బంగాళాఖాతంలో ఏర్పడిన ‘మొంథా’ తుఫాన్ ప్రభావం ఆంధ్రప్రదేశ్లో స్పష్టంగా కనిపిస్తోంది. కోస్తా జిల్లాల్లో బలమైన గాలులు, వర్షాలు మొదలయ్యాయి. వాతావరణ శాఖ మూడు రోజుల పాటు (అక్టోబర్ 27–29) రాష్ట్రంలో అలర్ట్ జారీ చేసింది. తుఫాను ప్రభావం మరింత పెరిగే అవకాశం ఉండటంతో ప్రభుత్వం మొత్తం యంత్రాంగాన్ని అప్రమత్తం చేసింది. ముఖ్యంగా కాకినాడ, అనకాపల్లి, విశాఖ, గుంటూరు, ఉభయగోదావరి జిల్లాల్లో పరిస్థితులు తీవ్రంగా మారవచ్చని హెచ్చరికలు జారీ అయ్యాయి.
తుఫాను ప్రభావంతో రవాణా వ్యవస్థ పూర్తిగా దెబ్బతిన్నది. విశాఖపట్నం మీదుగా నడిచే రైలు సర్వీసులు ఎక్కువగా రద్దు అయ్యాయి. ఈస్ట్ కోస్ట్ రైల్వే అధికారులు మొత్తం 43 రైళ్లను మూడు రోజుల పాటు నిలిపివేస్తున్నట్లు ప్రకటించారు. వాతావరణ పరిస్థితులు సాధారణ స్థితికి వస్తేనే సర్వీసులను పునరుద్ధరిస్తామని వారు తెలిపారు. కాకినాడ తీరంలో తుఫాను తీరం దాటనుండటంతో ఆ ప్రాంతంలో రైల్వే ట్రాఫిక్పై పెద్ద ప్రభావం ఉంటుందని అంచనా వేస్తున్నారు.
అధికారులు ప్రజలను అప్రమత్తంగా ఉండాలని సూచించారు. రేపు తుఫాను తీరం దాటే సమయంలో తీవ్రత మరింత పెరగవచ్చని హెచ్చరికలు ఉన్నాయి. కాకినాడ తీరానికి సమీపంగా ఇది దూసుకువస్తుండటంతో తీర ప్రాంతాల్లో అలజడి మొదలైంది. ఇప్పటికే పలు ప్రాంతాల్లో ఈదురుగాలులు, వర్షాలు మొదలయ్యాయి. ప్రజలు అనవసర ప్రయాణాలు వాయిదా వేసుకోవాలని, మత్స్యకారులు సముద్రంలోకి వెళ్లరాదని సూచనలు ఇచ్చారు.
తాజా సమాచారం ప్రకారం, మొంథా తుఫాను ప్రస్తుతం చెన్నైకి 520 కి.మీ, కాకినాడకి 570 కి.మీ, విశాఖపట్నంకి 600 కి.మీ దూరంలో కేంద్రీకృతమై ఉంది. ఇది పశ్చిమ వాయువ్య దిశగా కదులుతూ రేపు ఉదయానికి తీవ్రమైన తుఫానుగా మారే అవకాశం ఉందని భారత వాతావరణ శాఖ (IMD) అంచనా వేస్తోంది. గంటకు 90 నుండి 110 కిమీ వేగంతో గాలులు వీచే అవకాశం ఉండటంతో అధికారులు ఎమర్జెన్సీ సిబ్బందిని సిద్ధంగా ఉంచారు.
ప్రభుత్వం అన్ని జిల్లాల్లో విపత్తు నిర్వహణ చర్యలను ప్రారంభించింది. విద్యాసంస్థలకు సెలవులు ప్రకటించి, రవాణా మరియు విద్యుత్ విభాగాలు సన్నద్ధంగా ఉండాలని సూచించింది. తీర ప్రాంత ప్రజలకు ముందస్తు జాగ్రత్తలు తీసుకోవాలని సూచిస్తూ అధికారులు పర్యవేక్షణ కొనసాగిస్తున్నారు. తుఫాను తీవ్రత తగ్గే వరకు ప్రభుత్వం నిరంతర మానిటరింగ్ చేస్తుందని ప్రకటించింది.
