ఆంధ్రప్రదేశ్ ప్రభుత్వం పదో తరగతి పరీక్షల షెడ్యూల్‌ను ఖరారు చేసింది. ఇప్పటికే పరీక్షా ఫీజు వివరాలు, తేదీలను ప్రకటించింది. ఈ సారి పరీక్షలు రాసే విద్యార్థుల కోసం ప్రభుత్వం కొత్త చర్యలు చేపట్టింది. ముఖ్యంగా పరీక్షా కేంద్రాల ఏర్పాటు విషయంలో విద్యార్థులకు ఎలాంటి అసౌకర్యం కలగకుండా చర్యలు తీసుకుంటోంది. ప్రతి జిల్లాలో ఫలితాల్లో వెనుకబడిన 100 పాఠశాలలను గుర్తించి, వాటి విద్యా ప్రమాణాలను మెరుగుపరచడానికి ప్రత్యేక ప్రణాళికలు సిద్ధం చేశారు. అలాగే, ప్రతి విద్యార్థికి తప్పనిసరిగా ఒక అపార్‌ ఐడీ ఉండాలని ప్రభుత్వం స్పష్టం చేసింది.
ఏపీలో పదో తరగతి పబ్లిక్‌ పరీక్షలు మార్చి 16 నుంచి ప్రారంభమై ఏప్రిల్ 1 వరకు జరగనున్నాయి. పాఠశాల విద్యాశాఖ ఈ షెడ్యూల్‌ను ప్రభుత్వం ఆమోదానికి పంపింది. ఈ సంవత్సరం హాల్‌టికెట్ల వెనుక భాగంలో పరీక్ష కేంద్రానికి సంబంధించిన రూట్‌ మ్యాప్‌ను ముద్రించనున్నారు. విద్యార్థులు క్యూఆర్‌ కోడ్‌ను స్కాన్‌ చేస్తే పరీక్షా కేంద్రానికి చేరుకునే మార్గం మ్యాప్‌లో కనిపిస్తుంది. దీని ద్వారా విద్యార్థులు పరీక్ష కేంద్రాల వివరాలు, చిరునామా విషయంలో ఎలాంటి సందేహాలు లేకుండా సులభంగా చేరుకోగలరు.
పరీక్షల నిర్వహణలో కూడా ప్రభుత్వం ఆధునిక సాంకేతికతను ఉపయోగిస్తోంది. చీఫ్‌ సూపరింటెండెంట్‌లు, ఇన్విజిలేటర్లను ఆన్‌లైన్‌ విధానం ద్వారా ఎంపిక చేయనున్నారు. దీంతో పారదర్శకతతో పాటు సమర్థత కూడా పెరుగుతుందని అధికారులు భావిస్తున్నారు. పరీక్షా కేంద్రాల్లో సీసీ కెమెరాలు ఏర్పాటు చేసి పరీక్షల పర్యవేక్షణను కఠినతరం చేయాలనే ఆలోచనలో ఉన్నారు.
పదో తరగతి పరీక్షలకు హాజరయ్యే విద్యార్థులు ఫీజు చెల్లింపుకు సంబంధించిన షెడ్యూల్ కూడా విడుదలైంది. రెగ్యులర్‌, ఒకసారి ఫెయిల్‌ అయిన విద్యార్థులు, ఒకేషనల్‌ విద్యార్థులు ఎలాంటి ఆలస్య రుసుము లేకుండా నవంబర్ 13 నుంచి 25 వరకు ఫీజు చెల్లించవచ్చు. ఆలస్యంగా చెల్లించాలనుకునే వారికి డిసెంబర్‌ 3 వరకు రూ.50, డిసెంబర్‌ 10 వరకు రూ.200, డిసెంబర్‌ 15 వరకు రూ.500 ఆలస్య రుసుముతో చెల్లించే అవకాశం ఉంది. విద్యార్థులు చెల్లించిన ఫీజును అధికారిక వెబ్‌సైట్‌ ద్వారా ప్రిన్సిపల్స్‌ లాగిన్‌ ద్వారా సమర్పించవలసి ఉంటుంది.
ఇప్పటికే ఇంటర్‌ పరీక్షల షెడ్యూల్‌ను ప్రభుత్వం ప్రకటించింది. పోటీ పరీక్షలకు హాజరయ్యే విద్యార్థులకు ఇబ్బందులు కలగకుండా పదో తరగతి పరీక్షలను ముందుగానే పూర్తిచేయాలని నిర్ణయం తీసుకుంది. దీంతో విద్యాశాఖ అధికారులు సమగ్ర ప్రణాళికతో పరీక్షల నిర్వహణకు సిద్ధమవుతున్నారు. ఈ చర్యలతో విద్యా వ్యవస్థలో పారదర్శకత, సమర్థత పెరిగి, విద్యార్థుల భవిష్యత్తు మరింత బలపడే అవకాశం ఉందని భావిస్తున్నారు.
