విద్యార్థులు, యువత, ఉద్యోగార్థులకు అవసరమైన జ్ఞానం ఒకే చోట అందుబాటులో ఉండాలనే లక్ష్యంతో మంగళగిరిలో ఆధునిక డిజిటల్ లైబ్రరీని ఏర్పాటు చేశారు. మారుతున్న కాలానికి అనుగుణంగా సంప్రదాయ గ్రంథాలయాల రూపురేఖలు మారాల్సిన అవసరం ఉందన్న భావనతో ఈ లైబ్రరీని తీర్చిదిద్దారు. చదువు, పోటీ పరీక్షలు, వ్యక్తిత్వ వికాసం, కెరీర్ మార్గదర్శనం అన్నీ ఒకే చోట లభించేలా ఈ కేంద్రాన్ని రూపొందించడం విశేషం. ఈ డిజిటల్ లైబ్రరీని రాష్ట్ర మంత్రి నారా లోకేశ్ ప్రారంభించారు.
ఇటీవల కాలంలో పోటీ పరీక్షల సంఖ్య పెరిగిపోవడంతో పాటు, పరీక్షల సరళి కూడా పూర్తిగా మారిపోయింది. పుస్తకాలతో పాటు ఆన్లైన్ సమాచారం, డిజిటల్ కంటెంట్పై అవగాహన తప్పనిసరిగా మారింది. ఈ అవసరాలను దృష్టిలో పెట్టుకుని మంగళగిరి లైబ్రరీకి ఆధునిక హంగులు జోడించారు. పాత భవనాన్ని పూర్తిగా రీమోడలింగ్ చేసి, నేటి తరం అవసరాలకు తగ్గట్టుగా డిజిటల్ నాలెడ్జ్ సెంటర్గా మార్చారు. ఈ లైబ్రరీలో ప్రశాంత వాతావరణంలో చదువుకునే అవకాశం ఉండటంతో పాటు, దీర్ఘకాలం కూర్చుని చదివేందుకు అవసరమైన సౌకర్యాలను కల్పించారు.
లైబ్రరీ మొదటి అంతస్తులో పెద్ద రీడింగ్ హాల్తో పాటు ప్రత్యేక రీడింగ్ రూమ్లను ఏర్పాటు చేశారు. విద్యార్థులు ఒకరికి ఒకరు అంతరాయం కలగకుండా చదువుకునేలా సీటింగ్ను డిజైన్ చేశారు. ముఖ్యంగా UPSC, APPSC, SSC, బ్యాంకింగ్, రైల్వే, ఇతర ప్రభుత్వ ఉద్యోగాల పరీక్షలకు అవసరమైన పుస్తకాలు, రిఫరెన్స్ మెటీరియల్ను ఇక్కడ అందుబాటులో ఉంచారు. అంతేకాదు, డిజిటల్ లైబ్రరీ విభాగంలో కంప్యూటర్లు, ఇంటర్నెట్ సదుపాయం ఏర్పాటు చేసి, ఈ-బుక్స్, ఆన్లైన్ కోర్సులు, డిజిటల్ నోట్స్ను వినియోగించే అవకాశం కల్పించారు.
ఈ లైబ్రరీ ప్రత్యేకత కేవలం విద్యార్థులకే పరిమితం కాదు. చిన్నారుల కోసం ప్రత్యేకంగా కిడ్స్ లెర్నింగ్ విభాగాన్ని ఏర్పాటు చేశారు. పిల్లలు మొబైల్ ఫోన్లకు దూరంగా ఉండి, కథల పుస్తకాలు, విజ్ఞాన గ్రంథాలు చదవాలనే ఉద్దేశంతో ఈ విభాగాన్ని రూపొందించారు. ఆటలతో పాటు చదువు పట్ల ఆసక్తి పెరిగేలా వాతావరణాన్ని సృష్టించారు. చిన్న వయసులోనే పుస్తకాలతో అనుబంధం ఏర్పడితే భవిష్యత్తులో చదువుపట్ల ఆసక్తి పెరుగుతుందన్న భావనతో ఈ విభాగం రూపుదిద్దుకుంది.
లైబ్రరీలో శబ్దం లేకుండా ఉండేందుకు సౌండ్ ప్రూఫ్ ఏర్పాట్లు చేశారు. ఎక్కువసేపు చదువుకునే వారికి ఇబ్బంది కలగకుండా సరైన లైటింగ్, గాలి ప్రసరణ ఉండేలా ప్రత్యేక శ్రద్ధ తీసుకున్నారు. తాగునీటి కోసం ప్రత్యేక ప్లాంట్ను కూడా ఏర్పాటు చేశారు. పత్రికలు చదివే వారికి తెలుగు, ఇంగ్లీష్తో పాటు జాతీయ పత్రికలను అందుబాటులో ఉంచారు. ఈ సౌకర్యాలన్నింటిని చూసిన విద్యార్థులు, ఉద్యోగార్థులు తమ సంతృప్తిని వ్యక్తం చేస్తున్నారు.
మంగళగిరి నియోజకవర్గం నుంచి ఎక్కువ మంది యువత ఉద్యోగాలు సాధించాలన్నదే తన లక్ష్యమని మంత్రి లోకేశ్ ఈ సందర్భంగా పేర్కొన్నారు. చదువుకు, జ్ఞానానికి సరైన వేదికలు ఉంటే యువత తమ కలలను నిజం చేసుకుంటారని ఆయన అన్నారు. ఈ డిజిటల్ లైబ్రరీ భవిష్యత్తులో వేలాది మంది విద్యార్థులకు దారి చూపే కేంద్రంగా మారుతుందని స్థానికులు, విద్యావేత్తలు అభిప్రాయపడుతున్నారు. చదువు అంటే కేవలం పుస్తకాలు మాత్రమే కాదు, ఆలోచనా శక్తి, వ్యక్తిత్వ వికాసం కూడా అన్న భావనను ఈ లైబ్రరీ బలంగా ప్రతిబింబిస్తోంది.
