సిఎమ్ఎఫ్ కంపెనీ నుంచి ఇటీవలే విడుదలైన తాజా స్మార్ట్‌వాచ్ – CMF Watch 3 Pro టెక్ ప్రియుల్ని ఆకట్టుకుంటోంది. గత మోడల్ వాచ్ ప్రో 2కు ఇది అప్‌గ్రేడ్ వెర్షన్. ఇందులో డిజైన్, బ్యాటరీ, డిస్‌ప్లే, కనెక్టివిటీ వంటి అంశాల్లో ముఖ్యమైన మార్పులు చోటు చేసుకున్నాయి. మెటల్ ఫ్రేమ్‌ తో ఉన్న స్టైలిష్ డిజైన్‌కి తోడు, మృదువైన సిలికాన్ స్ట్రాప్‌లు ఈ గ్యాడ్జెట్‌ను మరింత ఆకర్షణీయంగా మార్చుతున్నాయి.
ఈ స్మార్ట్‌వాచ్‌లో 1.43 అంగుళాల AMOLED డిస్‌ప్లే ఉండగా, 466x466 పిక్సెల్స్ రిజల్యూషన్‌తో వస్తోంది. Always-On Display (AOD) సపోర్ట్ ఉండటంతో ఎప్పుడూ టైమ్ చూసేందుకు అవకాశం ఉంది. దీని బ్రైట్‌నెస్ 650 నిట్స్ వరకు ఉండటం వల్ల ఎండలోనూ స్పష్టంగా చూడవచ్చు. రిఫ్రెష్ రేట్ 60Hz కాగా, 120కిపైగా యానిమేటెడ్ మరియు ఇంటరాక్టివ్ వాచ్‌ఫేస్‌లు అందుబాటులో ఉన్నాయి.
బ్యాటరీ పరంగా చూస్తే, 350mAh కెపాసిటీతో సాధారణ వినియోగంలో 13 రోజులు, AOD మోడ్‌లో 3.5 రోజులు పనిచేస్తుంది. జీపీఎస్ కోసం డ్యూయల్ బ్యాండ్ GPSతో పాటు, GLONASS, Galileo, Beidou, QZSS వంటి టెక్నాలజీకి సపోర్ట్ ఉంటుంది. ఇందులో 131 స్పోర్ట్స్ మోడ్‌లు ఉండటం, ఆటోమేటిక్ యాక్టివిటీ డిటెక్షన్ వంటి ఫీచర్లతో ఫిట్‌నెస్ ప్రేమికులకు ఇది బాగా నచ్చే అవకాశం ఉంది.
బ్లూటూత్ కాలింగ్, AI ఆధారిత నాయిస్ రిడక్షన్, మ్యూజిక్ కంట్రోల్, వాయిస్ నోట్స్ రికార్డింగ్ వంటి ఫీచర్లు ఈ డివైస్‌కు ప్రత్యేక ఆకర్షణలు. దీని ధర గ్లోబల్ మార్కెట్లో $99 కాగా, అమెరికాలో ప్రారంభ ఆఫర్ కింద $79కి లభిస్తోంది. ఇది త్వరలోనే ఇతర దేశాల్లో రిటైలర్ల వద్ద కూడా లభించనుంది. సులభమైన వినియోగం, స్టైలిష్ రూపం కలగలిసిన ఈ వాచ్ యువతలో హాట్‌ఫేవరేట్ అవ్వడం ఖాయం.
