ఆంధ్రప్రదేశ్లో డ్వాక్రా మహిళల సమస్యలకు ప్రభుత్వం కొత్త పరిష్కారం చూపింది. స్వయం సహాయక సంఘాల పనితీరును పూర్తిగా పారదర్శకంగా, సులభంగా మార్చే దిశగా నూతన సాంకేతికతను వినియోగిస్తోంది. ఈ క్రమంలో ప్రభుత్వం ఇప్పటికే అమలులో ఉన్న “మన డబ్బులు – మన లెక్కలు”, “స్త్రీనిధి” వంటి యాప్ల తర్వాత తాజాగా “మొబైల్ బుక్ కీపింగ్.2” అనే కొత్త యాప్ను ప్రారంభించింది. దీని ద్వారా వీవోఏలు (వాలంటీర్లు) నేరుగా సభ్యుల ఇళ్లకు వెళ్లి జీపీఎస్ ఆన్ చేసి, వారి ఫోటోలు, ఆర్థిక వివరాలు, రుణాలు, పొదుపు వంటి అంశాలను నమోదు చేస్తున్నారు. ఈ విధంగా డ్వాక్రా సంఘాల్లో పారదర్శకత పెంచి, లావాదేవీల్లో అవకతవకలకు అడ్డుకట్ట వేయడం ప్రభుత్వ ప్రధాన ఉద్దేశ్యం.
ఈ యాప్ల ద్వారా మహిళా సంఘాల లావాదేవీలకు సంబంధించిన వివరాలు డిజిటల్గా రికార్డ్ అవుతాయి. “మన డబ్బులు.. మన లెక్కలు” యాప్ ద్వారా మహిళలు తమ ఐడీ నంబర్తో లాగిన్ అయి, తాము చేసిన పొదుపులు, తీసుకున్న రుణాలు, చెల్లించిన వాయిదాలు, పొందిన పథకాల వివరాలు సులభంగా తెలుసుకోగలరు. అంతేకాక, స్త్రీనిధి, బ్యాంక్ లింకేజీ, ఉన్నతి, సీఐఎఫ్, సీడ్ క్యాపిటల్ వంటి పథకాల కింద ప్రభుత్వం అందించే ఆర్థిక సాయాలు నేరుగా మహిళల ఖాతాలకు చేరుతున్నాయా లేదా అన్నది కూడా యాప్ ద్వారా పర్యవేక్షించవచ్చు. అధికారులు చెబుతున్నట్లు, ఈ డిజిటల్ వ్యవస్థ ద్వారా ఎక్కడైనా అవకతవకలు చోటు చేసుకునే అవకాశం తక్కువవుతుంది.
“మొబైల్ బుక్ కీపింగ్.2” యాప్ వీవోఏలకు క్షేత్రస్థాయిలో విపరీతమైన సౌలభ్యాన్ని అందిస్తుంది. వారు సభ్యుల ఇళ్లకు వెళ్లి, స్మార్ట్ఫోన్లో యాప్ ద్వారా ఫోటోలు తీసి, వివరాలను నమోదు చేయగలరు. దీంతో సంఘ సభ్యుల వివరాలు నేరుగా సర్వర్లోకి చేరి, ఆర్థిక లావాదేవీల పారదర్శకత పెరుగుతుంది. పాత విధానంలో పేపర్ ఆధారంగా జరిగే పనులు ఆలస్యానికి, తప్పిదాలకు దారితీసేవి. కానీ ఈ కొత్త యాప్లతో సరిగ్గా ఎవరి ఖాతాలో ఎంత డబ్బు ఉందో, ఎవరెవరు రుణాలు తీసుకున్నారో తక్షణమే తెలుసుకోవచ్చు.
ప్రభుత్వం ఇప్పుడు ‘ఉమెన్ పవర్’ అనే యాప్ను కూడా అందుబాటులోకి తెచ్చింది. ఆండ్రాయిడ్ ఫోన్లలో ప్లేస్టోర్ ద్వారా ఈ యాప్ను డౌన్లోడ్ చేసి, డీఆర్డీఏ అధికారులు ఇచ్చే లాగిన్ ఐడీ, పాస్వర్డ్తో లాగిన్ అయితే ప్రతి సభ్యురాలు తన 20 అంకెల ప్రత్యేక గుర్తింపు నంబర్ ద్వారా వివరాలను సులభంగా చూడవచ్చు. ఈ డిజిటల్ మార్పులతో డ్వాక్రా మహిళలు ఇక తమ ఆర్థిక లావాదేవీలపై పూర్తి అవగాహనతో ముందుకు సాగగలరని అధికారులు చెబుతున్నారు. మహిళలు ఈ యాప్లను సద్వినియోగం చేసుకుంటే, భవిష్యత్తులో అవినీతి, గందరగోళాలు, లెక్కల్లో తేడాలు పూర్తిగా తగ్గిపోతాయని ప్రభుత్వం ఆశాభావం వ్యక్తం చేసింది.
