కడప–బెంగళూరు మధ్య కొత్త రైల్వే లైన్ నిర్మాణం భూసేకరణ సమస్యల కారణంగా ఎన్నేళ్లుగా ముందుకు సాగడం లేదు. ఈ పరిస్థితిని అధిగమించేందుకు ఆంధ్రప్రదేశ్ ప్రభుత్వం ఒక ప్రత్యామ్నాయ మార్గాన్ని ప్రతిపాదించింది. ముద్దనూరు నుంచి ముదిగుబ్బ వరకు 75 కిలోమీటర్ల కొత్త రైల్వే లైన్ నిర్మించడం ద్వారా కడప–బెంగళూరు రైలు కనెక్టివిటీని సులభతరం చేయాలని ప్రభుత్వం భావిస్తోంది.
2008–09లో కడప నుంచి బెంగళూరు వరకు 255 కిలోమీటర్ల కొత్త రైల్వే లైన్కు ఆమోదం లభించింది. ఈ మార్గం కడప, పెండ్లిమర్రి, రాయచోటి, మదనపల్లి, కోలార్ మీదుగా బెంగళూరుకు చేరేలా రూపొందించారు. అయితే భారీ భూసేకరణ, భూముల ధరలు పెరగడం, వ్యయ భారం ఎక్కువ కావడంతో ఈ ప్రాజెక్ట్లో పురోగతి నిలిచిపోయింది. ఇప్పటివరకు కేవలం 21 కిలోమీటర్ల మేర మాత్రమే పనులు పూర్తయ్యాయి.
ఈ నేపథ్యంలో రాష్ట్ర ప్రభుత్వం ముద్దనూరు–ముదిగుబ్బ మధ్య కొత్త లింక్ లైన్ ప్రతిపాదనను తీసుకొచ్చింది. ఈ 75 కిలోమీటర్ల మార్గానికి భూసేకరణ అవసరం తక్కువగా ఉండటంతో పాటు నిర్మాణ వ్యయం కూడా గణనీయంగా తగ్గుతుందని ప్రభుత్వం అంచనా వేస్తోంది. ఈ ప్రతిపాదనను రైల్వే శాఖ ఉన్నతాధికారులకు ఇప్పటికే తెలియజేశారు.
ఇటీవల రైల్వే జోనల్ మేనేజర్లతో జరిగిన సమావేశంలో ముఖ్యమంత్రి చంద్రబాబు నాయుడు ఈ అంశాన్ని ప్రస్తావించారు. ముద్దనూరు–ముదిగుబ్బ లైన్ను త్వరగా పూర్తి చేస్తే కడప నుంచి బెంగళూరుకు ప్రత్యక్షంగా రైళ్లు నడిపే అవకాశం ఏర్పడుతుందని ఆయన తెలిపారు. ఈ లైన్ ముదిగుబ్బ వద్ద పాకాల–ధర్మవరం–గుంతకల్లు రైల్వే మార్గంతో కలుస్తుంది.
ఈ కొత్త లైన్ పూర్తయితే కడప–ఎర్రగుంట్ల–ముద్దనూరు–ముదిగుబ్బ–ధర్మవరం–హిందూపురం మీదుగా బెంగళూరుకు మెరుగైన రైలు కనెక్టివిటీ లభిస్తుంది. పాత ప్రాజెక్టుతో పోలిస్తే ఖర్చు, భూసేకరణ భారం తగ్గడం వల్ల ఈ ప్రాజెక్టు త్వరగా పూర్తి చేసే అవకాశాలు ఉన్నాయని రాష్ట్ర ప్రభుత్వం భావిస్తోంది.
