అంతర్జాతీయంగా ఆందోళన దేశవ్యాప్తంగా కలకలం రేపిన “కోల్డిఫ్” కాఫ్ సిరప్ ఘటనపై ఇప్పుడు అమెరికా కూడా స్పందించింది. భారతదేశంలో 22 మంది చిన్నారుల ప్రాణాలను బలిగొన్న ఈ విషపూరిత మందుల వ్యవహారంపై యునైటెడ్ స్టేట్స్ ఫుడ్ అండ్ డ్రగ్ అడ్మినిస్ట్రేషన్ (US FDA) అధికారికంగా విచారణ ప్రారంభించింది. ఈ నేపథ్యంలో సెంట్రల్ డ్రగ్స్ స్టాండర్డ్ కంట్రోల్ ఆర్గనైజేషన్ (CDSCO) నుంచి వివరాలు కోరింది. దీనికి ప్రతిస్పందనగా CDSCO “కోల్డిఫ్” సిరప్ అమెరికా లేదా ఏ ఇతర దేశానికీ ఎగుమతి కాలేదని తెలిపింది.
రాయిటర్స్ నివేదిక ప్రకారం, భారతదేశం నుంచి “కోల్డిఫ్” సిరప్ ఎగుమతికి సంబంధించిన ఎటువంటి రికార్డులు లేవని CDSCO స్పష్టం చేసింది. అయినప్పటికీ, అమెరికా FDA ఈ సంఘటనను అత్యంత ప్రాముఖ్యతతో తీసుకుంటోంది. “ఈ మందులు US మార్కెట్లోకి రాకుండా పూర్తి స్థాయి పర్యవేక్షణలో ఉన్నాం. ఇక్కడికి వచ్చే ప్రతి ఔషధం కఠిన నాణ్యత ప్రమాణాలను అనుసరించాలి. ఎటువంటి మానవ ఆరోగ్యానికి ప్రమాదకరమైన పదార్థాలు ఉండకూడదు” అని FDA ప్రతినిధి పేర్కొన్నట్లు రాయిటర్స్ వెల్లడించింది.
తమిళనాడు కేంద్రంగా ఉన్న “Sresan” ఫార్మా కంపెనీ తయారు చేసిన కోల్డిఫ్ సిరప్లో డైఎథిలిన్ గ్లైకాల్ (DEG) మరియు ఇథిలిన్ గ్లైకాల్ (EG) అనే అత్యంత ప్రమాదకర రసాయనాలు ఉన్నట్లు ల్యాబ్ రిపోర్టులు తేల్చాయి. ఈ పదార్థాలు సాధారణంగా ఇండస్ట్రియల్ యూజ్కే ఉపయోగిస్తారు. అయితే, అవి తాగినప్పుడు మానవ శరీరానికి విషముగా మారి లివర్, కిడ్నీ, నర్వస్ సిస్టమ్ను దెబ్బతీస్తాయి. అదే కారణంగా చిన్నారుల్లో విష ప్రభావం తీవ్రంగా మారి ప్రాణాలు కోల్పోయారు.
ఈ ఘటన తరువాత భారత కేంద్ర ప్రభుత్వం దేశవ్యాప్తంగా ఉన్న ఫార్మా యూనిట్లపై సడన్ ఇన్స్పెక్షన్లు ప్రారంభించింది. రాష్ట్ర స్థాయి డ్రగ్ కంట్రోల్ విభాగాలు కూడా నాణ్యత నియంత్రణ వ్యవస్థను కఠినతరం చేశాయి. ముఖ్యంగా పిల్లలకు ఇచ్చే సిరప్లు, యాంటీబయోటిక్స్, టానిక్లు వంటి ఉత్పత్తులపై ప్రత్యేక దృష్టి పెట్టాలని సూచనలు ఇచ్చారు.
అమెరికా FDA ఇప్పటికే పలు దేశాల్లో భారతీయ సిరప్ల వల్ల జరిగిన మరణాలను గుర్తుచేసింది. గతంలో గాంబియా, ఉజ్బెకిస్తాన్, కెమరూన్ దేశాల్లో కూడా ఇలాంటి సంఘటనలు చోటుచేసుకున్నాయి. ఈ నేపథ్యంలో మళ్లీ భారత సిరప్లపై అంతర్జాతీయ దృష్టి పడింది. “మనం నాణ్యతపై మరింత జాగ్రత్తగా ఉండకపోతే, దేశ ఫార్మా రంగం విశ్వసనీయత కోల్పోతుంది” అని నిపుణులు హెచ్చరిస్తున్నారు.
ఇదిలా ఉండగా, భారత ప్రభుత్వం Sresan Laboratories లైసెన్సును సస్పెండ్ చేయగా, ఫ్యాక్టరీ సీలింగ్ చర్యలు ప్రారంభమయ్యాయి. అదే సమయంలో కంపెనీ డైరెక్టర్లు అండర్గ్రౌండ్ అయ్యారని సమాచారం. సీబీఐ కూడా ఈ ఘటనపై ప్రాథమిక సమాచార సేకరణ ప్రారంభించింది. వైద్య నిపుణులు ప్రజలను అప్రమత్తం చేస్తున్నారు. “బయట లభించే సిరప్ లేదా టానిక్లను పిల్లలకు ఇవ్వకూడదు. ప్రభుత్వంగా అనుమతించబడిన ఫార్మసీల నుంచే మందులు కొనాలి” అని హెచ్చరించారు.
ఇక US FDA, CDSCO మధ్య సమాచార మార్పిడి కొనసాగుతూనే ఉంది. గ్లోబల్ స్థాయిలో భారత ఔషధ నాణ్యతను మెరుగుపర్చేందుకు కఠినమైన రూల్స్ అమల్లోకి రాబోతున్నాయని సమాచారం. ఈ ఘటనతో “మేడ్ ఇన్ ఇండియా” ఫార్మా బ్రాండ్పై మరోసారి ప్రశ్నార్థకం ఏర్పడింది.
