ప్రపంచవ్యాప్తంగా కోట్లాది మంది వినియోగదారుల నిత్యజీవితంలో భాగమైన వాట్సప్ (WhatsApp) మరో కొత్త ఫీచర్తో వినియోగదారులను ఆకట్టుకునే ప్రయత్నం చేస్తోంది. ముఖ్యంగా ఐఫోన్ వినియోగదారుల కోసం ప్రత్యేకంగా రూపొందిస్తున్న ఈ ఫీచర్ ద్వారా, వాట్సాప్ ప్రొఫైల్ను మరింత ఆకర్షణీయంగా మార్చుకునే అవకాశం రానుంది. ఇప్పటివరకు కేవలం ప్రొఫైల్ ఫోటోకే పరిమితమైన వాట్సాప్, ఇప్పుడు కవర్ ఫోటో కాన్సెప్ట్ను కూడా ప్రవేశపెట్టేందుకు సిద్ధమవుతోంది. దీంతో వినియోగదారులు తమ వ్యక్తిత్వాన్ని మరింత స్పష్టంగా చూపించుకునే వీలుంటుందని టెక్ వర్గాలు చెబుతున్నాయి.
సోషల్ మీడియా ప్లాట్ఫాంలైన ఫేస్బుక్, లింక్డ్ఇన్లలో ఇప్పటికే ప్రొఫైల్ కవర్ ఫోటోలు ఉన్న సంగతి తెలిసిందే. అదే తరహాలో ఇప్పుడు వాట్సాప్ కూడా తన ప్రొఫైల్ డిజైన్ను అప్గ్రేడ్ చేయాలని భావిస్తోంది. తాజా బీటా వెర్షన్లో ఈ ఫీచర్ను గుర్తించినట్లు టెక్ నిపుణులు వెల్లడించారు. ప్రస్తుతం ఇది టెస్ట్ దశలో ఉండగా, త్వరలోనే సాధారణ వినియోగదారులకు అందుబాటులోకి వచ్చే అవకాశం ఉందని సమాచారం.
ఈ కొత్త ఫీచర్ అమల్లోకి వస్తే, ప్రొఫైల్ పిక్చర్కు పైన ప్రత్యేకంగా ఒక కవర్ ఫోటో స్థానం కనిపిస్తుంది. వినియోగదారులు తమ మొబైల్ గ్యాలరీ నుంచి ఇష్టమైన ఫోటోను ఎంచుకోవచ్చు లేదా అదే సమయంలో కొత్త ఫోటోను తీసుకుని కవర్గా సెట్ చేసుకునే అవకాశం ఉంటుంది. అవసరమైతే ఎప్పుడైనా కవర్ ఫోటోను మార్చుకునే స్వేచ్ఛ కూడా ఉంటుంది. మీరు మీ ప్రొఫైల్ను ఓపెన్ చేసినప్పుడు లేదా ఇతరులు మీ వివరాలను చూడగానే ఈ కవర్ ఫోటో వారికి కనిపిస్తుంది.
ఇప్పటికే వాట్సాప్ బిజినెస్ వినియోగదారులు ఈ తరహా కవర్ ఇమేజ్ ఫీచర్ను ఉపయోగిస్తున్నారు. వ్యాపార సంస్థలు తమ బ్రాండ్ను ప్రత్యేకంగా చూపించుకునేందుకు ఈ ఫీచర్ను వినియోగిస్తున్నాయి. అదే అనుభవాన్ని ఇప్పుడు సాధారణ వినియోగదారులకు కూడా అందించాలని వాట్సాప్ భావిస్తున్నట్లు తెలుస్తోంది. దీని ద్వారా వ్యక్తిగత ప్రొఫైల్లకు కూడా ఒక ప్రత్యేకమైన గుర్తింపు లభించనుంది.
టెక్నాలజీ మారుతున్న కొద్దీ, వినియోగదారుల అభిరుచులకు అనుగుణంగా యాప్లు కూడా మార్పులు చేసుకుంటున్నాయి. వాట్సాప్ తీసుకొస్తున్న ఈ కొత్త కవర్ ఫోటో ఫీచర్ కూడా ఆ మార్పుల్లో భాగమే. ప్రైవేట్ మెసేజింగ్ యాప్గా మొదలైన వాట్సాప్, ఇప్పుడు కస్టమైజేషన్కు ఎక్కువ ప్రాధాన్యం ఇస్తూ ముందుకెళ్తోంది. త్వరలో ఈ ఫీచర్ అందరికీ అందుబాటులోకి వస్తే, వాట్సాప్ ప్రొఫైల్లు మరింత కలర్ఫుల్గా, వ్యక్తిగతంగా మారనున్నాయనడంలో సందేహం లేదు.
