6–8 నెలల నిరీక్షణ, స్పష్టత లేదు.. విప్రో నియామకాలపై ఫ్రెషర్ల ఆవేదన….
ఆశలిచ్చి ఆన్బోర్డింగ్ ఆలస్యం.. విప్రోపై తీవ్ర ఆరోపణలు….
విప్రో నియామకాల్లో జాప్యం.. నెలల తరబడి ఎదురు చూపులు…
ప్రముఖ ఐటీ దిగ్గజం **విప్రో (Wipro)**పై తీవ్ర ఆరోపణలు వెల్లువెత్తుతున్నాయి. క్యాంపస్ నియామకాల ద్వారా ఎంపిక చేసి, ఆఫర్ లెటర్లు జారీ చేసినప్పటికీ 250 మందికి పైగా ఫ్రెషర్లను ఇప్పటికీ ఉద్యోగంలోకి తీసుకోకుండా జాప్యం చేస్తోందని ఐటీ ఉద్యోగుల సంఘం నాసెంట్ ఇన్ఫర్మేషన్ టెక్నాలజీ ఎంప్లాయీస్ సెనేట్ (NITES) ఆరోపించింది. ఈ మేరకు కేంద్ర కార్మిక శాఖ మంత్రికి ఫిర్యాదు చేసింది. నెలల తరబడి ఎదురు చూస్తున్న ఫ్రెషర్ల భవిష్యత్తు ప్రస్తుతం అగమ్యగోచరంగా మారిందని సంఘం పేర్కొంది.
వివరాల్లోకి వెళ్తే, దేశవ్యాప్తంగా పలు రాష్ట్రాల్లోని కళాశాలల నుంచి క్యాంపస్ ప్లేస్మెంట్ల ద్వారా విప్రో ఎంపిక చేసిన అభ్యర్థులకు ఆఫర్ లెటర్లు జారీ చేసింది. కొన్ని సందర్భాల్లో ఉద్యోగంలో చేరాల్సిన తేదీ, పని చేసే ప్రాంతాన్ని కూడా స్పష్టంగా పేర్కొంటూ కన్ఫర్మేషన్ ఈ-మెయిల్స్ పంపినట్లు ‘నైట్స్’ వెల్లడించింది. అభ్యర్థుల నుంచి అవసరమైన బ్యాక్గ్రౌండ్ వెరిఫికేషన్, డాక్యుమెంటేషన్ ప్రక్రియలు పూర్తయ్యాక కూడా, గత 6 నుంచి 8 నెలలుగా ఆన్బోర్డింగ్ జరగడం లేదని ఫిర్యాదులో పేర్కొంది.
ఈ వ్యవహారంపై అభ్యర్థులు పలుమార్లు విప్రో యాజమాన్యాన్ని సంప్రదించినప్పటికీ, సంస్థ నుంచి సరైన స్పందన రాలేదని ‘నైట్స్’ తెలిపింది. ఎక్కువగా “వ్యాపార అవసరాలు” అనే కారణంతో ఆటోమేటెడ్ సమాధానాలు మాత్రమే వస్తున్నాయని పేర్కొంది. మరోవైపు, ఇదే కాలంలో విప్రో ఇతర అభ్యర్థులను ఉద్యోగాల్లోకి తీసుకున్నప్పటికీ, ఈ 250 మందిని మాత్రం అనిశ్చితిలో వదిలేసిందని ‘నైట్స్’ అధ్యక్షుడు హర్ప్రీత్ సింగ్ సలూజా ఆరోపించారు. ఆఫర్ లెటర్లలో నియామకాలను నిరవధికంగా వాయిదా వేసే హక్కు కంపెనీకి ఉందన్న విషయం పారదర్శకంగా పేర్కొనలేదని ఆయన విమర్శించారు.
ఈ సమస్య ఒక్క రాష్ట్రానికో, ఒక్కరిద్దరికో పరిమితం కాదని ‘నైట్స్’ స్పష్టం చేసింది. ఉత్తరప్రదేశ్, మహారాష్ట్ర, కర్ణాటక, తెలంగాణ, ఆంధ్రప్రదేశ్ సహా పలు రాష్ట్రాల నుంచి బాధితులు తమను సంప్రదించారని తెలిపింది. ఇది విప్రో నియామక విధానంలో ఉన్న లోపాలను బహిర్గతం చేస్తోందని పేర్కొంది. ఈ వ్యవహారంలో కేంద్ర కార్మిక శాఖ జోక్యం చేసుకుని, విప్రో నుంచి స్పష్టమైన వివరణ కోరాలని, ప్రభావిత అభ్యర్థులకు నిర్దిష్ట గడువులో ఆన్బోర్డింగ్ తేదీలు ప్రకటించేలా లేదా రాతపూర్వక నిర్ణయం తెలియజేసేలా ఆదేశించాలని విజ్ఞప్తి చేసింది. అయితే ఈ ఆరోపణలపై స్పందించేందుకు విప్రో యాజమాన్యం ఇప్పటివరకు ముందుకు రాలేదు.
