AI Startup: డెలివరీ బాయ్ నుంచి AI స్టార్టప్ CEOగా ఎదిగిన సూరజ్ బిస్వాస్.. ఒక ప్రేరణాత్మక ప్రయాణం!

పెట్టుబడిదారులు తిరస్కరించినా విజయం సాధించిన సూరజ్ బిస్వాస్ కథ..

రోజుకు ₹1000 సంపాదించిన యువకుడు ఇప్పుడు AI స్టార్టప్ ఫౌండర్..

టెక్ రంగంలో సాధారణంగా కనిపించని ఒక అసాధారణ ప్రయాణం ఇప్పుడు అందరినీ ఆకట్టుకుంటోంది. వెస్ట్ బెంగాల్కు చెందిన సూరజ్ బిస్వాస్ అనే యువకుడు, డెలివరీ బాయ్గా పని చేస్తూనే AI స్టార్టప్లు స్థాపించి ఇప్పుడు CEOగా ఎదిగాడు. అతని జీవితం సాధారణ నేపథ్యం ఉన్నవారికీ పెద్ద కలలు సాధ్యమేనని నిరూపిస్తోంది.

సూరజ్ బిస్వాస్ వెస్ట్ బెంగాల్లోని నదియా జిల్లా ఛక్దా అనే చిన్న పట్టణానికి చెందినవాడు. “ఇలాంటి చిన్న ఊరులోంచి ఫౌండర్లు వస్తారని ఎవ్వరూ ఊహించరు” అని ఆయన చెప్పాడు. అతను కోల్కతాలోని గురునానక్ ఇన్స్టిట్యూట్ ఆఫ్ ఫార్మాస్యూటికల్ సైన్స్ అండ్ టెక్నాలజీ నుంచి జెనెటిక్స్లో బీఎస్సీ పూర్తి చేశాడు.

స్టడీస్ తర్వాత అతను జొమాటో డెలివరీ పార్ట్నర్గా పనిచేశాడు. రోజుకు సుమారు ₹1000–₹1500 సంపాదించేవాడని గుర్తు చేసుకున్నాడు. ఈ పని తనకు గర్వకారణమని కూడా చెప్పాడు.

భారత విద్యా వ్యవస్థ “ఒకే విధానం అందరికీ” అనే పద్ధతిలో ఉండటం తనను తీవ్రంగా నిరాశపరిచిందని సూరజ్ చెప్పారు. ప్రతి విద్యార్థి ఒకేలా ఉండరని, అయినా వ్యవస్థ అందరినీ ఒకే విధంగా చూస్తోందని ఆయన అభిప్రాయపడ్డారు.

ఆర్టిఫిషియల్ ఇంటెలిజెన్స్ కూడా వ్యక్తిగత స్థాయిలో మనిషిని అర్థం చేసుకోలేకపోతుందని భావించి, ఆ సమస్యను పరిష్కరించాలనే ఆలోచనతో 2021లో తన స్టార్టప్ను ప్రారంభించాడు. అతను డాట్స్-ఇన్ (Dots-in) మరియు అసెస్లీ (Assessli) అనే సంస్థలకు వ్యవస్థాపకుడు మరియు CEO.

స్టార్టప్ ప్రారంభించినప్పుడు అతనికి ఫండింగ్ లేదు, ఆఫీస్ లేదు, కో-ఫౌండర్ కూడా లేరు. చిన్న పట్టణం నుంచి వచ్చి, డెలివరీ బాయ్గా పనిచేసినందున పెట్టుబడిదారులు తనను సీరియస్గా తీసుకోలేదని చెప్పారు. దీర్ఘకాలం పాటు AI నిర్మాణం కొనసాగించడానికి అవసరమైన నిధులు లేకపోవడం కూడా పెద్ద సవాలుగా మారింది.

ఈ ప్రయాణంలో అతను తన తండ్రిని కోల్పోయాడు. తండ్రి ఒక హౌస్ పెయింటర్గా పని చేసి తన భవిష్యత్తు కోసం ఎంతో కష్టపడ్డారని భావోద్వేగంగా గుర్తు చేసుకున్నాడు. తండ్రి తన విజయాన్ని చూడలేకపోయిన బాధ తనతో ఎప్పటికీ ఉంటుందని చెప్పాడు.

ఇప్పటికే స్థిరమైన వ్యాపారం ఉన్నప్పటికీ, ప్రయాణం ఇంకా ముగియలేదని సూరజ్ అంటున్నారు. AIని ఒక సాధారణ యాప్గా కాకుండా ఒక పెద్ద ఇన్ఫ్రాస్ట్రక్చర్గా ప్రపంచం అర్థం చేసుకోవాలని ఆయన భావిస్తున్నారు. తన డాక్టర్ కావాలనే కల నెరవేరకపోయినా, AI ద్వారా మానవ ఆరోగ్యం, ప్రవర్తన, సామర్థ్యాన్ని అర్థం చేసుకునే కొత్త మార్గం నిర్మిస్తున్నానని చెప్పారు.

“సిద్ధంగా ఉండేవరకు ఎదురు చూడొద్దు. భయం, అనిశ్చితి ఉన్నా ముందుకు వెళ్లడం నేర్చుకోవాలి. పుట్టిన ఊరు లేదా కాలేజ్ మీ సామర్థ్యాన్ని నిర్ణయించవు” అని యువతకు ఆయన సూచించారు.

వెస్ట్ బెంగాల్ నుంచి ప్రారంభమైన సూరజ్ బిస్వాస్ ప్రయాణం ఇప్పుడు బెంగళూరులో కొనసాగుతోంది. ఒక డెలివరీ బాయ్ నుంచి AI స్టార్టప్ CEOగా ఎదిగిన అతని కథ, సాధారణ నేపథ్యం ఉన్న ప్రతి యువకుడికీ ప్రేరణగా నిలుస్తోంది.