అమెరికాలో ప్రయాణికుడి నిర్లక్ష్యపు, భయానక వ్యాఖ్యతో యునైటెడ్ ఎయిర్లైన్స్ విమానంలో పెద్ద కలకలం చోటుచేసుకుంది. డాలస్ నుంచి షికాగో వెళ్తున్న ఈ విమానంలో ఉన్న ఒక వ్యక్తి, తన భార్య లగేజీలో బాంబు ఉందని అకస్మాత్తుగా సిబ్బందికి తెలియజేయడంతో విమానంలో ఒక్కసారిగా ఉద్రిక్తత పెరిగింది. ప్రయాణికుల భద్రతను ప్రాధాన్యంగా తీసుకున్న సిబ్బంది వెంటనే పైలట్కు సమాచారం ఇచ్చారు. పైలట్ పరిస్థితిని అర్థం చేసుకుని, ఏ ప్రమాదానికీ అవకాశం ఇవ్వకుండా అత్యవసర ల్యాండింగ్ నిర్ణయం తీసుకున్నారు. ఒక్క మాటతో చెప్పాలంటే, విమానం లోపల భయానక వాతావరణం నెలకొంది.
ఈ ఘటన ఆదివారం ఉదయం జరిగింది. అత్యవసర పరిస్థితుల్లో మిస్సౌరీలోని సెయింట్ లూయిస్ లాంబెర్ట్ అంతర్జాతీయ విమానాశ్రయాన్ని ఎంచుకుని విమానాన్ని అక్కడికి మళ్లించారు. ఉదయం 8:40 గంటల సమయంలో విమానాన్ని సురక్షితంగా ల్యాండ్ చేశారు. ఎమర్జెన్సీ అలర్ట్ అందుకున్న విమానాశ్రయం అధికారులు వెంటనే కదిలారు. బాంబ్ స్క్వాడ్, ఫైర్ సర్వీసులు, సెక్యూరిటీ సిబ్బంది క్షణాల్లో అక్కడికి చేరుకుని విమానాన్ని చుట్టుముట్టారు. ప్రయాణికులందరినీ జాగ్రత్తగా కిందకు దింపి విమానం, లగేజీ అన్నింటినీ క్షుణ్ణంగా సోదాలు చేశారు. భయంతో వణికిపోయిన ప్రయాణికులు కూడా అధికారులు ప్రశాంతంగా ఉండమని సూచించడంతో సహకరించారు.
మొత్తం విమానం, లగేజీ, కేబిన్ ఏరియాలను పూర్తిగా తనిఖీ చేసిన తర్వాత, ఎక్కడా బాంబ్ లేదా అనుమానాస్పద వస్తువులు లభించలేదు. దీంతో ఇది పూర్తిగా తప్పుడు బెదిరింపు అని అధికారులు నిర్ధారించారు. ఈ ఘటనలో ఎవరికీ ఎలాంటి గాయాలు కాలేదని విమానాశ్రయ డైరెక్టర్ రోండా హామ్-నీబ్రుగ్గే స్పష్టం చేశారు. అయితే, ప్రయాణికుల ప్రాణాలను ప్రమాదంలో పడేసేలా అబద్ధపు సమాచారాన్ని ఇచ్చిన ఆ వ్యక్తిని పోలీసులు వెంటనే అదుపులోకి తీసుకున్నారు. అతని మాట వెనుక ఉద్దేశ్యం ఏమిటి? అతను మానసిక ఒత్తిడిలో ఉన్నాడా? లేక కావాలనే భయపెట్టాడా? అన్న అంశాలపై పోలీసులు విచారణ చేస్తున్నారు. అతనిపై క్రిమినల్ కేసులు నమోదు చేసే అవకాశం ఉన్నట్లు అమెరికా సెక్యూరిటీ అధికారులు తెలిపారు.
ఘటనపై యునైటెడ్ ఎయిర్లైన్స్ ప్రకటన విడుదల చేసింది. ప్రయాణికుల భద్రత తమకు అత్యంత ప్రాధాన్యమని, అందుకే ఏ అనుమానం వచ్చినా వెంటనే విమానాన్ని ల్యాండ్ చేయాల్సి వచ్చిందని స్పష్టం చేసింది. బాంబ్ స్క్వాడ్ తనిఖీలు పూర్తి చేసి గ్రీన్ సిగ్నల్ ఇచ్చిన తర్వాత విమానం తిరిగి ప్రయాణం ప్రారంభించి షికాగోకు సురక్షితంగా చేరిందని కంపెనీ తెలిపింది. ఇటువంటి తప్పుడు బెదిరింపులు కఠినమైన శిక్షలకు దారితీస్తాయని వారు హెచ్చరించారు.
