ఏపీ, తెలంగాణ ప్రజలు కొద్దిరోజులుగా మారుతున్న వాతావరణంతో అయోమయంలో ఉన్నారు. ఒకవైపు చలి తీవ్రత, మరోవైపు వర్ష సూచనలు కనిపిస్తుండటంతో రానున్న రోజుల్లో వాతావరణం ఎలా ఉండబోతోందన్న ఆసక్తి అందరిలోనూ నెలకొంది. ఈ నేపథ్యంలో వాతావరణ శాఖ తాజా అంచనాలను వెల్లడించింది. వాటి ప్రకారం ప్రస్తుతం రెండు తెలుగు రాష్ట్రాల్లో వాతావరణంలో క్రమంగా మార్పులు చోటుచేసుకోనున్నాయి.
తెలంగాణ విషయానికి వస్తే, రాబోయే రెండు రోజుల్లో రాష్ట్రంలో పొడి వాతావరణం కొనసాగుతుందని వాతావరణ శాఖ తెలిపింది. ఇటీవల ఉదయం, రాత్రి వేళల్లో తీవ్రంగా ఉన్న చలి క్రమంగా తగ్గుముఖం పట్టుతున్నట్లు అధికారులు పేర్కొన్నారు. చాలా జిల్లాల్లో ఉష్ణోగ్రతలు డబుల్ డిజిట్కు చేరుకోవడం గమనార్హం. రాబోయే 24 గంటల్లో రాష్ట్రంలో గరిష్ట ఉష్ణోగ్రత సుమారు 28 డిగ్రీల సెల్సియస్ వరకు నమోదయ్యే అవకాశం ఉందని, కనిష్ట ఉష్ణోగ్రతలు 15 డిగ్రీల పరిధిలో ఉండవచ్చని అంచనా వేశారు. కొన్ని ప్రాంతాల్లో ఆకాశం పాక్షికంగా మేఘావృతమై ఉండే సూచనలు ఉన్నాయని తెలిపారు.
ముఖ్యంగా ఉదయం వేళల్లో, అలాగే రాత్రి సమయంలో పొగమంచు ఎక్కువగా ఉండే అవకాశం ఉందని వాతావరణ శాఖ హెచ్చరించింది. ఈ నేపథ్యంలో వాహనదారులు, ప్రయాణికులు అప్రమత్తంగా ఉండాలని సూచనలు జారీ చేసింది. ఆదిలాబాద్, కొమరం భీం ఆసిఫాబాద్, మంచిర్యాల, నిర్మల్, మెదక్, సంగారెడ్డి, కామారెడ్డి జిల్లాలకు ఎల్లో అలర్ట్ జారీ చేసినట్లు అధికారులు వెల్లడించారు. ఈ జిల్లాల్లో చలి, పొగమంచు కారణంగా సాధారణ జీవనంపై కొంత ప్రభావం పడే అవకాశం ఉందని తెలిపారు. కొన్ని ప్రాంతాల్లో కనిష్ట ఉష్ణోగ్రతలు గణనీయంగా తగ్గినట్లు కూడా నమోదైంది. భద్రాచలంలో 18 డిగ్రీల సమీపంలో ఉష్ణోగ్రత ఉండగా, పటాన్చెరువు పరిసరాల్లో 12 డిగ్రీల వరకు పడిపోయినట్లు అధికారులు పేర్కొన్నారు.
ఇక ఆంధ్రప్రదేశ్ విషయానికి వస్తే, దిగువ ట్రోపో ఆవరణంలో గాలుల దిశ మారుతున్నట్లు వాతావరణ శాఖ తెలిపింది. కోస్తాంధ్ర, యానాం, రాయలసీమ ప్రాంతాల్లో ఈశాన్య, తూర్పు దిశగా గాలులు వీస్తున్నాయని వెల్లడించింది. రానున్న రెండు నుంచి మూడు రోజుల పాటు ఉత్తర కోస్తా ఆంధ్రప్రదేశ్, దక్షిణ కోస్తా ప్రాంతాలు, రాయలసీమలో ప్రధానంగా పొడి వాతావరణమే కొనసాగుతుందని అంచనా వేసింది. అయితే కొన్ని ప్రాంతాల్లో పొగమంచు కురిసే అవకాశాలు ఉన్నాయని పేర్కొంది.
దక్షిణ, ఆగ్నేయ బంగాళాఖాతంలో ఇటీవల ఏర్పడిన అల్పపీడనం క్రమంగా బలహీనపడే సూచనలు ఉన్నాయని వాతావరణ శాఖ వెల్లడించింది. అయితే దీని ప్రభావంతో జనవరి 9వ తేదీ నుంచి దక్షిణ కోస్తా ఆంధ్రప్రదేశ్, రాయలసీమ జిల్లాల్లో అక్కడక్కడ వర్షాలు కురిసే అవకాశం ఉందని తెలిపింది. మరోవైపు కోస్తా జిల్లాల్లో రాత్రి వేళల్లో దట్టమైన మంచు కురుస్తుండటంతో ప్రజలు ఇబ్బందులు ఎదుర్కొంటున్నారు. రానున్న నాలుగు రోజుల పాటు అల్లూరి సీతారామరాజు జిల్లా నుంచి పశ్చిమ గోదావరి, ప్రకాశం జిల్లా వరకు కొన్ని ప్రాంతాల్లో దట్టంగా, మిగిలిన ప్రాంతాల్లో మోస్తరుగా పొగమంచు ఉండే అవకాశం ఉందని అధికారులు స్పష్టం చేశారు.
ఇటీవల నమోదైన ఉష్ణోగ్రతలను పరిశీలిస్తే నెల్లూరులో సుమారు 21 డిగ్రీలు, విజయనగరం పరిసరాల్లో 15 డిగ్రీల వరకు కనిష్ట ఉష్ణోగ్రతలు నమోదయ్యాయి. ప్రస్తుతం రెండు తెలుగు రాష్ట్రాల్లో చలి తీవ్రత క్రమంగా తగ్గుతున్నప్పటికీ, ఉదయం, రాత్రి వేళల్లో పొగమంచు కారణంగా జాగ్రత్తలు అవసరమని వాతావరణ శాఖ సూచిస్తుంది.
