బోయపాటి శ్రీను–నందమూరి బాలకృష్ణ కాంబినేషన్ ఎప్పుడూ మాస్ ప్రేక్షకులకు ప్రత్యేక ఆకర్షణ. ‘సింహా’, ‘లెజెండ్’, ‘అఖండ’ వంటి భారీ హిట్స్ తర్వాత ఈ కాంబినేషన్ మళ్లీ చేతులు కలపడంతోనే ప్రేక్షకుల్లో అంచనాలు అలానే చెలరేగాయి. అటువంటి పరిస్థితుల్లో ‘అఖండ 2’ ట్రైలర్ విడుదల కావడంతో సోషల్ మీడియాలో మళ్లీ మాస్ వేవ్ మొదలైంది. బాలయ్య గంభీరమైన గెటప్‌, శక్తివంతమైన డైలాగులు, బోయపాటి స్టైల్ యాక్షన్ అన్నీ కలిసి ట్రైలర్‌కు అసాధారణ స్పందనను తెచ్చాయి. విడుదలైన కొన్ని గంటల్లోనే #Akhanda2Trailer జాతీయ స్థాయిలో ట్రెండ్ అవ్వడం సినిమా మీదున్న పాన్ ఇండియా లెవెల్ హైప్‌ను చూపిస్తోంది.
ఈ ట్రైలర్ లాంచ్‌ను కర్ణాటకలోని చిక్కబళ్లాపురలో భారీ స్థాయిలో నిర్వహించారు. ఈ ఈవెంట్‌కు కన్నడ స్టార్ శివరాజ్‌కుమార్ ప్రత్యేక అతిథిగా హాజరయ్యారు. స్టేజ్ మీద బాలయ్య శివన్న ఇద్దరూ కలుసుకోవడంతో అభిమానుల్లో సందడి ఇంకాస్త పెరిగింది. ఇద్దరూ ఒకే ఫ్రేమ్‌లో కనిపించగానే హాళీ అంతా జైకారాలతో మార్మోగింది. ఇదే సమయంలో శివరాజ్‌కుమార్ చేసిన వ్యాఖ్యలు సోషల్ మీడియాలో దుమారం రేపుతున్నాయి. బోయపాటిగారు మమ్మల్ని ఇద్దరినీ ఒకే సినిమాలో పెడతానంటే… నేను రెడీ అని శివన్న నవ్వుతూ చెప్పగా, వెంటనే బాలయ్య “మేము కూడా రెడీ” అంటూ జవాబు ఇచ్చారు. ఈ మాటలతో స్టేజ్ మీద ఒక్కసారిగా హడావిడి పెరిగింది.
ఇక దర్శకుడు బోయపాటి శ్రీను కూడా వెంటనే స్పందిస్తూ… “డబుల్ రెడీ సార్!” అంటూ ఇద్దరితో కలిసి సినిమా చేయాలని తనలో కూడా ఆసక్తి ఉందని తెలియజేశారు. ఈ మాటలతో సోషల్ మీడియాలో ఓరకంగా ఫ్యాన్ వార్ మొదలైంది. బాలయ్య శివన్న బోయపాటి అంటే మాస్ సునామి ఖాయం, ఈ కాంబినేషన్ వచ్చినా థియేటర్లు కంపించాల్సిందే” అంటూ అభిమానులు పోస్ట్‌లు పెడుతున్నారు. అయితే సినీ వర్గాల మాటల్లో చూస్తేఇలాంటి స్టేట్‌మెంట్లు ఈవెంట్ హీట్ కోసం తరచూ జరుగుతాయని, కానీ మల్టీస్టారర్ సెటప్ అవ్వడానికి మాత్రం స్క్రిప్ట్ బాలన్స్, టైమ్ అలాట్మెంట్, డేట్స్ అడ్జస్ట్మెంట్ వంటి అనేక అంశాలు క్లియర్ కావాలని అంటున్నారు.
ఇక ‘అఖండ 2’ ప్రమోషన్ల విషయానికి వస్తే యూనిట్ పాన్ ఇండియా టార్గెట్‌తో దూసుకెళ్తోంది. ముంబైలో విడుదల చేసిన ఫస్ట్ సాంగ్‌కు వచ్చిన రెస్పాన్స్‌తో హిందీ సర్క్యూట్‌లో కూడా సినిమా మీద ఆసక్తి పెరిగింది. వైజాగ్‌లో జరిగిన సెకండ్ సాంగ్ ఈవెంట్‌కు భారీగా జనసందోహం రావడం, బాలయ్య స్టేజ్ ఎనర్జీ చూడటానికి వేలాది మంది తరలివచ్చారనేది స్పష్టమైంది.
ఈవెంట్‌లో మాట్లాడిన బాలయ్య అఖండ 2లో సనాతన ధర్మం గురించీ, మంచిదారిలో నడిపే సందేశాలుగురించీ చెబుతున్నాం. పిల్లలకి, ప్రకృతికి, ధర్మానికి హాని కలిగితే దేవుడు కూడా చూస్తూ ఊరుకోడు అని చెప్పిన మాటలు అందరినీ ఆకట్టుకున్నాయి. ఆయన ధర్మదేవత పాత్రకు మళ్లీ అలాంటి భారీ రెస్పాన్స్ రావడం అభిమానుల్లో నూతన ఉత్సాహం నింపింది.
‘అఖండ 2’ డిసెంబర్ 5న ప్రపంచవ్యాప్తంగా విడుదల కానుంది. ట్రైలర్‌కు వచ్చిన స్పందన, ప్రమోషన్ల వేగం, స్టార్ల మధ్య ఉన్న కాంబినేషన్ చూస్తే పండుగసీజన్‌లో ఈ సినిమా భారీ ఓపెనింగ్స్ నమోదు చేస్తుందనే బజ్ మాత్రం పటిష్టంగా వినిపిస్తోంది.
