Band Melam movie Update: మెగాస్టార్ చేతుల మీదుగా ‘బ్యాండ్ మేళం’ ట్రైలర్ లాంచ్.. మార్చి 26న థియేటర్లలో సందడి!
Band Melam Trailer: మెగాస్టార్ చిరంజీవి విడుదల చేసిన ‘బ్యాండ్ మేళం’ మూవీ ట్రైలర్ విశేషాలు..హర్ష్ రోషన్, శ్రీదేవి అపల్ల జంటగా సతీష్ జవ్వాజి దర్శకత్వంలో తెరకెక్కిన ఈ పల్లెటూరి ప్రేమకథ మార్చి 26న ప్రపంచవ్యాప్తంగా విడుదల కానుంది.
Band Melam Trailer: గ్రామీణ నేపథ్యంలో సాగే స్వచ్ఛమైన ప్రేమకథలకు తెలుగు ప్రేక్షకులు ఎప్పుడూ బ్రహ్మరథం పడతారు. గతంలో ‘కోర్టు’ అనే సినిమాతో అందరి దృష్టిని ఆకర్షించిన యువ జంట హర్ష్ రోషన్ శ్రీదేవి అపల్ల ఇప్పుడు ‘బ్యాండ్ మేళం’ అనే చిత్రంతో మరోసారి మన ముందుకు వస్తున్నారు. తాజాగా ఈ సినిమాకు సంబంధించిన ట్రైలర్ను మెగాస్టార్ చిరంజీవి విడుదల చేసి, చిత్ర యూనిట్ను అభినందించారు. మెగాస్టార్ మద్దతు లభించడంతో ఈ చిన్న సినిమాపై ఒక్కసారిగా అంచనాలు పెరిగిపోయాయి.
ట్రైలర్ చూస్తుంటే, ఇది పక్కా పల్లెటూరి వాతావరణంలో సాగే వినోదాత్మక ప్రేమకథ అని అర్థమవుతోంది. చిన్నప్పటి నుంచి కలిసి పెరిగిన బావమరదళ్లు గిరి (హర్ష్ రోషన్), రాజి (శ్రీదేవి)ల మధ్య కెమిస్ట్రీ చాలా సహజంగా ఉంది. వారి మధ్య ఉండే అల్లరి, ప్రేమ, ఆ తర్వాత వచ్చే చిన్నపాటి అపార్థాలు, వాటి వల్ల కలిగే దూరం వంటి అంశాలను దర్శకుడు సతీష్ జవ్వాజి చాలా హృద్యంగా తెరకెక్కించినట్లు కనిపిస్తోంది. ముఖ్యంగా పల్లెటూరి అందాలను, అక్కడి మనుషుల భావోద్వేగాలను కెమెరాలో చాలా చక్కగా బంధించారు.
ఈ సినిమాకు మరో ప్రధాన బలం సంగీతం. ‘బేబి’ సినిమాతో మ్యూజికల్ సెన్సేషన్ సృష్టించిన విజయ్ బుల్గానిన్ ఈ చిత్రానికి స్వరాలు అందించారు. ఇప్పటికే విడుదలైన పాటలు ప్రేక్షకులను ఆకట్టుకుంటున్నాయి. ప్రముఖ నిర్మాత కోన వెంకట్ ఈ చిత్రాన్ని సమర్పించడం, సీనియర్ నటుడు సాయి కుమార్ ఒక కీలక పాత్రలో నటించడం సినిమాకు మరింత బలాన్ని చేకూర్చాయి. గ్రామీణ కథలకు కోన వెంకట్ మార్క్ వినోదం తోడైతే ఫలితం ఎలా ఉంటుందో ప్రత్యేకంగా చెప్పక్కర్లేదు.
నిజానికి ఈ సినిమాను మార్చి 13నే విడుదల చేయాలని మేకర్స్ భావించారు. అయితే, పవర్ స్టార్ పవన్ కళ్యాణ్ నటించిన ‘ఉస్తాద్ భగత్ సింగ్’ అదే సమయంలో థియేటర్లలోకి వస్తుండటంతో, థియేటర్ల సర్దుబాటు పెద్ద సినిమాతో పోటీ పడటం ఇబ్బంది అవుతుందని భావించి వాయిదా వేశారు. ప్రస్తుత సమయాన్ని సినిమా ప్రమోషన్ల కోసం చిత్ర బృందం సమర్థవంతంగా వాడుకుంది. ప్రస్తుతం సోషల్ మీడియాలో కూడా ‘బ్యాండ్ మేళం’ గురించి మంచి చర్చ నడుస్తోంది.
అన్ని కార్యక్రమాలు పూర్తి చేసుకున్న ఈ చిత్రం మార్చి 26న ప్రపంచవ్యాప్తంగా విడుదల కానుంది. సమ్మర్ సీజన్ ప్రారంభం అవుతున్న తరుణంలో, ఇలాంటి ఒక మ్యూజికల్ రొమాంటిక్ ఎంటర్టైనర్ ప్రేక్షకులను థియేటర్లకు రప్పిస్తుందని ట్రేడ్ వర్గాలు ఆశిస్తున్నాయి. హర్ష్ రోషన్, శ్రీదేవి జంట మరోసారి హిట్ కొట్టి ఇండస్ట్రీలో నిలదొక్కుకుంటారో లేదో తెలియాలంటే మరికొద్ది రోజులు ఆగాల్సిందే.
Be the first to react
