Washington: అమెరికా అధ్యక్షుడు డోనాల్డ్ ట్రంప్… BBCపై బిలియన్ డాలర్ల లీగల్ నోటీస్!!

బ్రిటిష్ ప్రసార సంస్థ BBC చేసిన డాక్యుమెంటరీలో తన ప్రసంగాన్ని తప్పుగా ఎడిట్ చేశారని ఆరోపిస్తూ అమెరికా అధ్యక్షుడు డొనాల్డ్ ట్రంప్ BBC కు భారీ నష్టపరిహారం నోటీసు జారీ చేశారు. ఈ ఘటన అంతర్జాతీయ మీడియాలో పెద్ద చర్చకి దారితీసింది.

ట్రంప్ యొక్క న్యాయవాదుల బృందం BBC కు పంపిన లీగల్ నోటీసులో డాక్యుమెంటరీలోని ఎడిటింగ్ వల్ల ఆయన హింసకు ప్రేరేపించినట్లు తప్పుడు అభిప్రాయం సృష్టించారని పేర్కొంది. ట్రంప్ ప్రసంగించిన అసలు వీడియోలోని ముఖ్య భాగాలు వదిలేసి కొన్ని వాక్యాలను కలిపి చూపించటం వలన 2021 జనవరి 6న క్యాపిటల్ హిల్ వద్ద జరిగిన అల్లర్లకు ఆయన ప్రత్యక్షంగా పిలుపునిచ్చినట్లుగా ప్రజలకు అనిపించిందని నోటీసులో ఆరోపించారు.

నోటీసులో BBC డాక్యుమెంటరీని పూర్తిగా వెనక్కి తీసుకోవాలని పబ్లిక్‌గా క్షమాపణ చెప్పాలని అలాగే జరిగిన నష్టానికి పరిహారంగా కనీసం 1 బిలియన్ డాలర్లు చెల్లించాలని డిమాండ్ చేశారు. “The BBC is on notice. Please govern yourself accordingly.” అనే వాక్యంతో నోటీసును ముగించారు.

BBC ఇప్పటికే ఈ విషయంపై అధికారికంగా స్పందించింది. సంస్థ చేసిన ఎడిటింగ్ నిర్ణయం “తప్పు నిర్ణయం” అని స్వీకరిస్తూ పబ్లిక్ క్షమాపణ తెలిపింది. ఈ వివాదం కారణంగా BBC డైరెక్టర్ జనరల్ టిమ్ డేవీ అలాగే BBC న్యూస్ CEO డెబ్రా టర్నెస్ తమ పదవులకు రాజీనామా చేశారు. BBC చైర్మన్ సమీర్ షా పార్లమెంట్ సభ్యులకు పంపిన లేఖలో “ఆ ఎడిటింగ్ తప్పిదం వల్ల ట్రంప్ ప్రసంగం హింసకు ప్రోత్సహించినట్టు కనిపించిన సంగతి నిజం” అని అంగీకరించారు.

ట్రంప్ శిబిరం ఈ విషయంపై కఠినంగా స్పందించింది. ట్రంప్ పత్రికా కార్యాలయం విడుదల చేసిన ప్రకటనలో BBC ను “శతశాతం నకిలీ వార్తల సంస్థ (Fake News)”గా అభివర్ణించింది. తప్పుడు సమాచారాన్ని ప్రసారం చేసే వారందరినీ న్యాయపరంగా బాధ్యత వహింపజేస్తాం అని వారి న్యాయ బృందం స్పష్టం చేసింది.

ఈ ఘటనపై బ్రిటన్ ప్రధాని కీర్ స్టార్మర్ కార్యాలయం స్పందిస్తూ BBC వంటి సంస్థలు ప్రజాస్వామ్యంలో కీలకం అని పొరపాట్లు జరిగినప్పుడు పారదర్శకతతో సవరించుకోవడం అవసరం అని పేర్కొంది.

BBC చార్టర్ రీవ్యూ (ప్రసార సంస్థ పనితీరును పరిశీలించే ప్రక్రియ) బ్రిటన్ ప్రభుత్వ పరిధిలో కొనసాగుతోంది. ఈ వివాదం మీడియా నిష్పాక్షికత ఎడిటింగ్ ప్రమాణాలు మరియు బాధ్యతపై కొత్త చర్చలను తెరమీదకు తీసుకొచ్చింది.