భారత్–అమెరికా మధ్య ఇటీవల కుదిరిన చారిత్రక వాణిజ్య ఒప్పందం పాకిస్థాన్ రాజకీయ వర్గాల్లో తీవ్ర ప్రకంపనలు సృష్టిస్తోంది. ఫిబ్రవరి 2న ప్రకటించిన ఈ ఒప్పందం ప్రకారం అమెరికాకు ఎగుమతి అయ్యే భారతీయ ఉత్పత్తులపై సుంకాలను 18 శాతానికి తగ్గించారు. అదే సమయంలో, అమెరికా అధ్యక్షుడు డొనాల్డ్ ట్రంప్ను ప్రసన్నం చేసుకోవడానికి నెలల తరబడి ప్రయత్నించిన పాకిస్థాన్కు మాత్రం 19 శాతం సుంకాన్ని ఖరారు చేయడం అక్కడ ఆత్మగౌరవ ప్రశ్నగా మారింది. ఈ ఒక్క శాతం తేడా పాక్ పాలకుల వైఫల్యానికి ప్రతీకగా మారి దేశవ్యాప్తంగా చర్చకు దారి తీసింది.
ట్రంప్ను నోబెల్ శాంతి బహుమతికి నామినేట్ చేయడం, ఆయనకు ‘రెడ్ కార్పెట్’ స్వాగతం పలకడం వంటి చర్యలు చేసినప్పటికీ ఆశించిన ఫలితం దక్కలేదని పాక్ మీడియా ఘాటుగా విమర్శిస్తోంది. భారత్తో పోలిస్తే ఎక్కువ సుంక భారం పడటంతో ప్రతిపక్షాలు, ఆర్థిక విశ్లేషకులు షెహబాజ్ షరీఫ్ ప్రభుత్వంపై విరుచుకుపడుతున్నారు. ఇది పాకిస్థాన్ విదేశాంగ విధాన వైఫల్యానికి నిదర్శనమని వారు వ్యాఖ్యానిస్తున్నారు.
ఈ పరిణామంపై సోషల్ మీడియాలో పాక్ జర్నలిస్టులు, నెటిజన్లు తీవ్ర సెటైర్లు గుప్పిస్తున్నారు. డిజిటల్ క్రియేటర్ వజాహత్ ఖాన్ మాట్లాడుతూ, “ట్రంప్ ఒక వ్యాపారవేత్త. మోదీలో ఆయనకు ఒక వ్యూహాత్మక భాగస్వామి కనిపిస్తే, పాక్ పాలకుల్లో కేవలం ఒక మేనేజర్ మాత్రమే కనిపించాడు. అందుకే భారత్ విజేతగా నిలిచింది” అని వ్యాఖ్యానించారు. మరోవైపు, ఉమర్ అలీ అనే యూజర్ పాక్ ఆర్మీ చీఫ్ అసిమ్ మునీర్ పరిస్థితిని ‘నిస్సహాయ ప్రేమికుడి’తో పోలుస్తూ చేసిన పోస్ట్ వైరల్గా మారింది. ఈ వ్యాఖ్యలు పాక్ అధికార వర్గాల్లో అసహనాన్ని రేకెత్తిస్తున్నాయి.
మాజీ మంత్రి హమ్మద్ అజార్ ఈ ఒప్పందాన్ని పాకిస్థాన్ విదేశాంగ విధానానికి పెద్ద ఎదురుదెబ్బగా అభివర్ణించారు. “21వ శతాబ్దపు విదేశాంగ విధానం అంటే ఫోటోలు దిగడం లేదా వ్యక్తుల భజన చేయడం కాదు. అది ఆర్థిక బలం, మార్కెట్ ప్రాప్యతపై ఆధారపడి ఉంటుంది. భారత్ తన ఆర్థిక శక్తితో అమెరికాను ఒప్పించింది” అని ఆయన పేర్కొన్నారు. ఈ ఒప్పందం వల్ల రాబోయే పదేళ్లలో భారత్కు సుమారు 150 బిలియన్ డాలర్ల అదనపు ఎగుమతి ఆదాయం వచ్చే అవకాశం ఉంది. చైనా, వియత్నాం, బంగ్లాదేశ్లతో పోలిస్తే భారత్ ఇప్పుడు అమెరికా మార్కెట్లో తక్కువ సుంకంతో పోటీ పడగల స్థితిలో నిలిచింది. బలూచిస్థాన్ ఖనిజ సంపదను ఆఫర్ చేసినా దక్కని గౌరవాన్ని, భారత్ తన వ్యూహాత్మక స్వయంప్రతిపత్తితో సాధించిందని పాక్ మీడియానే అంగీకరించడం విశేషం. ఈ పరిణామం షెహబాజ్ ప్రభుత్వం, ఆర్మీ చీఫ్ అసిమ్ మునీర్ ప్రతిష్ఠను దేశీయంగా తీవ్రంగా దెబ్బతీసింది.
