Tirumala News: తిరుమలలో భక్తుల రద్దీ.. శ్రీవారి ప్రత్యేక దర్శనానికి ఎన్ని గంటల సమయం అంటే..!!

Tirumala News: కలియుగ ప్రత్యక్ష దైవం శ్రీ వేంకటేశ్వర స్వామిని దర్శించుకునేందుకు భక్తులు భారీ సంఖ్యలో తిరుమలకు పోటెత్తారు. నేడు (మార్చి 27) తిరుమల కొండపై భక్తుల రద్దీ సాధారణం కంటే ఎక్కువగా కనిపిస్తోంది. స్వామివారిని దర్శించుకోవాలనే కోరికతో వేల సంఖ్యలో భక్తులు క్యూలైన్లలో వేచి ఉన్నారు. అధికారులు అందుబాటులో ఉంచిన వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లు భక్తులతో నిండిపోయాయి.

ప్రస్తుతం క్యూలైన్లు కంపార్ట్‌మెంట్ల వెలుపల కృష్ణ తేజ గెస్ట్ హౌస్ వరకు కొనసాగుతున్నాయి. ఎలాంటి టోకెన్లు లేని భక్తులకు (సర్వదర్శనం) స్వామివారి దర్శనం కలగడానికి సుమారు 12 నుండి 15 గంటల సమయం పడుతోంది. ఎండ ప్రభావం ఎక్కువగా ఉండటంతో, క్యూలైన్లలో వేచి ఉన్న భక్తులకు టీటీడీ సిబ్బంది నిరంతరాయంగా పాలు, తాగునీరు  అన్నప్రసాదాలను అందిస్తున్నారు.

మరోవైపు, రూ. 300 ప్రత్యేక ప్రవేశ దర్శనం టికెట్లు కలిగిన భక్తులకు శ్రీవారి దర్శనం పూర్తి కావడానికి దాదాపు 4 గంటల సమయం పడుతోంది. అలాగే, ముందుగానే సర్వదర్శనం టైమ్ స్లాట్ టోకెన్లు పొందిన భక్తులు దర్శనం కోసం 6 గంటల పాటు వేచి ఉండాల్సి వస్తోంది. రద్దీని దృష్టిలో ఉంచుకుని భక్తులు తమ వంతు వచ్చే వరకు ఓపికగా ఉండాలని అధికారులు కోరుతున్నారు. 

గడిచిన 24 గంటల్లో తిరుమలలో నమోదైన గణాంకాలను పరిశీలిస్తే, నిన్న ఒక్కరోజే మొత్తం 65,600 మంది భక్తులు స్వామివారిని దర్శించుకున్నారు. మొక్కులు చెల్లించుకోవడానికి 24,292 మంది భక్తులు స్వామివారికి తలనీలాలు సమర్పించారు. భక్తుల రద్దీ పెరగడంతో తిరుమలలోని వసతి గదులకు కూడా భారీగా డిమాండ్ ఏర్పడింది.

భక్తులు సమర్పించిన కానుకల ద్వారా శ్రీవారి హుండీ ఆదాయం నిన్న రూ. 4.18 కోట్లు వచ్చినట్లు తిరుమల తిరుపతి దేవస్థానం వెల్లడించింది. సాధారణ భక్తులకు ఇబ్బంది కలగకుండా దర్శన ఏర్పాట్లను ఎప్పటికప్పుడు టీటీడీ అధికారులు పర్యవేక్షిస్తున్నారు. తిరుమలకు వచ్చే భక్తులు ప్రస్తుత రద్దీని గమనించి తమ ప్రయాణాన్ని ప్లాన్ చేసుకోవాలని సూచిస్తున్నారు.