సీనియర్ IAS అహ్మద్బాబుపై ఏపీ హైకోర్టు మండిపాటు..
చట్టం, కోర్టు ఉత్తర్వులపై అహ్మద్బాబుకు గౌరవం లేదు..
అమరావతి: సీనియర్ ఐఏఎస్ అధికారి అహ్మద్బాబు వ్యవహారంపై ఆంధ్రప్రదేశ్ హైకోర్టు తీవ్ర ఆగ్రహం వ్యక్తం చేసింది. రాగద్వేషాలతో వ్యవహరించే వ్యక్తి ఐఏఎస్గా కొనసాగడానికి వీల్లేదని కఠిన వ్యాఖ్యలు చేసింది.
ఈ సందర్భంగా ధర్మాసనం తీవ్ర వ్యాఖ్యలు చేస్తూ, “మాకు అధికారాలు ఉంటే అహ్మద్బాబును వెంటనే సస్పెండ్ చేసేవాళ్లం” అని పేర్కొంది. ఉద్యోగుల పదోన్నతులకు సంబంధించిన ఫైళ్లను ఉద్దేశపూర్వకంగా నిలిపివేయడం, బీపీసీ నిర్వహించిన తర్వాత కూడా ప్రమోషన్లు ఇవ్వకుండా ఫైల్ను తొక్కిపెట్టడం సరైన విధానం కాదని అభిప్రాయపడింది.
ఇది ఉద్యోగులను వేధించడం కాదా? వారి జీవితాలతో ఇలా ఆటలాడటం సమంజసమేనా? అని కోర్టు ప్రశ్నించింది. చట్టం, కోర్టు ఉత్తర్వుల పట్ల అహ్మద్బాబుకు గౌరవం లేదని తీవ్రంగా విమర్శించింది.
అహ్మద్బాబుపై వచ్చిన ఆరోపణలపై సమగ్ర విచారణ జరపాలని కేంద్ర ప్రభుత్వాన్ని కోరుతామని హైకోర్టు తెలిపింది. ఆరోపణలు నిజమని తేలితే ఆయనను డిస్మిస్ చేయాలని కూడా ఆదేశిస్తామని స్పష్టం చేసింది.
ఇక, అహ్మద్బాబు ఇష్టారీతిగా వ్యవహరిస్తున్నా ప్రభుత్వం, ముఖ్య కార్యదర్శి (సీఎస్) ఎందుకు చర్యలు తీసుకోవడం లేదని కోర్టు ప్రశ్నించింది. ఇంతటి ఆరోపణలు ఉన్నప్పటికీ ఆయనను అదే పోస్టులో కొనసాగించడం వెనుక కారణాలు ఏమిటో వివరించాలని కోరింది. ఇటువంటి అధికారులను లూప్లైన్లో పెట్టాల్సిన అవసరం ఉందని కూడా అభిప్రాయపడింది.
పిటిషనర్ చేసిన ఫిర్యాదుపై సీఎస్ ఎలాంటి చర్యలు తీసుకున్నారో తమ ముందుంచాలని అడ్వకేట్ జనరల్ (ఏజీ)కి హైకోర్టు ఆదేశాలు జారీ చేసింది. ఈ కేసు తదుపరి విచారణను రేపటికి వాయిదా వేసింది. ఈ పరిణామాలు రాష్ట్ర పరిపాలనలో చర్చనీయాంశంగా మారాయి.
