సంక్రాంతి పండగ అంటేనే కోడి పందేల సందడి మొదలవుతుంది. గ్రామాల్లో ఇప్పటికే పుంజులను సిద్ధం చేసే పనులు ఊపందుకున్నాయి. కొన్ని నెలల ముందుగానే పుంజులకు ప్రత్యేక శిక్షణ ఇస్తూ, వాటిని బరిలో నిలబెట్టేలా తీర్చిదిద్దుతున్నారు. చిన్న వయసులోనే కోళ్లను ఎంపిక చేసి పెంచేవారు ఒకవైపు ఉంటే, మరికొందరు మాత్రం ఖర్చుకు వెనుకాడకుండా ఖరీదైన పుంజులను కొనుగోలు చేస్తున్నారు.
కొన్ని జాతి పుంజులకు ప్రత్యేక గిరాకీ ఉంది. వాటి ధరలు వింటే సామాన్యులకు ఆశ్చర్యమే. ఒక్కో పుంజు ధర వేలల్లో కాదు, లక్షల దాకా వెళ్లే పరిస్థితి కనిపిస్తోంది. అదేవిధంగా వాటి సంరక్షణ కూడా అంతే విధంగా ఉంటుంది జీడిపప్పు పిస్తా పప్పు మాంసము అంటే అన్ని పెట్టే నిర్వాహకులు పందేల ముందుగానే పుంజులను సిద్ధం చేస్తారు. ఈ పుంజుల వ్యాపారం ద్వారా కోట్ల రూపాయలు చేతులు మారుతున్నాయన్న అంచనాలు ఉన్నాయి.
పుంజులు వాటి యొక్క ప్రత్యేకత ఇప్పుడు తెలుసుకుందాం…
కొక్కిరాయి పుంజు - ఇది వేగం, దూకుడు ఎక్కువగా ఉండే జాతిగా పేరుగాంచింది. ప్రత్యర్థిని ఎదుర్కొనే సమయంలో వెనక్కి తగ్గకుండా పోరాడటం దీని ప్రత్యేకత.ధర సాధారణంగా ఇరవై వేల నుంచి 80 వేల రూపాయల వరకు ఉంటుంది.
డేగ పుంజు - డేగలా పై నుంచి దూకి దాడి చేసే శైలి కారణంగా ఈ పేరు వచ్చింది. శరీరం బలంగా, మెడ పొడవుగా ఉంటుంది. పందెంలో ఎక్కువ సేపు నిలబడే సామర్థ్యం దీనికి ఉంటుంది. ధర సాధారణంగా ముప్పై వేల నుంచి లక్ష రూపాయల వరకు పలుకుతుంది.
కాకి డేగ పుంజు మరో ప్రసిద్ధ జాతి. రంగు, ఆకృతి ప్రత్యేకంగా ఉండటంతో పాటు తెలివిగా పోరాడే గుణం దీనికి ఉంటుంది. ప్రత్యర్థి కదలికలను గమనించి దాడి చేయడం దీని లక్షణం. ఈ పుంజుల ధర ఇరవై ఐదు వేల నుంచి యాభై వేల రూపాయల వరకు ఉంటుంది.
అబ్రాస్ పుంజు అనేది ఖరీదైన పందెం పుంజులలో ఒకటి. దీని శరీరం గట్టి, కాల్లు బలంగా ఉంటాయి. ఒక్కసారి బరిలో దిగితే చివరి వరకు పోరాడే స్వభావం ఉంటుంది. అబ్రాస్ పుంజు ధర నలభై వేల నుంచి లక్ష రూపాయల దాకా వెళ్లే సందర్భాలు ఉన్నాయి.
నెమలి పుంజులు కూడా పందేలలో ప్రత్యేక గుర్తింపు పొందాయి. తెలుపు నెమలి, నలుపు నెమలి అనే రకాలుంటాయి. ఇవి అందంగా కనిపించడమే కాకుండా వేగంగా కదిలే గుణం కలిగి ఉంటాయి. వీటి ధర ఇరవై వేల నుంచి నలభై వేల రూపాయల మధ్య ఉంటుంది.
రామకోడి, చిల్లా పుంజు, పాండవ పుంజు వంటి స్థానిక పేర్లతో కూడా పందెం కోళ్లు పిలుస్తారు. ఇవి ఎక్కువగా ఆ గ్రామాల పేర్లతో లేదా పెంచిన వారి పేర్లతో గుర్తింపు పొందుతాయి. వీటి ధరలు పదిహేను వేల నుంచి ముప్పై వేల రూపాయల వరకు ఉంటాయి.
