Central Govt: ఖరీఫ్ 2026కి ఎరువుల కొరత లేదు.. కేంద్ర ప్రభుత్వం భరోసా!

అవసరాలకు మించి ఎరువుల నిల్వలు… రైతులకు ఊరట..

దేశవ్యాప్తంగా ఎల్పీజీ, పెట్రోలు, డీజిల్ సరఫరా సజావుగా..

న్యూఢిల్లీ: దేశంలో ఖరీఫ్ 2026 సీజన్‌కు అవసరమైన ఎరువులు సమృద్ధిగా అందుబాటులో ఉన్నాయని కేంద్ర ప్రభుత్వం స్పష్టం చేసింది. రైతులు ఎటువంటి ఆందోళన చెందాల్సిన అవసరం లేదని, సరఫరాలు అవసరాలకు మించి కొనసాగుతున్నాయని అధికారులు తెలిపారు.

అంతర్‌శాఖల సమీక్ష సమావేశంలో ఎరువుల శాఖ అదనపు కార్యదర్శి అపర్ణ శర్మ మాట్లాడుతూ… దేశీయంగా 62.37 లక్షల మెట్రిక్ టన్నుల (LMT) ఎరువుల ఉత్పత్తి జరిగిందని చెప్పారు. అలాగే సుమారు 15.39 LMT ఎరువులను దిగుమతి చేసుకోవడంతో మొత్తం లభ్యత 78 LMTలకు చేరుకుందని వివరించారు. ఇంకా భవిష్యత్ అవసరాల కోసం 38 LMT యూరియా, 19 LMT ఫాస్ఫాటిక్, పొటాషిక్ ఎరువుల కొనుగోలుకు గ్లోబల్ టెండర్లు కూడా విడుదల చేసినట్లు తెలిపారు. దేశంలో ఎరువుల భద్రత బలంగా, స్థిరంగా ఉందని ఆమె పేర్కొన్నారు.

ఇక పెట్రోలియం మరియు సహజ వాయువు శాఖ సంయుక్త కార్యదర్శి సుజాత శర్మ మాట్లాడుతూ… దేశవ్యాప్తంగా ఎల్పీజీ, పెట్రోలు, డీజిల్ సరఫరాలు ఎటువంటి అంతరాయం లేకుండా కొనసాగుతున్నాయని చెప్పారు. ఎల్పీజీ సరఫరాలో ఎక్కడా కొరత లేదని, ఏ డిస్ట్రిబ్యూటర్ దగ్గర కూడా డ్రై అవుట్ పరిస్థితి లేదని స్పష్టం చేశారు. ప్రస్తుతం ఆన్‌లైన్ ద్వారా ఎల్పీజీ బుకింగ్ సుమారు 98 శాతానికి చేరగా, 93 శాతం డెలివరీలు OTP ఆధారంగా జరుగుతున్నాయని తెలిపారు. అంతేకాకుండా సుమారు 43 వేల మంది వినియోగదారులు స్వచ్ఛందంగా తమ ఎల్పీజీ కనెక్షన్లను వదిలి పీఎన్జీకి మారారని చెప్పారు. ప్రజలు అపోహలకు లోనవకుండా అధికారిక సమాచారం మాత్రమే నమ్మాలని సూచించారు.

పోర్టులు, షిప్పింగ్ మరియు జలమార్గాల శాఖ అదనపు కార్యదర్శి ముఖేష్ మంగళ మాట్లాడుతూ… సముద్ర ప్రాంతాల్లో ఉన్న భారతీయ నావికులు అందరూ సురక్షితంగా ఉన్నారని తెలిపారు. గత 24 గంటల్లో భారత నౌకలకు సంబంధించిన ఎటువంటి ఘటనలు నమోదు కాలేదని చెప్పారు. ఇప్పటివరకు 2,800కు పైగా భారతీయ నావికులను సురక్షితంగా స్వదేశానికి తీసుకొచ్చినట్లు, అందులో గత 24 గంటల్లోనే 28 మంది ఉన్నట్లు వెల్లడించారు. దేశవ్యాప్తంగా పోర్టు కార్యకలాపాలు సాధారణంగా కొనసాగుతున్నాయని, ఎక్కడా రద్దీ సమస్యలు లేవని స్పష్టం చేశారు.

మొత్తంగా చూస్తే… ఎరువులు, ఇంధనం, సముద్ర రవాణా—అన్ని రంగాల్లో పరిస్థితులు స్థిరంగా ఉన్నాయని కేంద్ర ప్రభుత్వం ప్రజలకు భరోసా కల్పించింది. రైతులు, వినియోగదారులు ఆందోళన చెందకుండా తమ పనులను కొనసాగించాలని అధికారులు సూచిస్తున్నారు.