ఆధార్ కార్డు ఇప్పుడు కేవలం గుర్తింపు పత్రంగా మాత్రమే కాకుండా బ్యాంకింగ్, ప్రభుత్వ పథకాలు, సబ్సిడీలు, పన్ను వ్యవహారాలు వంటి కీలక సేవలకు తప్పనిసరి డాక్యుమెంట్గా మారింది. ఈ నేపథ్యంలో ఆధార్ను మరింత సురక్షితంగా, మన్నికగా, రోజువారీ వినియోగానికి అనుకూలంగా మార్చేందుకు UIDAI ప్రత్యేకంగా PVC ఆధార్ కార్డును అందుబాటులోకి తీసుకొచ్చింది. సాంప్రదాయ పేపర్ ఆధార్తో పోలిస్తే ఇది బలంగా ఉండటమే కాకుండా, నీరు పడినా చెడిపోని విధంగా రూపొందించారు. వాలెట్లో సులభంగా ఉంచుకునేలా డిజైన్ చేయడం దీని ప్రత్యేకత.
PVC ఆధార్ కార్డు అనేది పాలీ వినైల్ క్లోరైడ్ (PVC)తో తయారు చేసిన ఆధునిక కార్డు. ఇది పూర్తిగా ATM లేదా డెబిట్ కార్డు తరహాలో ఉంటుంది. ఇందులో QR కోడ్, హోలోగ్రామ్, మైక్రో టెక్స్ట్, గిల్లోచే ప్యాటర్న్ వంటి అనేక భద్రతా లక్షణాలు ఉన్నాయి. ఈ భద్రతా ఫీచర్లు ఆధార్ నకిలీలను అరికట్టడంలో కీలక పాత్ర పోషిస్తాయి. అంతేకాదు, ఈ కార్డు చాలా కాలం పాటు మన్నికగా ఉంటుంది. తరచూ మడిచిపోవడం, చిరిగిపోవడం వంటి సమస్యలు లేకుండా రోజువారీ అవసరాలకు అనువుగా రూపొందించారు.
ఇదిలా ఉండగా, ఆధార్ సమాచారాన్ని సవరించుకునే విధానంలో కూడా UIDAI కీలక మార్పులు చేసింది. పేరు, చిరునామా, మొబైల్ నంబర్ వంటి వివరాలను ఆన్లైన్లోనే అప్డేట్ చేసుకునే సౌకర్యాన్ని ప్రవేశపెట్టింది. ఈ సేవ నవంబర్ 1 నుంచి అమల్లోకి వచ్చింది. పేరు లేదా చిరునామా మార్పులకు ఇప్పటివరకు రూ.50గా ఉన్న రుసుమును రూ.75కి పెంచారు. అయితే, జూన్ 14, 2026 వరకు ఆన్లైన్ అప్డేట్స్ పూర్తిగా ఉచితం కావడం విశేషం. ఆఫ్లైన్ ఆధార్ సేవా కేంద్రాల్లో ఫోటో అప్డేట్కు రూ.125, ఆధార్ పునః ముద్రణకు రూ.40గా రుసుములను నిర్ణయించారు. కొత్త డిజిటల్ వ్యవస్థ ద్వారా UIDAI డేటాబేస్ నుంచే వివరాలను ధృవీకరిస్తుండటంతో ప్రజలు పదేపదే కేంద్రాలకు వెళ్లాల్సిన అవసరం తగ్గింది.
PVC ఆధార్ కార్డును పొందాలనుకునే వారు UIDAI అధికారిక వెబ్సైట్ uidai.gov.in ద్వారా సులభంగా ఆర్డర్ చేయవచ్చు. వెబ్సైట్లో “Order Aadhaar PVC Card” ఆప్షన్పై క్లిక్ చేసి, మీ 12 అంకెల ఆధార్ నంబర్ లేదా VID నమోదు చేయాలి. క్యాప్చా పూర్తి చేసి, మొబైల్కు వచ్చిన OTPతో ధృవీకరణ పూర్తిచేయాలి. అనంతరం రూ.50 (GST, స్పీడ్ పోస్ట్తో సహా) చెల్లించాలి. ఈ చెల్లింపును UPI, క్రెడిట్/డెబిట్ కార్డు లేదా నెట్ బ్యాంకింగ్ ద్వారా చేయవచ్చు. చెల్లింపు పూర్తైన తర్వాత మీ PVC ఆధార్ కార్డు నేరుగా మీ చిరునామాకు పంపించబడుతుంది.
