ఆ గ్రామాల్లో 22 లక్షల పుస్తకాల పంపిణీ.. ఒకరోజు పంపిణీలో పాల్గొననున్న చంద్రబాబు!

ఆంధ్రప్రదేశ్‌ (AndhraPradesh) లో కూటమి ప్రభుత్వం నూతన సంవత్సరం వేళ ప్రతిష్ఠాత్మకంగా చేపట్టిన పట్టాదారు పాసు పుస్తకాల (Pattadar Passbooks) పంపిణీ కార్యక్రమం శుక్రవారం రాష్ట్రవ్యాప్తంగా ప్రారంభమైంది. నేతల ఫొటోలు లేకుండా కేవలం ప్రభుత్వ అధికారిక చిహ్నమైన రాజముద్రతో, క్యూఆర్ కోడ్‌తో ఈ కొత్త పాసుపుస్తకాలను ముద్రించారు. భూ రికార్డుల రీసర్వే పూర్తయిన గ్రామాల్లోని సుమారు 22 లక్షల మంది రైతుల (Farmers) కు వీటిని అందజేయనున్నారు.

ఈ పంపిణీ కార్యక్రమం జనవరి 9వ తేదీ వరకు కొనసాగుతుంది. రాష్ట్రవ్యాప్తంగా మంత్రులు, ఎమ్మెల్యేలు, ఇతర ప్రజాప్రతినిధులు గ్రామాల్లో ఈ కార్యక్రమంలో పాల్గొని రైతులకు కొత్త పాసుపుస్తకాలను అందజేశారు. పంపిణీ ప్రక్రియపై ముఖ్యమంత్రి చంద్రబాబు (CM Chandrababu) నేడు వర్చువల్ విధానంలో సమీక్ష నిర్వహించారు. ఈ కార్యక్రమంలో ఒకరోజు తాను కూడా స్వయంగా పాల్గొని రైతులకు పాసుపుస్తకాలు అందించాలని ఆయన నిర్ణయించుకున్నారు.

గ్రామ సభల ద్వారా పారదర్శకంగా ఈ పంపిణీ ప్రక్రియను పూర్తి చేయాలని ప్రభుత్వం అధికారులను ఆదేశించింది. ఈ-కేవైసీ ద్వారా లబ్ధిదారుల వివరాలను ధ్రువీకరించుకున్న తర్వాతే పాసుపుస్తకాలను అందిస్తున్నారు. ఈ సమీక్షా సమావేశంలో రెవెన్యూ శాఖ మంత్రి అనగాని సత్యప్రసాద్ కూడా పాల్గొన్నారు. ఎలాంటి పొరపాట్లకు తావులేకుండా పంపిణీని విజయవంతం చేయాలని అధికారులకు సూచించారు.