Drishyam 3: ‘దృశ్యం 3’ మూవీ రివ్యూ: జార్జికుట్టి మైండ్ గేమ్స్ పర్వాలేదనిపించినా.. మొదటి రెండు భాగాల రేంజ్ అయితే లేదు!

• ఆకట్టుకున్న సతీష్ కురూప్ విజువల్స్.. ‘దృశ్యం 3’ సన్నివేశాలకు ప్రాణం పోసిన అనిల్ జాన్సన్ బ్యాక్‌గ్రౌండ్ స్కోర్!
   
• Cinema: ఫస్టాఫ్‌లో పస తగ్గింది.. క్లైమాక్స్‌లో ట్విస్టుల డోస్ పెరిగింది: ‘దృశ్యం 3’ ఓవరాల్ టాక్!

Drishyam 3: భారతీయ చలనచిత్ర రంగంలో సరికొత్త థ్రిల్లర్ ట్రెండ్‌కు తెరలేపిన మోహన్ లాల్ - జీతూ జోసెఫ్ కాంబినేషన్ అనగానే మనకు 'దృశ్యం', 'దృశ్యం 2' సినిమాలు గుర్తుకొస్తాయి. మలయాళంలో మాతృకగా విడుదలై బాక్సాఫీస్ వద్ద చారిత్రాత్మక విజయాలను నమోదు చేసిన ఈ చిత్రాలు, కథాకథనాల పరంగా ప్రేక్షకులను సీట్ల అంచులపై కూర్చోబెట్టాయి. ఆ అద్భుతమైన ఫ్రాంచైజీకి కొనసాగింపుగా, గతంలో జరిగిన కథ ఆధారంగా రూపుదిద్దుకున్న మోహన్ లాల్ మోస్ట్ అవేటెడ్ మూవీ 'దృశ్యం 3' నేడు (మే 21వ తేదీన) థియేటర్లలోకి వచ్చింది. అయితే, ఈసారి ఈ చిత్రాన్ని తెలుగులో రీమేక్ చేయకుండా, మోహన్ లాల్ నటించిన మలయాళ మూలాన్నే నేరుగా తెలుగు డబ్బింగ్ (అనువాదం) రూపంలో థియేటర్లలోకి వదలడం విశేషం.

ఈ మూడో భాగం కథలోకి వెళితే.. గతంలో జరిగిన ఘోరమైన సంఘటనలు మరియు గాయాల నుంచి బయటపడటానికి జార్జ్ (మోహన్ లాల్), ఆయన భార్య రాణి (మీనా), కూతుళ్లు అంజూ - అనూ నిరంతరం ప్రయత్నిస్తూ ఉంటారు. భవిష్యత్తులో తమ కుటుంబానికి మళ్లీ ఎలాంటి ఆపద రాకూడదనే ఉద్దేశంతో, పెద్ద కూతురు అంజూకు సాధ్యమైనంత త్వరగా పెళ్లి చేసి విదేశాలకు పంపించాలని, అలాగే చిన్న కూతురు అనూని కూడా పైచదువుల కోసం ఫారిన్ పంపాలని జార్జ్ గట్టిగా నిర్ణయించుకుంటాడు. అయితే, వరుణ్ అనే కుర్రాడిని అంజూనే చంపేసిందనే పాత వార్త సమాజంలో మళ్లీ గుప్పుమనడం, ఆమె మానసిక స్థితి సరిగ్గా లేదనే ప్రచారం కారణంగా వస్తున్న సంబంధాలన్నీ వెనక్కిపోతుంటాయి. తమకు తెలియకుండా తెరవెనుక ఉండి ఈ దుష్ప్రచారాన్ని నడిపిస్తున్నది ఎవరనేది అర్థం కాక జార్జ్ దంపతులు తీవ్ర ఆందోళనలో పడిపోతారు.

మరోవైపు, గతంలో జార్జ్ కుటుంబాన్ని కేసులో ఇరికించాలని చూసి ఉద్యోగాన్ని కోల్పోయిన మాజీ కానిస్టేబుల్ సహదేవ్, ప్రస్తుతం రియల్ ఎస్టేట్ వ్యాపారం చేస్తూనే జార్జ్ కుటుంబంపై పగతో రగిలిపోతుంటాడు. వరుణ్ శవాన్ని జార్జ్ ఎక్కడ దాచాడనే ఆధారాలను ఎలాగైనా కనుగొని, ఆ కుటుంబాన్ని జైలుకు పంపాలనే కసితో పావులు కదుపుతుంటాడు. వీరికి తోడు జార్జ్ కారణంగానే సస్పెండ్ అయిన పోలీస్ ఆఫీసర్ రాజన్ ఫ్యామిలీ, అలాగే కొడుకును కోల్పోయి నేటికీ కన్నీరుమున్నీరవుతున్న గీత - ప్రభాకర్ దంపతులు కూడా జార్జ్ కూతురి పెళ్లిని ఎలాగైనా ఆపాలని, ప్రతీకారం తీర్చుకోవాలని సమయం కోసం ఎదురుచూస్తుంటారు. ఇలా పాత శత్రువులంతా ఏకమై విసిరిన వ్యూహాత్మక ప్రతీకార వలలో జార్జ్ చిక్కుకున్నాడా, లేదా అనే అంశం చుట్టూనే మిగతా కథంతా ఆసక్తికరంగా తిరుగుతుంది.

సాధారణంగా ఒక మధ్యతరగతి తండ్రికి ఆర్థిక లేదా ఆరోగ్య సమస్యలు ఎన్ని ఉన్నా తట్టుకుని కూతురి పెళ్లి చేయగలడు కానీ, ఆడపిల్ల పరువును బజారున పడేసే శత్రువుల నుంచి కాపాడుకోవడం అంత తేలిక కాదు. ఈ చిత్రంలో కూడా హత్యా నేరం అనే ముద్ర పడిన ఒక కుటుంబం, తమ కూతురి పెళ్లిని జరిపించడానికి పడే తాపత్రయం, సమాజం నుంచి ఎదురయ్యే అవమానాలను అధిగమించే పోరాటం స్పష్టంగా కనిపిస్తుంది. ప్రథమార్థం (ఫస్టాఫ్) అంతా జార్జ్ తన కూతురి పెళ్లి ప్రయత్నాలు చేయడం, తన చుట్టూ ఏదో కుట్ర జరుగుతోందని హీరో అనుమానించే సన్నివేశాలతో చాలా నిదానంగా సాగుతుంది. ఇక ద్వితీయార్థం (సెకండాఫ్) లో శత్రువులంతా కలిసి హీరో చుట్టూ ఉచ్చు బిగించడం, ఆ ముప్పు నుంచి తప్పించుకోవడానికి జార్జ్ పడే మైండ్ గేమ్ క్లైమాక్స్ వైపు పరిగెడుతుంది.

అయితే, మొదటి రెండు భాగాలు మొదటి నిమిషం నుంచి చివరి వరకు ప్రేక్షకుడిని ఊపిరి సలపనివ్వకుండా సాగితే, ఈ మూడో భాగంలో ఆ మ్యాజిక్ కొద్దిగా లోపించిందని చెప్పాలి. దర్శకుడు జీతూ జోసెఫ్ ఫస్టాఫ్‌ను ఎలాంటి బలమైన కంటెంట్ లేకుండా చాలా సాగదీయడం సినిమాకు మైనస్‌గా మారింది. ఇంటర్వెల్ బ్యాంగ్ తర్వాత నుంచే అసలైన కథ మొదలవుతుంది. సెకండాఫ్ పర్వాలేదనిపించినప్పటికీ, మొదటి రెండు సినిమాల స్థాయిలో మెదడుకు మేత పెట్టే ట్విస్టులు ఇందులో ఆశించిన స్థాయిలో లేవు. ప్రీ-క్లైమాక్స్, క్లైమాక్స్ సన్నివేశాలలో వచ్చే కొన్ని మలుపులు ప్రేక్షకుడికి కాస్త ఊరటనిస్తాయి. సాంకేతికంగా సతీశ్ కురుప్ ఫోటోగ్రఫీ కొన్ని విజువల్స్‌తో ఆకట్టుకోగా, అనిల్ జాన్సన్ బ్యాక్‌గ్రౌండ్ స్కోర్ థ్రిల్ ఎలిమెంట్స్‌కు బలాన్నిచ్చింది. నటీనటులంతా తమ పాత్రల్లో సహజంగా ఒదిగిపోయినప్పటికీ, పేలవమైన డైలాగులు, నిస్సారమైన ఫస్టాఫ్ మరియు అసంతృప్తికరమైన తెలుగు డబ్బింగ్ కారణంగా 'దృశ్యం 3' మునుపటి క్లాసిక్ సినిమాల స్థాయిని అందుకోలేకపోయిందనేది సినీ విశ్లేషకుల అభిప్రాయం.

Movie Details

Movie Name: Drishyam 3

Release Date: 2026-05-21

Cast: Mohanlal,Meena,Ansiba Hassan,Esther Anil,Asha Sharath, Siddique

Director: Jeethu Joseph

Music: Anil Johnson

Banner: Aashirvad Cinemas

Review By: Peddinti

Drishyam 3 Rating: 2.50 out of 5