రాజకీయ నాయకుడిగా మాత్రమే కాకుండా, మానవతా విలువలకు నిలువెత్తు ఉదాహరణగా నిలిచిన జనసేన పార్టీ అధ్యక్షుడు, ఆంధ్రప్రదేశ్ డిప్యూటీ సీఎం పవన్ కళ్యాణ్ హృదయాన్ని తాకే మాటలు మాట్లాడారు. ఇటీవల జరిగిన రోడ్డు ప్రమాదంలో కృష్ణా జిల్లా చందాల గ్రామానికి చెందిన జనసైనికుడు చందూ వీరవెంకట వసంతరాయలు బ్రెయిన్ డెడ్ అయ్యారు. ఈ విషాదకర ఘటనపై పవన్ తన ప్రగాఢ సానుభూతిని వ్యక్తం చేశారు.
ఇంతటి తీవ్రమైన బాధలోనూ, ఆ కుటుంబ సభ్యులు ఎంతో మానవతా దృక్పథంతో వసంతరాయల అవయవాలను దానం చేయడానికి ముందుకొచ్చారు. ఈ నిర్ణయం వల్ల ఏడుగురి జీవితాల్లో వెలుగులు నిండబోతున్నాయని పవన్ అభిప్రాయపడ్డారు. వారి త్యాగాన్ని ప్రశంసిస్తూ, "వారి సేవా భావానికి నేను సెల్యూట్ చేస్తున్నాను" అని ఆయన ట్విట్టర్ వేదికగా పేర్కొన్నారు.
వసంతరాయల కుటుంబం చూపిన ఉదాత్తతను గుర్తుచేస్తూ, ఇది సమాజానికి ఆదర్శంగా నిలవాలని పవన్ కోరారు. అవయవ దానాన్ని ప్రోత్సహించాల్సిన అవసరం ఎంతో ఉందని, ప్రతి ఒక్కరూ ఇలా ముందుకు రావాలని ఆయన పేర్కొన్నారు. మానవ జీవితాలను రక్షించడంలో ఇలాంటి చర్యలు ఎంతో ప్రాధాన్యత కలిగి ఉంటాయని పవన్ తెలిపారు.
వసంతరాయలు మరణించినా, ఆయన అవయవాలద్వారా మరో ఏడుగురు జీవితాలను ఆదుకుంటుండటం నిజంగా మానవతా మార్గంలో గొప్ప ఉదాహరణగా నిలిచిందని ప్రతి ఒక్కరూ భావిస్తున్నారు.
