ఆంధ్రప్రదేశ్ రాష్ట్రాన్ని పారిశ్రామికంగా ప్రపంచ దేశాల సరసన నిలబెట్టేందుకు ఐటీ, విద్యాశాఖ మంత్రి నారా లోకేశ్ స్విట్జర్లాండ్లో సుడిగాలి పర్యటన చేస్తున్నారు. కేవలం ఐటీ రంగమే కాకుండా, రాష్ట్రానికి వెన్నెముకైన వ్యవసాయం, భవిష్యత్తుకు కీలకమైన పర్యావరణ హిత ఇంధన (Green Energy) రంగాలపై ఆయన ప్రత్యేక దృష్టి సారించారు. దావోస్ మరియు జ్యూరిచ్లలో జరిగిన ఈ భేటీల్లో రాష్ట్ర ప్రయోజనాల కోసం ఆయన చేసిన ప్రతిపాదనలు అందరినీ ఆకర్షిస్తున్నాయి.
ముఖ్యంగా ఆహారశుద్ధి (Food Processing) మరియు గ్రీన్ హైడ్రోజన్ రంగాల్లో జరిగిన కీలక చర్చల వివరాలు ఇక్కడ ఉన్నాయి. జ్యురిచ్లో ఫుడ్ ప్రాసెసింగ్ టెక్నాలజీలో గ్లోబల్ లీడర్ అయిన బ్యూలర్ గ్రూప్ (Bühler Group) ప్రతినిధులతో మంత్రి లోకేశ్ సమావేశమయ్యారు. మన రాష్ట్రంలో పండే ఆహార ఉత్పత్తులకు అంతర్జాతీయ స్థాయిలో విలువ పెంచడమే ఈ భేటీ ప్రధాన ఉద్దేశం. "ఆంధ్రప్రదేశ్లో చిరుధాన్యాల (Millets) సాగు ఎక్కువగా ఉంది. వీటిని వాణిజ్య స్థాయిలో ప్రాసెస్ చేసే టెక్నాలజీని రాష్ట్రంలో ప్రవేశపెట్టాలి" అని లోకేశ్ కోరారు.
రాష్ట్రంలోని అగ్రి ఎక్స్పోర్ట్ క్లస్టర్లకు అండగా ఉండేలా 'బ్యూలర్ ఫుడ్స్ & గ్రెయిన్ టెక్నాలజీ అప్లికేషన్ సెంటర్'ను ఏర్పాటు చేయాలని ప్రతిపాదించారు. మేక్-ఇన్-ఏపీలో భాగంగా ఆప్టికల్ మరియు కలర్ సార్టర్ (ధాన్యాలను వేరు చేసే యంత్రాలు) తయారీ యూనిట్ను రాష్ట్రంలో ప్రారంభించాలని విజ్ఞప్తి చేశారు. పర్యావరణ కాలుష్యాన్ని తగ్గించే క్రమంలో గ్రీన్ హైడ్రోజన్ వాడకంపై మంత్రి లోకేశ్ స్పెయిన్కు చెందిన ఎవల్యూషన్ సినర్జెటిక్ ఆటోమోటివ్ (EVO) సంస్థతో చేతులు కలిపేందుకు సిద్ధమయ్యారు.
విశాఖపట్నం, కాకినాడ వంటి పెద్ద పోర్టులలో కాలుష్యం తగ్గించేందుకు హైడ్రోజన్తో నడిచే టెర్మినల్ ట్రాక్టర్ల పైలట్ ప్రాజెక్టును చేపట్టాలని కోరారు. పారిశ్రామిక పార్కుల్లో వినియోగించే ఎలక్ట్రిక్ మరియు హైడ్రోజన్ ఆఫ్-రోడ్ వాహనాల అభివృద్ధికి ఏపీని ఒక కేంద్రాన్ని చేయాలని ఆహ్వానించారు. ఈ ప్రాజెక్టులకు అవసరమైన 'ఇంజనీరింగ్ శాండ్బాక్స్' (పరీక్షా కేంద్రం), అనుమతులు మరియు మౌలిక సదుపాయాలను ప్రభుత్వం వెంటనే కల్పిస్తుందని భరోసా ఇచ్చారు.
పెట్టుబడులతో పాటు యువతకు నైపుణ్యం కూడా ముఖ్యమని లోకేశ్ భావిస్తున్నారు. బ్యూలర్ సంస్థతో జరిపిన చర్చల్లో భాగంగా, ప్రపంచ స్థాయి ప్రమాణాలతో కూడిన ఒక స్కిల్ డెవలప్మెంట్ సెంటర్ను ఏపీలో నెలకొల్పాలని విజ్ఞప్తి చేశారు. దీనివల్ల మన యువతకు నేరుగా అంతర్జాతీయ కంపెనీల్లో ఉద్యోగాలు పొందే అవకాశం లభిస్తుంది.
నారా లోకేశ్ చేస్తున్న ఈ ప్రయత్నాలు సఫలమైతే, ఆంధ్రప్రదేశ్ కేవలం ఐటీ రంగంలోనే కాదు.. పర్యావరణ హిత ఇంధనం మరియు ఆహారశుద్ధి రంగాల్లో కూడా భారతదేశానికి ఒక 'రోల్ మోడల్'గా నిలవనుంది. ముఖ్యంగా రైతులు పండించే పంటలకు విలువ జోడించడం ద్వారా గ్రామీణ ఆర్థిక వ్యవస్థ మరింత బలోపేతం కానుంది.
జ్యూరిచ్లో నారా లోకేశ్ సింపుల్ లుక్..
దావోస్ లో వరనల్డ్ ఎకనామిక్ ఫోరం సదస్సులో పాల్గొని, ఏపీకి వీలైనన్ని పెట్టుబడులు తీసుకురావడమే లక్ష్యంగా సీఎం చంద్రబాబు, మంత్రి నారా లోకేశ్ బృందం స్విట్జర్లాండ్ తరలి వెళ్లిన సంగతి తెలిసిందే. ఇవాళ జ్యూరిచ్ లో ఏపీ టీమ్ విస్తృత సమావేశాలు నిర్వహించింది. ఈ సందర్భంగా మంత్రి నారా లోకేశ్ రొటీన్ కు భిన్నంగా క్యాజువల్ డ్రెస్ లో సింపుల్ గా దర్శనమిచ్చారు. గోధుమ రంగు ఫుల్ హ్యాండ్ టీషర్టు, ప్యాంట్ ధరించి వివిధ కార్యక్రమాలకు హాజరయ్యారు.
కాగా, ఇవాళ దావోస్ పర్యటన ఆరంభంలోనే చంద్రబాబు, మంత్రులు నారా లోకేశ్, టీజీ భరత్ కీలక సమావేశాల్లో పాల్గొన్నారు. స్విట్జర్లాండ్కు భారత రాయబారిగా ఉన్న మృదుల్ కుమార్తో చంద్రబాబు జ్యూరిచ్లో భేటీ అయ్యారు. ఫార్మా, మెడికల్ పరికరాలు, టెక్నాలజీ వంటి రంగాల్లో స్విస్ కంపెనీల నుంచి ఏపీకి పెట్టుబడులను తీసుకురావడంపై చర్చించారు. అనంతరం ఈరోస్ ఇన్నోవేషన్స్ ప్రతినిధులతో సమావేశమై, రాష్ట్రంలో ఆర్టిఫిషియల్ ఇంటెలిజెన్స్ (ఏఐ) ఆధారిత క్రియేటివ్ పరిశ్రమల ఏర్పాటు, ఏఐ ఫిల్మ్ సిటీ వంటి ప్రతిపాదనలపై చర్చలు జరిపారు.
జనవరి 23 వరకు ఈ పర్యటన కొనసాగనుంది. ఈ సందర్భంగా 'బ్రాండ్ ఆంధ్ర'ను ప్రపంచానికి పరిచయం చేస్తూ గ్రీన్ ఎనర్జీ, ఏఐ, ఎలక్ట్రానిక్స్, తయారీ రంగాల్లో పెట్టుబడులను ఆకర్షించడంపై ఏపీ బృందం దృష్టి సారించనుంది. దావోస్ సదస్సులో భాగంగా ఐబీఎం, గూగుల్ క్లౌడ్ వంటి దిగ్గజ సంస్థల సీఈఓలతో సహా మొత్తం 36 సమావేశాల్లో చంద్రబాబు పాల్గొననున్నారు.
