Railway update: ఆంధ్రప్రదేశ్ తీరాన్ని తాకిన మొంథా తుపాన్ ప్రభావం ఇప్పటికే స్పష్టంగా కనిపిస్తోంది. తూర్పు గాలులు బలపడటంతో సముద్రతీర ప్రాంతాల్లో భారీ వర్షాలు పడుతున్నాయి. ఈ పరిస్థితుల్లో దక్షిణ మధ్య రైల్వే ప్రయాణికుల భద్రతను దృష్టిలో ఉంచుకొని అనేక జాగ్రత్త చర్యలు చేపట్టింది.
రైల్వే అధికారులు ప్రజలను హెచ్చరిస్తూ — తుఫాన్ తీవ్రతను దృష్టిలో ఉంచుకొని అత్యవసరమైతేనే రైల్లో ప్రయాణం చేయండి. రైళ్ల షెడ్యూల్‌లో మార్పులు జరిగే అవకాశం ఉంది అని తెలిపారు.
విజయవాడలో ఏర్పాటు చేసిన కంట్రోల్ రూమ్ ద్వారా ప్రతి నిమిషానికీ పరిస్థితిని పర్యవేక్షిస్తున్నారు. రైళ్ల రాకపోకలు ఎక్కడ, ఎప్పుడు ప్రభావితమవుతున్నాయో అక్కడి అధికారులకు సమాచారం అందిస్తున్నారు.
ప్రయాణికులు తమ ప్రయాణానికి ముందు **NTES మొబైల్ యాప్ లేదా enquiry.indianrail.gov.in
https://enquiry.indianrail.gov.in వెబ్‌సైట్ ద్వారా రైళ్ల లైవ్ అప్‌డేట్‌ తెలుసుకోవచ్చు. అలాగే దక్షిణ మధ్య రైల్వే అధికారిక సోషల్ మీడియా హ్యాండిల్స్ లో కూడా మార్పులు రద్దు వివరాలు క్రమం తప్పకుండా పోస్ట్ అవుతుంటాయి.
తుఫాన్ ప్రభావంతో కొన్ని ప్రధాన రైళ్లను తాత్కాలికంగా రద్దు చేశారు.
భువనేశ్వర్‌–బెంగళూరు,
భువనేశ్వర్‌–సికింద్రాబాద్‌,
భువనేశ్వర్‌–పుదుచ్చేరి రైళ్లు ఈరోజు నడవవు.
అలాగే సికింద్రాబాద్‌, మహబూబ్‌నగర్‌, చెన్నై సెంట్రల్‌, తిరుపతి, గుంటూరు, విజయవాడ నుంచి విశాఖపట్నం, కాకినాడ వైపు నడిచే రైళ్లు కొన్నింటి మార్గాలు మార్చబడ్డాయి.
ఉదాహరణకు టాటానగర్–ఎర్నాకుళం రైలు ను సాధారణ మార్గం కాకుండా టిట్లాగఢ్–నాగ్‌పూర్–బలార్షా మీదుగా మళ్లించారు.
హెల్ప్‌డెస్క్ నంబర్లు ప్రయాణికుల కోసం
ప్రయాణికులకు సహాయం అందించేందుకు రైల్వే అధికారులు పలు హెల్ప్‌డెస్క్‌లు ఏర్పాటు చేశారు.
విజయవాడ (0866-2575167),
నెల్లూరు (9063347961),
రాజమండ్రి (8331987657),
కాకినాడ (0884-2374227) వంటి స్టేషన్లలో అధికారులు 24 గంటలపాటు విధుల్లో ఉంటున్నారు.
రైల్వే అధికారులు ప్రజలకు స్పష్టం చేశారు తుఫాన్ పరిస్థితుల్లో ముందస్తు జాగ్రత్తలు తీసుకోవడం తప్పనిసరి. వాతావరణ శాఖ నుంచి వచ్చే తాజా బులెటిన్‌లను గమనించాలని, అనవసర ప్రయాణాలను నివారించాలని సూచించారు.
మొంథా తుపాన్ తాకిడి పెరిగే కొద్దీ రవాణా వ్యవస్థపై మరింత ప్రభావం చూపే అవకాశం ఉంది. అందుకే రైల్వే శాఖ అత్యవసర చర్యలతో ముందంజలో ఉంది. ప్రయాణికులు ఈ సూచనలను పాటిస్తే, ప్రమాదాలు, ఇబ్బందులు తగ్గుతాయి. ప్రజల భద్రతే ఈ సమయంలో ప్రాధాన్యమని అధికారులు మరోసారి పిలుపునిచ్చారు.
