ఆంధ్రప్రదేశ్తో పాటు పొరుగు రాష్ట్రాలకు ప్రయాణ సౌకర్యాన్ని మెరుగుపరిచే కీలకమైన చీపురుపల్లి రైల్వే బ్రిడ్జి నిర్మాణ పనులు పూర్తయ్యాయి. విజయనగరం జిల్లా చీపురుపల్లిలో ఉన్న ఈ రైల్ ఓవర్ బ్రిడ్జి అందుబాటులోకి రానుండటంతో, గత కొన్నేళ్లుగా వాహనదారులు, ప్రయాణికులు ఎదుర్కొంటున్న ఇబ్బందులకు చెక్ పడనుంది. ఈ బ్రిడ్జి ప్రారంభమైతే విజయనగరం, శ్రీకాకుళం, విశాఖపట్నం, తూర్పు గోదావరి జిల్లాల ప్రజలతో పాటు ఒడిశా, ఛత్తీస్గఢ్ రాష్ట్రాలకు వెళ్లే ప్రయాణికులకు కూడా భారీ ఉపశమనం కలగనుంది. ముఖ్యంగా రోజువారీ ప్రయాణికులు, ఉద్యోగులు, వ్యాపారులకు ఇది ఎంతో ఉపయోగకరంగా మారనుంది.
ఈ రైల్వే బ్రిడ్జి పూర్తవడంతో ఆర్టీసీ అధికారులు కూడా ఈ మార్గంలో తిరిగి బస్సు సర్వీసులు ప్రారంభించేందుకు సన్నాహాలు చేస్తున్నారు. గతంలో నిలిపివేసిన బస్సు రూట్లు తిరిగి ప్రారంభమైతే ప్రయాణికులకు మరింత సౌకర్యం లభించనుంది. ప్రస్తుతం అధికారిక ప్రారంభ తేదీని సంబంధిత శాఖ ఉన్నతాధికారులు ఇంకా ప్రకటించకపోయినా, ఈ నెల 10వ తేదీ తర్వాత బ్రిడ్జిని ప్రారంభించే అవకాశం ఉందని సమాచారం. అధికారిక ప్రకటన వెలువడితే ఉత్తరాంధ్ర ప్రాంత ప్రజల్లో మరింత ఉత్సాహం నెలకొననుంది.
ఈ బ్రిడ్జి నిర్మాణం పూర్తయిన సందర్భంగా టీడీపీ పార్టీ కూడా సోషల్ మీడియా వేదికగా స్పందించింది. మూడేళ్ల పాటు మూడు జిల్లాల ప్రజలను ప్రయాణ నరకానికి గురిచేసిన చీపురుపల్లి రైల్ ఓవర్ బ్రిడ్జి, కూటమి ప్రభుత్వ కృషితో పూర్తయిందని పేర్కొంది. సంక్రాంతి పండుగకు స్వగ్రామాలకు వెళ్లే వారికి ఇది పెద్ద ఊరటనిచ్చే వార్తగా అభివర్ణించింది. శ్రీకాకుళం, విజయనగరం, పార్వతీపురం మన్యం జిల్లాల నుంచి విశాఖపట్నం వెళ్లే ప్రయాణికులకు ఇప్పటివరకు ఎదురైన 50 కిలోమీటర్లకు పైగా అదనపు ప్రయాణం, రెండు బస్సులు మారాల్సిన తిప్పలు ఇక ఉండవని తెలిపింది. ఈ బ్రిడ్జి పూర్తవడంతో ప్రజలు ఆనందం వ్యక్తం చేస్తూ డబుల్ ఇంజన్ ప్రభుత్వానికి కృతజ్ఞతలు తెలుపుతున్నారని ట్వీట్లో పేర్కొన్నారు.
వాస్తవానికి ఈ చీపురుపల్లి రైల్వే బ్రిడ్జి 2021 డిసెంబర్ నుంచి ప్రమాదకర స్థితికి చేరడంతో భారీ వాహనాల రాకపోకలను నిలిపివేశారు. అప్పటి నుంచి వాహనాలు చిలకపాలెం, పాలకొండ, రాజాం, ఉత్తరావల్లి, గరివిడి మార్గాలుగా మళ్లించడంతో ప్రయాణికులు తీవ్ర ఇబ్బందులు ఎదుర్కొన్నారు. ఉత్తరాంధ్రంలోని నాలుగు జిల్లాల ప్రజలతో పాటు ఒడిశా, ఛత్తీస్గఢ్ వైపు వెళ్లే ప్రయాణికులు సుమారు 40 కిలోమీటర్లు అదనంగా ప్రయాణించాల్సి రావడంతో ఖర్చు, సమయం రెండూ పెరిగాయి. ఆర్టీసీ కూడా ఈ రూట్లో బస్సు సర్వీసులను నిలిపివేయడంతో సంస్థకు నష్టం వాటిల్లింది. ఈ పరిస్థితిని దృష్టిలో ఉంచుకుని కూటమి ప్రభుత్వం ఆర్అండ్బీ, రైల్వే, జడ్పీ నిధులతో పనులను వేగవంతం చేసి, ఏడాదిన్నర వ్యవధిలోనే బ్రిడ్జి పనులను పూర్తి చేయగలిగిందని అధికారులు చెబుతున్నారు. బ్రిడ్జి ప్రారంభమైతే ప్రాంత ప్రజల జీవన ప్రయాణంలో కీలక మార్పు రావడం ఖాయమని భావిస్తున్నారు.
