ఫ్యాటీ లివర్ (Fatty Liver) వయస్సుతో సంబంధం లేకుండా అన్ని వయసుల వారినీ ప్రభావితం చేస్తున్న అనారోగ్య సమస్యగా మారింది. ఒకప్పుడు ఎక్కువగా మద్యం సేవించే వారిలో మాత్రమే ఈ సమస్య కనిపించేది. కానీ ప్రస్తుతం మద్యం తాగని వారిలో కూడా ఫ్యాటీ లివర్ ఎక్కువగా గుర్తించబడుతోంది. మారుతున్న జీవనశైలి, శారీరక శ్రమ లేకపోవడం, అధిక కొవ్వు మరియు చక్కెరలతో కూడిన ఆహారం తీసుకోవడం ఈ సమస్యకు ప్రధాన కారణాలుగా మారాయి. ఇది శరీర ఆరోగ్యాన్ని మాత్రమే కాదు, కాలేయ పనితీరును కూడా తీవ్రంగా దెబ్బతీస్తుంది. అందుకే ఫ్యాటీ లివర్ను ముందే గుర్తించి నియంత్రించడం చాలా అవసరం.
ఫ్యాటీ లివర్ సమస్య ఉన్నవారిలో ప్రారంభ దశలోనే కొన్ని ముఖ్యమైన లక్షణాలు కనిపిస్తాయి. కారణం తెలియకుండా బరువు పెరగడం, ముఖ్యంగా పొట్ట చుట్టూ అధికంగా కొవ్వు పేరుకుపోవడం కాలేయానికి సంబంధించిన అంతర్గత సమస్యలను సూచించవచ్చు. అలాగే రక్తంలో చక్కెర స్థాయిలు పెరగడం కూడా ఫ్యాటీ లివర్కు సంకేతంగా భావించాలి. ఈ సమస్య వల్ల జీవక్రియలు దెబ్బతిని, కాలేయ పనితీరు మందగిస్తుంది. ఫలితంగా ఇన్సులిన్ నిరోధకత పెరిగి డయాబెటిస్ ప్రమాదం కూడా అధికమవుతుంది.
ఫ్యాటీ లివర్తో బాధపడే చాలామందిలో ఎప్పుడూ అలసట, నీరసం కనిపిస్తుంది. కాలేయం సరిగా పనిచేయకపోవడం వల్ల శరీరానికి కావాల్సిన శక్తి సరైన స్థాయిలో అందదు. దీని ప్రభావంగా రోజంతా అలసటగా ఉండడం జరుగుతుంది. కొందరిలో చర్మం, కళ్లు పసుపు రంగులోకి మారడం కూడా కనిపించవచ్చు. ఇది కామెర్లు వచ్చే సంకేతం కావడంతో, తీవ్రంగా పరిగణించి వెంటనే వైద్య సలహా తీసుకోవాలి.
ఈ సమస్య తీవ్రత పెరిగినప్పుడు పొత్తికడుపు పైభాగంలో, ముఖ్యంగా కుడివైపు నొప్పి రావచ్చు. కాలేయంలో వాపు ఏర్పడి దాని పరిమాణం పెరగడం వల్ల ఈ నొప్పి కలుగుతుంది. ఫ్యాటీ లివర్ సాధారణంగా శరీరంలో అధిక కొవ్వు స్థాయిలను సూచిస్తుంది. దీని కారణంగా కొలెస్ట్రాల్ పెరిగి గుండె సంబంధిత వ్యాధుల ప్రమాదం కూడా ఉంటుంది. అలాగే మలము రంగు మారడం, మూత్రం ముదురు రంగులో రావడం వంటి లక్షణాలు కాలేయ అనారోగ్యాన్ని సూచిస్తాయి.
లివర్ ఆరోగ్యం (Liver Health) మెరుగుపడాలంటే జీవనశైలిలో మార్పులు తప్పనిసరి. రోజూ వ్యాయామం చేయడం, సమతుల్యమైన ఆహారం తీసుకోవడం, బరువును అదుపులో ఉంచుకోవడం చాలా ముఖ్యం. పండ్లు, ఆకుకూరలు, కూరగాయలు, తృణధాన్యాలు, లీన్ ప్రోటీన్లు ఎక్కువగా తీసుకోవాలి. ప్రాసెస్ చేసిన ఆహారం, అధిక చక్కెరలు, అనారోగ్యకర కొవ్వులను తగ్గించాలి. నీటిని ఎక్కువగా తాగడం వల్ల కాలేయం నుంచి వ్యర్థాలు బయటకు వెళ్లి పనితీరు మెరుగవుతుంది. ముఖ్యంగా మద్యం పూర్తిగా మానేయాలి. ఆరోగ్యకరమైన జీవనశైలిని అలవర్చుకుంటే ఫ్యాటీ లివర్ సమస్య నుంచి సులభంగా బయటపడవచ్చని నిపుణులు సూచిస్తున్నారు.
