అల్లరి నరేష్ పేరు వినగానే ప్రేక్షకులకు ముందుగా గుర్తుకు వచ్చేది కామెడీ. వరుసగా వినోదాత్మక సినిమాలతో ప్రేక్షకులను అలరించిన నరేష్, ఇటీవల కాలంలో మాత్రం కొత్తరకం కథలను ఎంచుకుంటూ భిన్నమైన దారిలో ప్రయాణిస్తున్నాడు. ఆ ప్రయోగాల జాబితాలోకి తాజాగా చేరిన సినిమా ‘12A రైల్వే కాలనీ’. నాని కాసరగడ్డ దర్శకత్వంలో వచ్చిన ఈ థ్రిల్లర్, ట్రైలర్‌దశ నుంచే ఒక ఆసక్తిని రేకెత్తించింది. ముఖ్యంగా ‘పొలిమేర’ సిరీస్‌ను నిర్మించిన బ్యానర్ ఈ సినిమాను తీస్తుండటంతో ప్రేక్షకుల అంచనాలు మరింత పెరిగాయి.
సినిమా కథ కార్తీక్ అనే యువకుడి చుట్టూ తిరుగుతుంది. రాజకీయ నాయకుడి కోసం చిన్న చిన్న పనులు చేసే గ్యాంగ్‌లో ఉండే కార్తీక్, తన ఊరిలో ఉండే కామాక్షిని చూసి ప్రేమలో పడతాడు. ఇద్దరి మధ్య ప్రేమ పెరిగిపోతున్న సమయంలో, అనుకోని సంఘటనగా కామాక్షి, ఆమె తల్లి హత్యకు గురయ్యారు. ఈ సంఘటనతో కార్తీక్ జీవితం పూర్తిగా మారిపోతుంది. ప్రేమించిన అమ్మాయి ఎందుకు చంపబడ్డారు? ఆ నేరం వెనుక ఎవరు ఉన్నారు? నిజంగా ఈ హత్యలు కేవలం పగబట్టుకున్న క్షణిక చర్యలా? లేక ఇంకే పెద్ద రహస్యం దాగి ఉందా? అని తెలుసుకునే ప్రయాణమే సినిమా ప్రధాన కథ.
దర్శకుడు నాని కాసరగడ్డ కథను నేరుగా పాయింట్ మీదకు తీసుకెళ్లాడు. తొలి భాగంలో హీరో జీవితం, అతని స్నేహితుల వాతావరణం, ప్రేమలైన్, తర్వాత జరిగే హత్య— ఇవన్నీ ప్రేక్షకుల్లో ఒక ఆసక్తిని కలిగిస్తాయి. ముగింపు వరకు ఏం జరగబోతుందో అనిపించే థ్రిల్లింగ్ ఎలిమెంట్స్ వినిపిస్తూ ఉంటాయి. అయితే రెండో భాగంలో కథ కొంచెం నెమ్మదించేలా, కొన్ని సన్నివేశాలు పునరావృతమయ్యేలా అనిపిస్తాయి. దర్శకుడు క్లైమాక్స్ ట్విస్ట్‌ను ప్రేక్షకులకు చివరకు ఇవ్వాలని నిర్ణయించుకున్నట్టుగా మొత్తం కథను ఒకే సీరియస్ టోన్‌లో తీసుకెళ్లాడు. ఈ విధానంలో థ్రిల్ తగ్గి డ్రామా ఎక్కువైన భావన కలిగిస్తుంది.
అయినా కూడా సినిమాటోగ్రఫీ మ్యూజిక్, నేపథ్య స్కోర్ ఈ కథకు బలాన్నిస్తాయి. చీకటి వాతావరణం, రైల్వే కాలనీ లొకేషన్స్ థ్రిల్లర్‌కు ప్రత్యేకమైన మూడ్‌ను సృష్టిస్తాయి. బడ్జెట్ పరిమితులు ఉన్నప్పటికీ నిర్మాణ విలువలు బాగున్నాయి.
నటీనటుల విషయానికి వస్తేఅశల్లరి నరేష్ ఈ పాత్రలో ఓ కొత్త కోణాన్ని చూపించాడు. అతనికి ఉన్న కామెడీ ఇమేజ్‌కి పూర్తిగా భిన్నంగా, సీరియస్ పాత్రలోనూ తాను చేయగలనని నిరూపించాడు. ముఖ్యంగా హత్య విచారణ సన్నివేశాలలో నరేష్ నటన మెరుపులు కనిపిస్తాయి. హీరోయిన్ కామాక్షి పాత్ర చిన్నదైనా, తనదైన స్థాయిలో చేసింది. సాయి కుమార్ స్క్రీన్‌పై కనిపించిన ప్రతి సన్నివేశంలో తన పవర్‌ఫుల్ ప్రెజెన్స్‌తో కథకు గంభీరతను జోడించాడు.
మొత్తంమీద చూసుకుంటే… ‘12A రైల్వే కాలనీ’ కొత్త ప్రయోగం, కొత్త ట్రీట్మెంట్ ఉన్న సినిమా. కథలో కొంత నెమ్మదితనం ఉన్నప్పటికీ, ఒకసారి చూడదగిన థ్రిల్లర్‌గా నిలుస్తుంది. థ్రిల్, డ్రామా రెండూ కావాల్సిన ప్రేక్షకులకు ఇది ఓ సరైన ఎంపికగా అనిపిస్తుంది.
