రిజర్వ్ బ్యాంక్ ఆఫ్ ఇండియా (RBI) 2026 సంవత్సరానికి సంబంధించిన సమ్మర్ ఇంటర్న్షిప్ ప్రోగ్రామ్ కోసం అధికారిక నోటిఫికేషన్ విడుదల చేసింది. దేశంలోని ప్రముఖ విద్యాసంస్థల్లో చదువుతున్న పోస్ట్ గ్రాడ్యుయేట్ విద్యార్థులు, మేనేజ్మెంట్, స్టాటిస్టిక్స్, లా, కామర్స్, ఎకనామిక్స్, ఎకనామెట్రిక్స్, బ్యాంకింగ్, ఫైనాన్స్ వంటి విభాగాల్లో చదువుతున్న వారు ఈ ఇంటర్న్షిప్కు దరఖాస్తు చేసుకోవచ్చు. అంతేకాకుండా ఇంటిగ్రేటెడ్ ఐదేళ్ల కోర్సులు పూర్తి చేస్తున్న విద్యార్థులు, అలాగే దేశవ్యాప్తంగా గుర్తింపు పొందిన కళాశాలల నుంచి మూడేళ్ల పూర్తి సమయం ప్రొఫెషనల్ లా డిగ్రీ పూర్తి చేసిన వారు లేదా ప్రస్తుతం చివరి సంవత్సరంలో ఉన్న విద్యార్థులు కూడా అర్హులుగా ఆర్బీఐ ప్రకటించింది.
ఈ సమ్మర్ ఇంటర్న్షిప్కు సంబంధించిన ఆన్లైన్ దరఖాస్తు ప్రక్రియ అక్టోబర్ 15న ప్రారంభమై, డిసెంబర్ 15తో ముగియనుంది. ఇప్పటి వరకు దరఖాస్తు చేసుకోని అర్హత గల అభ్యర్థులు చివరి తేదీ లోపు తప్పక అప్లై చేయాలని ఆర్బీఐ సూచించింది. ఏటా వేలాది మంది విద్యార్థులు ఈ ఇంటర్న్షిప్కు దరఖాస్తు చేసుకుంటుండగా, ఎంపిక ప్రక్రియ మాత్రం కఠినంగా ఉంటుందని అధికారులు పేర్కొన్నారు. అందువల్ల అర్హులైన విద్యార్థులు సమయానికి దరఖాస్తు చేయడం చాలా కీలకమని తెలిపారు.
ఆర్బీఐ సమ్మర్ ఇంటర్న్షిప్ ప్రోగ్రామ్ 2026 ఏప్రిల్ నుంచి జులై వరకు మొత్తం మూడు నెలల పాటు నిర్వహించనున్నారు. ఈ ప్రోగ్రామ్కు సంబంధించిన ఇంటర్వ్యూలను జనవరి నుంచి ఫిబ్రవరి మధ్యలో నిర్వహించనున్నారు. ఎంపికైన అభ్యర్థులకు నెలకు రూ.20,000 స్టైపెండ్ అందించనున్నారు. ప్రతి ఏడాది గరిష్ఠంగా 125 మంది విద్యార్థులను మాత్రమే ఈ ఇంటర్న్షిప్కు ఎంపిక చేస్తారు. 2026 ఇంటర్న్షిప్కు ఎంపికైన విద్యార్థుల పేర్లను ఫిబ్రవరి లేదా మార్చి నెలలో ప్రకటించనున్నారు.
రిజర్వ్ బ్యాంక్ ఆఫ్ ఇండియా సమ్మర్ ఇంటర్న్షిప్ ప్రోగ్రామ్ ఎకనామిక్స్, బ్యాంకింగ్, మానిటరీ పాలసీ, ఫైనాన్షియల్ స్టాబిలిటీ, దేశ ఆర్థిక వ్యవస్థకు సంబంధించిన పరిశోధన రంగాల్లో ఆసక్తి ఉన్న విద్యార్థులకు ఎంతో ఉపయోగకరంగా ఉంటుంది. ఈ ప్రోగ్రామ్ ద్వారా ఆర్బీఐ పనితీరును లోతుగా తెలుసుకోవచ్చు. నిపుణుల పర్యవేక్షణలో కీలక ప్రాజెక్టుల్లో పని చేసే అవకాశం లభిస్తుంది. ముఖ్యంగా పోస్ట్ గ్రాడ్యుయేషన్ విద్యార్థులకు ఈ ఇంటర్న్షిప్ అకడమిక్ జ్ఞానాన్ని వాస్తవ ప్రపంచ ఆర్థిక సవాళ్లకు అన్వయించుకునే అవకాశం కల్పిస్తుంది. భవిష్యత్తులో బ్యాంకింగ్, పాలసీ మేకింగ్, పరిశోధన రంగాల్లో కెరీర్ ఆశించే వారికి ఈ ప్రోగ్రామ్ ఒక గొప్ప అవకాశంగా నిలుస్తోంది.
