భారత రైల్వే సాధారణ ప్రయాణికుల అవసరాలను దృష్టిలో ఉంచుకుని మరో కీలక నిర్ణయం తీసుకుంది. దేశవ్యాప్తంగా సుదూర ప్రయాణాలు చేసే వారికి తక్కువ ఖర్చుతో మెరుగైన సౌకర్యాలు అందించాలనే లక్ష్యంతో 9 కొత్త అమృత్ భారత్ ఎక్స్ప్రెస్ రైళ్లను త్వరలో ప్రారంభించనుంది. ఈ విషయాన్ని కేంద్ర రైల్వే మంత్రి అశ్విని వైష్ణవ్ వెల్లడించారు. ఇప్పటికే డిసెంబర్ 2023లో ప్రారంభమైన అమృత్ భారత్ ఎక్స్ప్రెస్ సేవలకు మంచి స్పందన రావడంతో, ఇప్పుడు మరో 9 రైళ్లను కొత్త మార్గాల్లో ప్రవేశపెట్టాలని రైల్వే శాఖ నిర్ణయించింది.
ఈ కొత్త అమృత్ భారత్ ఎక్స్ప్రెస్ రైళ్లు గౌహతి (కామాఖ్య)–రోహ్తక్, దిబ్రూఘర్–లక్నో (గోమతి నగర్), న్యూ జల్పైగురి–నాగర్కోయిల్, న్యూ జల్పైగురి–తిరుచిరాపల్లి, అలీపుర్దువార్–SMVT బెంగళూరు, అలీపుర్దువార్–ముంబై (పన్వేల్), కోల్కతా (సంత్రాగచ్చి)–తాంబరం, కోల్కతా (హౌరా)–ఆనంద్ విహార్ టెర్మినల్, కోల్కతా (సీల్దా)–బనారస్ వంటి కీలక మార్గాల్లో నడవనున్నాయి. ఈ రూట్లు తూర్పు, ఈశాన్య భారతదేశాన్ని దక్షిణ, పశ్చిమ మరియు ఉత్తర భారతదేశంతో బలంగా అనుసంధానిస్తాయి.
అమృత్ భారత్ ఎక్స్ప్రెస్ రైళ్లు ప్రత్యేకంగా నాన్-ఏసీ స్లీపర్ క్లాస్లో రూపొందించబడ్డాయి. 1000 కిలోమీటర్ల ప్రయాణానికి సుమారు రూ.500 మాత్రమే ఛార్జీగా ఉండడం వీటి ప్రధాన ఆకర్షణ. తక్కువ మరియు మధ్యస్థ దూరాలకు మరింత తక్కువ చార్జీలు ఉండేలా రైల్వే నిర్ణయించింది. ఈ రైళ్ల ద్వారా సాధారణ ప్రయాణికులు మాత్రమే కాకుండా వలస కార్మికులు, విద్యార్థులు, ఉద్యోగార్థులు తక్కువ ఖర్చుతో సౌకర్యవంతమైన ప్రయాణం చేయగలుగుతారు.
ప్రత్యేకంగా పండుగ కాలాలు, వలస ప్రయాణాల సమయంలో ఈ రైళ్లు ఎంతో ఉపయోగపడనున్నాయి. అస్సాం, బీహార్, పశ్చిమ బెంగాల్ వంటి రాష్ట్రాల నుంచి ఇతర ప్రాంతాలకు వెళ్లే వలస కార్మికులకు ఇవి ఒక వరంగా మారనున్నాయి. ప్రస్తుతం దేశవ్యాప్తంగా 30 అమృత్ భారత్ ఎక్స్ప్రెస్ రైళ్లు నడుస్తుండగా, ఈ 9 కొత్త రైళ్లు ప్రారంభమైతే వాటి సంఖ్య 39కి చేరనుంది. సరసమైన ధరలు, నమ్మకమైన సేవలు, మెరుగైన కనెక్టివిటీతో అమృత్ భారత్ ఎక్స్ప్రెస్ రైళ్లు భారత రైల్వేలో మరో మైలురాయిగా నిలవనున్నాయి.
