానికి తృటిలో పెను ప్రమాదం తప్పిన ఘటన ఆలస్యంగా వెలుగులోకి వచ్చింది. ఇటీవల మిన్నియాపొలిస్ నుంచి మైనట్కు వెళ్తున్న డెల్టా ఎయిర్లైన్స్ విమానానికి, బీ 52 బాంబర్ యుద్ధ విమానం ఎదురుగా వచ్చింది.
అయితే యుద్ధ విమానం తమకు ఎదురుగా వస్తున్నట్లు ఎయిర్ ట్రాఫిక్ కంట్రోల్ నుంచి స్పష్టమైన ఆదేశాలు రాలేదని డెల్టా విమాన పైలట్ పేర్కొన్నారు. దీంతో ఆ సమయంలో ప్రమాదాన్ని తప్పించడానికి విమానాన్ని వేగంగా మరోవైపునకు మళ్లించినట్లు తెలిపారు.
విమానం సురక్షితంగా ల్యాండ్ అయిన తర్వాత ఈ విషయాన్ని ప్రయాణికులకు చెప్పి వారిని క్షమాపణలు కోరామన్నారు. ప్రమాదం గురించి పైలట్ అనౌన్స్మెంట్ చేస్తున్న సమయంలో ఆడియో రికార్డు చేసిన ఓ ప్రయాణికురాలు దాన్ని సామాజిక మాధ్యమాలలో షేర్ చేయడంతో ఇది వైరల్‌గా మారింది.
యుద్ధ విమానం ఒక్కసారిగా తమవైపు దూసుకురావడంతో విమానాన్ని వేగంగా మరోవైపు తిప్పినట్లు తెలిపారు. యుద్ధ విమానం గురించి సమాచారం ఇవ్వకపోవడం, రాడార్ వ్యవస్థ నుంచి ఆదేశాలు లేకపోవడం వల్ల ఇలా జరిగిందని అతడు వివరిస్తున్నట్లు ఆడియోలో ఉంది. ఈ ఘటనపై దర్యాప్తు చేస్తున్నట్లు అధికారులు పేర్కొన్నారు.
