Chittoor: కలెక్టర్ సంతకం ఫోర్జరీ.. 22ఏ భూమి అమ్మకానికి భారీ స్కాం!

గంగవరంలో భారీ భూ అక్రమం వెలుగులోకి..

చిత్తూరు జిల్లాలో భూమి మోసంపై పోలీసుల దర్యాప్తు..

చిత్తూరు జిల్లా గంగవరంలో భూమి అక్రమ విక్రయానికి సంబంధించిన భారీ మోసం వెలుగులోకి వచ్చింది. 22ఏ నిషేధిత జాబితాలో ఉన్న భూమిని అమ్మేందుకు కొందరు దళారులు జిల్లా కలెక్టర్ సంతకాన్నే ఫోర్జరీ చేయడం కలకలం రేపుతోంది. ఈ ఘటన రెవెన్యూ శాఖలో ఆందోళన కలిగించగా, పోలీసులు కేసు నమోదు చేసి దర్యాప్తు ప్రారంభించారు.

గంగవరం ప్రాంతంలో మంజునాథరెడ్డి పేరుపై హైవే పక్కన సర్వే నెంబర్ 244/1లో 111 సెంట్ల భూమి ఉంది. ఈ భూమి 22ఏ నిషేధిత జాబితాలో ఉండటంతో దాని కొనుగోలు, అమ్మకాలపై ఆంక్షలు ఉన్నాయి. అయితే ఈ భూమిని విక్రయించేందుకు కొందరు దళారులు పక్కా ప్రణాళికతో నకిలీ పత్రాలు సిద్ధం చేసినట్లు బయటపడింది.

దళారులు కొందరు రెవెన్యూ అధికారులతో కుమ్మక్కై, భూమిని 22ఏ జాబితా నుంచి తొలగించినట్లు చూపిస్తూ జిల్లా కలెక్టర్ సంతకం ఫోర్జరీ చేసిన ప్రొసీడింగ్ ఆర్డర్ కాపీని తయారుచేశారు. ఆ నకిలీ పత్రాల ఆధారంగా భూమిని అమ్మేందుకు ప్రయత్నించగా అసలు విషయం బయటపడింది.

ఈ వ్యవహారం తెలుసుకున్న రెవెన్యూ అధికారులు వెంటనే అప్రమత్తమయ్యారు. జిల్లా కలెక్టర్ ఆదేశాల మేరకు పోలీసులకు ఫిర్యాదు చేశారు. ఫోర్జరీ, నకిలీ పత్రాల సృష్టి, భూమి అక్రమ విక్రయ యత్నంపై కేసు నమోదు చేసిన పోలీసులు పూర్తి స్థాయిలో దర్యాప్తు చేపట్టారు.

ఈ ఘటనతో భూముల కొనుగోలు విషయంలో ప్రజలు మరింత జాగ్రత్తగా ఉండాలని అధికారులు సూచిస్తున్నారు. అధికారిక రికార్డులు, పత్రాలను పూర్తిగా పరిశీలించిన తర్వాతే లావాదేవీలు చేయాలని హెచ్చరిస్తున్నారు.