Char-Dham: చార్ ధామ్ యాత్ర తిరిగి ప్రారంభం.. ఆలయాలు తెరుచుకోనున్న వేళ భక్తుల్లో ఉత్సాహం!

చార్ ధామ్ యాత్ర ప్రారంభం..

నేడు తెరుచుకోనున్న యమునోత్రి, గంగోత్రి ఆలయాలు..

ఉత్తరాఖండ్: ప్రతి ఏడాది భక్తుల ఆధ్యాత్మిక ప్రయాణానికి మార్గం చూపే చార్ ధామ్ యాత్రకు నేడు శ్రీకారం చుట్టబడింది. హిమాలయ ప్రాంతంలోని పవిత్ర క్షేత్రాలైన యమునోత్రి, గంగోత్రి ఆలయాలు ఈరోజు భక్తులకు దర్శనానికి తెరుచుకోనున్నాయి. దీతో దేశం నలుమూలల నుంచి భక్తులు భారీగా తరలి రావడానికి సిద్ధమవుతున్నారు.

యాత్రలో భాగంగా ప్రముఖ శైవక్షేత్రం కేదార్నాథ్ ఆలయం ఈ నెల 22న, వైష్ణవ క్షేత్రం బద్రీనాథ్ ఆలయం ఈ నెల 23న తెరుచుకోనున్నాయి. ఈ నాలుగు క్షేత్రాలను దర్శించడం హిందూ సంప్రదాయంలో అత్యంత పవిత్రంగా భావిస్తారు. ప్రతి సంవత్సరం లక్షలాది మంది భక్తులు ఈ యాత్రలో పాల్గొంటారు.

ఈసారి యాత్రను సక్రమంగా నిర్వహించేందుకు ప్రభుత్వం ప్రత్యేక ఏర్పాట్లు చేసింది. ముఖ్యంగా భక్తుల భద్రత, రద్దీ నియంత్రణ కోసం ఆన్‌లైన్ నమోదు విధానాన్ని తప్పనిసరి చేశారు. ముందుగా ఆన్‌లైన్‌లో రిజిస్ట్రేషన్ చేసుకున్నవారికే యాత్రకు అనుమతి ఇవ్వనున్నట్లు అధికారులు స్పష్టం చేశారు.

హిమాలయాల్లో మంచు కరిగే కాలం మొదలవడంతో ఆలయాలు తెరుచుకోవడం ఆనవాయితీ. ప్రకృతి మధ్యలో దేవదర్శనం పొందే ఈ యాత్ర భక్తులకు ఆధ్యాత్మిక ఆనందాన్ని కలిగిస్తుంది. కుటుంబాలతో కలిసి యాత్రకు వెళ్లాలని భావిస్తున్న వారు ముందుగానే నమోదు చేసుకుని ప్రయాణాన్ని సాఫీగా చేసుకోవాలని అధికారులు సూచిస్తున్నారు. చార్ ధామ్ యాత్ర ప్రారంభంతో ఉత్తరాఖండ్ ప్రాంతం భక్తి తరంగంతో కళకళలాడుతోంది.