గ్రీన్లాండ్ విషయంలో అమెరికా, డెన్మార్క్ మధ్య నెలకొన్న ఉద్రిక్తతలు తాజాగా మరింత పెరిగాయి. గ్రీన్లాండ్ ప్రధానమంత్రి జెన్స్ ఫ్రెడరిక్ నీల్సన్ చేసిన వ్యాఖ్యలు అమెరికా అధ్యక్షుడు డోనాల్డ్ ట్రంప్ (Donald Trump) ఆగ్రహానికి కారణమయ్యాయి. అమెరికాతో కాకుండా డెన్మార్క్తోనే కొనసాగుతామని గ్రీన్లాండ్ స్పష్టంగా ప్రకటించడంతో ట్రంప్ తీవ్ర అసహనం వ్యక్తం చేశారు. ఇలాంటి వైఖరి కొనసాగితే గ్రీన్లాండ్ ప్రధానికి పెద్ద సమస్యలు తప్పవంటూ ఆయన హెచ్చరించారు. వాషింగ్టన్లోని వైట్ హౌస్లో మీడియాతో మాట్లాడిన ట్రంప్, గ్రీన్లాండ్ వ్యవహారాన్ని తేలికగా తీసుకోబోమని సంకేతాలు ఇచ్చారు.
ఇటీవల డెన్మార్క్ రాజధాని కోపెన్హగెన్లో నిర్వహించిన సంయుక్త మీడియా సమావేశంలో గ్రీన్లాండ్ ప్రధాని జెన్స్ ఫ్రెడరిక్ నీల్సన్, డెన్మార్క్ ప్రధానమంత్రి మెటే ఫ్రెడరిక్సన్తో కలిసి కీలక వ్యాఖ్యలు చేశారు. గ్రీన్లాండ్ భవిష్యత్తు విషయంలో తమ నిర్ణయం స్పష్టమని, డెన్మార్క్, నాటో, యూరోపియన్ యూనియన్తోనే కొనసాగుతామని ఆయన తేల్చి చెప్పారు. గ్రీన్లాండ్ ప్రజల అభిప్రాయమే తుది నిర్ణయమని, ఇతర దేశాలు తమ భవితవ్యాన్ని నిర్ణయించలేవని ఆయన స్పష్టం చేశారు. ఈ వ్యాఖ్యలే ట్రంప్ ఆగ్రహానికి కారణమయ్యాయి.
ట్రంప్ స్పందిస్తూ, గ్రీన్లాండ్ ప్రధానమంత్రితో తనకు వ్యక్తిగత పరిచయం లేదని అన్నారు. అయినా గ్రీన్లాండ్ తీసుకుంటున్న వైఖరి భవిష్యత్తులో పెద్ద సమస్యలకు దారి తీస్తుందని హెచ్చరించారు. గ్రీన్లాండ్ వ్యూహాత్మకంగా చాలా కీలక ప్రాంతమని, భద్రతా అంశాల్లో అమెరికా ఆసక్తి సహజమేనని ఆయన వ్యాఖ్యానించారు. ఈ నేపథ్యంలో అమెరికా, గ్రీన్లాండ్, డెన్మార్క్ మధ్య దౌత్యపరమైన చర్చలు మరింత కీలకంగా మారాయి.
ఈ పరిణామాల మధ్య బుధవారం వైట్ హౌస్లో కీలక భేటీ జరగనుంది. డెన్మార్క్ విదేశాంగ మంత్రి లార్స్ లోకే రస్ముసెన్, గ్రీన్లాండ్ విదేశాంగ మంత్రి వివియన్ మోట్జ్ ఫెల్ట్ అమెరికా ఉపాధ్యక్షుడు జేడీ వాన్స్, విదేశాంగ మంత్రి మార్కో రూబియోతో సమావేశం కానున్నారు. ఈ సమావేశంలో గ్రీన్లాండ్ భద్రత, ఆర్కిటిక్ ప్రాంతంలో సైనిక పరిస్థితులు ప్రధానంగా చర్చకు వచ్చే అవకాశం ఉందని విశ్లేషకులు చెబుతున్నారు.
అమెరికా వాదన ప్రకారం, గ్రీన్లాండ్ నాటో కూటమికి చెందిన ప్రాంతం కావడంతో అక్కడి భద్రతా బాధ్యతలు కీలకమవుతాయి. అందుకే ఆ ప్రాంతంలో అమెరికా సైనిక ఉనికిని పెంచాలని ట్రంప్ ప్రభుత్వం భావిస్తోంది. అయితే ప్రస్తుతం గ్రీన్లాండ్ డెన్మార్క్కు చెందిన స్వయం పాలిత ప్రాంతంగా కొనసాగుతోంది. ఈ పరిస్థితిలో అమెరికా వైఖరి గ్రీన్లాండ్ ప్రజల్లో ఆందోళన కలిగిస్తోందని అక్కడి మంత్రులు చెబుతున్నారు.
ఈ వివాదంపై NATO కూడా జాగ్రత్తగా స్పందిస్తోంది. నాటో సెక్రటరీ జనరల్ మార్క్ రుట్టే, కూటమి దేశాల మధ్య జరిగే అంతర్గత చర్చలపై వ్యాఖ్యానించడం తన బాధ్యత కాదని చెప్పారు. అయితే ఆర్కిటిక్ ప్రాంత భద్రత విషయంలో మాత్రం రాజీ ఉండదని స్పష్టం చేశారు. మొత్తంగా గ్రీన్లాండ్ అంశం అమెరికా–డెన్మార్క్ సంబంధాల్లో కొత్త మలుపు తిప్పుతుందని అంతర్జాతీయ పరిశీలకులు అభిప్రాయపడుతున్నారు.
