- Cinema: హిందీతో పాటు తెలుగు, తమిళం, కన్నడ, మలయాళ భాషల్లో స్ట్రీమింగ్..
- రాత్రి 7 గంటలకు జియో హాట్స్టార్ వేదికగా 'ధురంధర్ 2' డిజిటల్ ప్రీమియర్..
Dhurandhar 2: ఇండియన్ బాక్సాఫీస్ వద్ద రికార్డుల ముక్కలు చేస్తూ వసూళ్ల వర్షం కురిపించిన టాలీవుడ్, బాలీవుడ్ కలయికలోని భారీ యాక్షన్ ఎంటర్టైనర్ ‘ధురంధర్ 2: ది రివెంజ్’ ఇప్పుడు ఓటీటీ ప్రియులను అలరించేందుకు పూర్తిగా సిద్ధమైంది. ప్రపంచవ్యాప్తంగా థియేటర్లలో ఏకంగా రూ. 1,800 కోట్లకు పైగా గ్రాస్ కలెక్షన్లతో ట్రేడ్ వర్గాలను సైతం విస్మయానికి గురిచేస్తూ సంచలన విజయం సాధించిన ఈ చిత్రం, ఈరోజు సాయంత్రం నుంచే డిజిటల్ వేదికపైకి రానుంది. భారతదేశంలో ప్రముఖ ఓటీటీ ప్లాట్ఫామ్ ‘జియో హాట్స్టార్’ వేదికగా ఈ రోజు రాత్రి 7 గంటలకు ఈ సినిమా డిజిటల్ ప్రీమియర్ ప్రదర్శితం కానుంది. ఆ తర్వాత జూన్ 5 నుంచి ఈ చిత్రం సాధారణ సబ్స్క్రైబర్లందరికీ రెగ్యులర్ స్ట్రీమింగ్కు అందుబాటులోకి రానుంది. పాన్-ఇండియా స్థాయి క్రేజ్ను దృష్టిలో ఉంచుకుని ఈ యాక్షన్ డ్రామాను హిందీతో పాటు తెలుగు, తమిళం, కన్నడ మరియు మలయాళ భాషల్లో ఏకకాలంలో డిజిటల్ వీక్షకులకు అందుబాటులోకి తీసుకువస్తున్నారు.
ఓటీటీ విడుదల కోసం డిజిటల్ ప్లాట్ఫామ్ క్యూరేటర్లు ఒక ప్రత్యేకమైన సర్ప్రైజ్ను సిద్ధం చేశారు. థియేటర్ల రన్ టైమ్ పరిమితుల వల్ల కట్ చేసిన కొన్ని కీలకమైన సీన్స్, అలాగే ఒరిజినల్ అన్ఫిల్టర్డ్ డైలాగ్స్తో కూడిన ప్రత్యేక వెర్షన్ డైరెక్టర్స్ కట్ను భారత్లో జియో హాట్స్టార్ స్ట్రీమింగ్ చేస్తుండటం విశేషం. ఈ ప్రధాన చిత్రం స్ట్రీమింగ్ కావడానికి సరిగ్గా అరగంట ముందు, అంటే సాయంత్రం 6:30 గంటల నుంచే సినిమా మేకింగ్కు సంబంధించిన 30 నిమిషాల ప్రత్యేక బిహైండ్-ది-సీన్స్ (BTS) ప్రీ-షో కూడా ప్రసారం కానుంది. ఇకపోతే విదేశాల్లోని అంతర్జాతీయ సినీ అభిమానుల కోసం ఈ ప్రతిష్టాత్మక మూవీ ఇప్పటికే ప్రముఖ గ్లోబల్ ఓటీటీ సంస్థ నెట్ఫ్లిక్స్ వేదికగా అందుబాటులోకి వచ్చి అక్కడ కూడా ట్రెండింగ్లో దూసుకుపోతోంది.
టాలెంటెడ్ డైరెక్టర్ ఆదిత్య ధార్ అత్యంత ప్రతిష్టాత్మకంగా, అధునాతన సాంకేతిక విలువల తో తెరకెక్కించిన ఈ హై-వోల్టేజ్ స్పై థ్రిల్లర్లో బాలీవుడ్ స్టార్ హీరో రణ్వీర్ సింగ్ పవర్ఫుల్ పాత్రలో నటించగా, సంజయ్ దత్, అక్షయ్ ఖన్నా, ఆర్. మాధవన్ మరియు అర్జున్ రాంపాల్ వంటి భారీ తారాగణం అత్యంత కీలకమైన పాత్రల్లో నటించి మెప్పించారు. సినిమాను థియేటర్లలో మిస్ అయిన వారు లేదా ఆ నరాలు తెగే యాక్షన్ విజువల్ ఫీస్ట్ను తమ హోమ్ థియేటర్లలో మరోసారి ఫ్యామిలీతో కలిసి ఎంజాయ్ చేయాలనుకునే వారు ఈరోజు సాయంత్రం నుంచి డిజిటల్ స్క్రీన్స్ పై దీనిని వీక్షించవచ్చు.
