Telangana Education: తెలంగాణ విద్యాశాఖ ప్రభుత్వ పాఠశాలల రూపురేఖలను మార్చేందుకు సిద్ధమవుతోంది. వచ్చే విద్యా సంవత్సరం (2026-27) నుంచి రాష్ట్రవ్యాప్తంగా వేలాది ప్రభుత్వ బడుల్లో యూకేజీ (UKG) తరగతులను ప్రారంభించాలని సర్కారు కీలక నిర్ణయం తీసుకుంది. ప్రైవేటు పాఠశాలలకు ధీటుగా సామాన్యుల బిడ్డలకు కూడా చిన్నతనం నుంచే నాణ్యమైన విద్యను అందించడమే ఈ పథకం ముఖ్య ఉద్దేశం. ప్రస్తుతం ఉన్న ప్రాథమిక పాఠశాలల్లో అదనపు గదులు, వసతులను కల్పించి ఈ ప్రీ-ప్రైమరీ సెక్షన్లను అందుబాటులోకి తీసుకురానున్నారు.
ఈ విద్యా విప్లవం వల్ల కేవలం విద్యార్థులకే కాకుండా, నిరుద్యోగులకు కూడా భారీగా మేలు జరగనుంది. కొత్తగా ప్రారంభించే ఈ తరగతుల నిర్వహణ కోసం రాష్ట్రవ్యాప్తంగా సుమారు 6,000 మందిని తాత్కాలిక ప్రాతిపదికన నియమించుకోనున్నారు. ఇందులో ప్రధానంగా ఇన్స్ట్రక్టర్లు (బోధకులు), తీసుకోనున్నారు. వీరికి నెలకు వరుసగా రూ.8,000 మరియు రూ.6,000 గౌరవ వేతనం చెల్లించాలని విద్యాశాఖ ప్రతిపాదించింది. దీనివల్ల గ్రామీణ ప్రాంతాల్లోని మహిళలకు, విద్యావంతులైన యువతకు స్థానికంగానే ఉపాధి లభించే అవకాశం ఉంది.
రాష్ట్రంలోని మొత్తం 12,700 గ్రామ పంచాయతీల్లో కనీసం ఒక్కో ప్రభుత్వ బడిలోనైనా ఈ ప్రీ-ప్రైమరీ తరగతులు ఉండాలని ప్రభుత్వం లక్ష్యంగా పెట్టుకుంది. ఇప్పటికే దాదాపు 1,362 పాఠశాలల్లో ఈ విధానం ప్రయోగాత్మకంగా నడుస్తుండగా, దీనికి వస్తున్న ఆదరణ చూసి మరిన్ని స్కూళ్లకు విస్తరించాలని అధికారులు భావిస్తున్నారు. సమగ్ర శిక్షా అభియాన్ కింద వచ్చే నిధులను ఈ ప్రాజెక్టు కోసం వినియోగించనున్నారు. కేవలం యూకేజీ మాత్రమే కాకుండా, భవిష్యత్తులో నర్సరీ, ఎల్కేజీ తరగతులను కూడా ప్రారంభించే ఆలోచనలో ప్రభుత్వం ఉంది.
ముఖ్యంగా హైదరాబాద్ లాంటి నగరాల్లోని 'కోర్ అర్బన్ రీజియన్' (CURE) పరిధిలో విద్యార్థులకు మెరుగైన సౌకర్యాలు కల్పించేందుకు ప్రత్యేక జీఓను కూడా విడుదల చేశారు. ఔటర్ రింగ్ రోడ్ పరిధిలోని 28 ప్రధాన ప్రాంతాల్లో ప్రీ-ప్రైమరీ నుంచి ఇంటర్ వరకు ఒకే చోట విద్యనందించేలా ప్రణాళికలు రూపుదిద్దుకుంటున్నాయి. దీనివల్ల తల్లిదండ్రులు తమ పిల్లలను ప్రైవేటు స్కూళ్లకు పంపి భారీ ఫీజులు చెల్లించాల్సిన భారం తగ్గుతుంది.
సర్కారు బడుల్లోనే కార్పొరేట్ స్థాయి విద్య దొరుకుతుందని అధికారులు ధీమా వ్యక్తం చేస్తున్నారు.ప్రభుత్వం తీసుకున్న ఈ నిర్ణయంపై సర్వత్రా హర్షం వ్యక్తమవుతోంది. అంగన్వాడీ కేంద్రాల నుంచి నేరుగా పాఠశాల వాతావరణంలోకి పిల్లలు రావడం వల్ల వారిలో నేర్చుకునే సామర్థ్యం పెరుగుతుందని విద్యావేత్తలు అభిప్రాయపడుతున్నారు. పాఠశాలల్లో విద్యార్థుల సంఖ్య పెరగడమే కాకుండా, డ్రాపౌట్స్ సంఖ్య కూడా తగ్గుతుందని ఆశిస్తున్నారు. ఏదేమైనా, వచ్చే జూన్ నాటికి ఈ కొత్త తరగతులు పూర్తిస్థాయిలో అందుబాటులోకి వస్తే తెలంగాణ విద్యా వ్యవస్థలో సరికొత్త అధ్యాయం మొదలైనట్టే.
