తిరుమల తిరుపతి దేవస్థానం (టిటిడి) పరిధిలోని ఆలయాలు, అనుబంధ సంస్థలను మరింత బలోపేతం చేసేందుకు టిటిడి కీలక నిర్ణయాలు తీసుకుంది. ఇందులో భాగంగా పెద్ద సంఖ్యలో ఉద్యోగాలను భర్తీ చేయాలని టిటిడి నిర్ణయించింది. ఇటీవల నిర్వహించిన ఉన్నతస్థాయి సమీక్ష సమావేశంలో ఈ మేరకు కీలకంగా చర్చించడంతో పాటు, అమలు చర్యలు చేపట్టింది.
స్విమ్స్ ఆసుపత్రిలో నియామకాలు. స్విమ్స్ ఆసుపత్రిలో 128 మంది పారా మెడికల్ సిబ్బంది, అలాగే రిజిస్ట్రార్ స్థాయి అధికారుల నియామకానికి టిటిడి నిర్ణయం తీసుకుంది. గతంలోనూ ఈ విషయమై చర్చలు సాగినప్పటికీ.. తాజా సమీక్షలో త్వరితగతిన నియామక ప్రక్రియ చేపట్టాలని అధికారులూ నిర్ణయించారు.
ఇంజినీరింగ్ విభాగంలో 57 పోస్టులు. ఇక టిటిడి ఇంజినీరింగ్ విభాగంలో 57 ఖాళీలను భర్తీ చేయాలని ఇప్పటికే నిర్ణయించగా, దరఖాస్తు ప్రక్రియ పూర్తయింది. ఈ పోస్టుల కోసం 37,121 మంది అభ్యర్థులు దరఖాస్తు చేసుకున్నట్టు సమాచారం. త్వరలోనే ఈ అభ్యర్థులకు రాతపరీక్షలు నిర్వహించేందుకు టిటిడి ఏర్పాట్లు చేస్తోంది.
మరిన్ని విభాగాల్లో నియామకాలు దేవస్థానంలోని ఇతర కీలక విభాగాల్లోనూ ఖాళీలను శాశ్వత, తాత్కాలిక ప్రాతిపదికన భర్తీ చేయాలని టిటిడి యోచిస్తోంది. ఇందులో భాగంగా హైదరాబాద్కు చెందిన ‘అయస్కి’ అనే సంస్థ టిటిడికి పలు సూచనలు అందించగా, అధికారుల బృందం కూడా తమ సిఫార్సులను సమర్పించింది. వీటి ఆధారంగా టిటిడి కీలక నిర్ణయాలకు శ్రీకారం చుట్టింది.
నిరుద్యోగుల్లో ఆనందం ఈ టిటిడి ప్రకటనతో నిరుద్యోగులు హర్షం వ్యక్తం చేస్తున్నారు. వీలైనంత త్వరగా నియామక ప్రక్రియ పూర్తిచేయాలని టిటిడిని కోరుతున్నారు. ఉద్యోగాల కోసం ఎదురుచూస్తున్న వారికి ఇది సంతోషకరమైన పరిణామంగా నిలిచింది.
