ఆంటీ ఒఫీలియా మిస్టరీతో కొత్త కథ! వెడ్నెస్‌డే సీజన్ 3 రిలీజ్ ఎప్పుడు?

వెడ్నెస్‌డే సీజన్ 3లోకి ఎవా గ్రీన్.. ఆంటీ ఒఫీలియాగా కొత్త అవతారం..

వెడ్నెస్‌డే సీజన్ 3లో టైలర్ రీఎంట్రీ? జెన్నా ఒర్టేగాతో పాటు కొత్త నటీనటులు..

నెట్‌ఫ్లిక్స్‌లో ప్రపంచవ్యాప్తంగా భారీ ఆదరణ పొందిన సిరీస్‌లలో ‘వెడ్నెస్‌డే’ ఒకటి. జెన్నా ఒర్టేగా ప్రధాన పాత్రలో నటించిన ఈ సిరీస్.. మిస్టరీ, డార్క్ కామెడీ, సూపర్‌నేచురల్ అంశాలను కలిపి ప్రేక్షకులను ఆకట్టుకుంది. నెవర్‌మోర్ అకాడమీలో చదువుతున్న వెడ్నెస్‌డే ఆడమ్స్ చుట్టూ జరిగే సంఘటనలు, రహస్యాలు, సంబంధాలు, ప్రమాదాలే కథకు ప్రధాన ఆకర్షణ.

తాజాగా ‘వెడ్నెస్‌డే’ సీజన్ 3పై ఆసక్తి పెరుగుతోంది. కొత్త సీజన్‌కు సంబంధించిన కొన్ని కీలక వివరాలు ఇప్పటికే వెల్లడయ్యాయి.

2027లో ‘వెడ్నెస్‌డే’ సీజన్ 3?

‘వెడ్నెస్‌డే’ సీజన్ 3 విడుదల తేదీని నెట్‌ఫ్లిక్స్ ఇప్పటివరకు అధికారికంగా ప్రకటించలేదు. అయితే అందుబాటులో ఉన్న నివేదికల ప్రకారం.. 2027 వేసవిలో కొత్త సీజన్ స్ట్రీమింగ్‌కు వచ్చే అవకాశం ఉన్నట్లు తెలుస్తోంది. గత సీజన్ల మాదిరిగానే సీజన్ 3 కూడా నెట్‌ఫ్లిక్స్‌లోనే ప్రత్యేకంగా అందుబాటులోకి రానుంది.

మొదటి రెండు సీజన్లలో నెవర్‌మోర్ అకాడమీలో వెడ్నెస్‌డేకు ఏర్పడిన స్నేహాలు, సహచరులతో సంబంధాలు, ఆమె ఎదుర్కొన్న రహస్యాలు, ప్రమాదాలు కథను ముందుకు నడిపించాయి. ఇప్పుడు మూడో సీజన్‌లో కథ మరింత ఆసక్తికరమైన మలుపులు తీసుకునే అవకాశం కనిపిస్తోంది.

ఆంటీ ఒఫీలియా రహస్యం కీలకం?

సీజన్ 3 కథలో ఆంటీ ఒఫీలియా అదృశ్యం ప్రధాన అంశంగా మారే అవకాశం ఉంది. ఇప్పటివరకు పూర్తిగా వెల్లడికాని ఈ రహస్యం చుట్టూ కొత్త కథనం సాగుతుందని తెలుస్తోంది. ముఖ్యంగా ఆంటీ ఒఫీలియా పాత్రను ప్రముఖ నటి ఇవా గ్రీన్ పోషించనుండటం కొత్త సీజన్‌పై ఆసక్తిని మరింత పెంచుతోంది.

ఈనిడ్‌పై మరింత ఫోకస్

వెడ్నెస్‌డేకు అత్యంత ముఖ్యమైన స్నేహితురాలిగా మారిన ఈనిడ్ సింక్లెయిర్ పాత్రకు సీజన్ 3లో మరింత ప్రాధాన్యం లభించే అవకాశం ఉంది. ఈ పాత్రను ఎమ్మా మైయర్స్ పోషిస్తున్నారు.

వెడ్నెస్‌డే, ఈనిడ్‌ల మధ్య స్నేహం ఇప్పటికే సిరీస్‌లో కీలక అంశంగా నిలిచింది. కొత్త సీజన్‌లో వీరి సంబంధం కథలో మరింత ముఖ్యమైన భాగంగా మారుతుందని భావిస్తున్నారు.

టైలర్ గాల్పిన్ తిరిగి వస్తాడా?

టైలర్ గాల్పిన్ పాత్ర కూడా సీజన్ 3లో తిరిగి కనిపించే అవకాశం ఉంది. ఈ పాత్రలో నటించిన హంటర్ డూహాన్ తిరిగి నటిస్తారా అనే విషయంలో మాత్రం ఇంకా పూర్తి స్థాయి అధికారిక నిర్ధారణ లేదు. అందువల్ల టైలర్ పాత్ర కథలో ఎలాంటి మలుపు తీసుకురానుందనే విషయం ప్రస్తుతం ఆసక్తికరంగా మారింది.

జెన్నా ఒర్టేగా మళ్లీ వెడ్నెస్‌డేగా..

సీజన్ 3లో జెన్నా ఒర్టేగా మరోసారి వెడ్నెస్‌డే ఆడమ్స్‌గా కనిపించనున్నారు. ఆమెతో పాటు క్యాథరిన్ జీటా-జోన్స్ మోర్టీషియా ఆడమ్స్ పాత్రలో తిరిగి రానున్నారు. గోమెజ్ ఆడమ్స్ పాత్రలో లూయిస్ గుజ్‌మాన్ కూడా తిరిగి వచ్చే అవకాశం ఉంది.

ఇక కొత్త సీజన్ కోసం నెట్‌ఫ్లిక్స్ నటీనటుల జాబితాను మరింత విస్తరించింది. లీనా హెడీ, ఆండ్రూ మెకార్తీ, జేమ్స్ లాన్స్, వినోనా రైడర్, క్రిస్ సరండన్, నోహ్ టేలర్, ఆస్కార్ మోర్గాన్, కెన్నెడీ మోయర్ వంటి నటులు సీజన్ 3లో చేరారు. వీరిలో ఎవా గ్రీన్ పోషించనున్న ఆంటీ ఒఫీలియా పాత్ర ప్రత్యేక ఆకర్షణగా నిలిచే అవకాశం ఉంది.

‘బెస్ట్ సీజన్’గా తీర్చిదిద్దడమే లక్ష్యం

సీజన్ 3పై సిరీస్ సహ-సృష్టికర్త ఆల్ఫ్రెడ్ గోఫ్ కూడా ఆసక్తికరమైన వ్యాఖ్యలు చేశారు. ప్రతి సీజన్‌ను సాధ్యమైనంత ఉత్తమంగా రూపొందించడమే తమ లక్ష్యమని ఆయన పేర్కొన్నారు.

అయితే సీజన్ 3కు సంబంధించి అధికారిక విడుదల తేదీ మాత్రం ఇంకా ప్రకటించలేదు. కాబట్టి 2027 వేసవిలో విడుదల కావచ్చనే సమాచారం ప్రస్తుతం అంచనా మాత్రమే. అధికారిక తేదీని నెట్‌ఫ్లిక్స్ ప్రకటించిన తర్వాతే విడుదలపై స్పష్టత రానుంది.

మొత్తంగా చూస్తే.. ఆంటీ ఒఫీలియా రహస్యం, ఈనిడ్-వెడ్నెస్‌డే స్నేహం, కొత్త నటీనటుల చేరికతో ‘వెడ్నెస్‌డే’ సీజన్ 3పై అంచనాలు పెరుగుతున్నాయి.