ఆంధ్రప్రదేశ్లో జరిగే అఖండ గోదావరి పుష్కరాలు–2027 ఈసారి అత్యంత ప్రాధాన్యంతో నిర్వహించేందుకు కేంద్రం మరియు రాష్ట్ర ప్రభుత్వం భారీ స్థాయి ఏర్పాట్లను ప్రారంభించాయి. ఇప్పటికే పుష్కరాల ముహూర్తాన్ని 2027 జూలై 23 నుంచి ఆగస్టు 3 వరకుగా ఖరారు చేశారు. ప్రపంచం నలుమూలల నుంచి లక్షలాది మంది భక్తులు వచ్చే అవకాశం ఉన్న నేపథ్యంలో, ఈ మహాయజ్ఞాన్ని కుంభమేళా తరహాలో నిర్వహించేందుకు యత్నిస్తున్నారు. కేంద్ర ప్రభుత్వం ముందస్తుగానే పుష్కరాల ఏర్పాట్ల కోసం ₹100 కోట్లు కేటాయించగా, రాష్ట్ర ప్రభుత్వం కమిటీలు ఏర్పాటు చేసి, వివిధ శాఖలకు స్పష్టమైన బాధ్యతలను అప్పగించింది. భక్తులకు ఎక్కడైనా గోదావరిలో స్నానం చేసే అవకాశం ఉండేలా అవగాహన కార్యక్రమాలు కూడా చేపట్టనున్నారు.
భక్తుల రాక పెరుగుతుందని భావించి రైల్వే శాఖ ప్రత్యేక చర్యలు చేపట్టింది. రాజమండ్రి రైల్వే స్టేషన్ అభివృద్ధికి ₹271.43 కోట్లు కేటాయిస్తూ భారీ బడ్జెట్ ఆమోదించింది. దేశంలోని ప్రధాన నగరాల నుంచి పుష్కరాల కాలంలో ప్రత్యేక రైళ్లు నడపాలని నిర్ణయించారు. 2015లో గోదావరి పుష్కరాల తొలి రోజున చోటుచేసుకున్న దుర్ఘటనలను దృష్టిలో పెట్టుకుని, ఈసారి భద్రతపై మరింత శ్రద్ధ పెట్టనున్నారు. భక్తుల రద్దీ రోజుకు 75 లక్షలకు పైగా ఉంటుందని అంచనా వేసి, అదనపు ఘాట్లు, వైద్య శిబిరాలు, భద్రతా సిబ్బంది, బఫర్ జోన్లను సిద్ధం చేస్తున్నారు.
పుష్కరాల సమగ్ర యాక్షన్ ప్లాన్ ప్రకారం, మొత్తం 8 కోట్ల మంది భక్తులు రానున్నారన్న అంచనాతో అన్ని ప్రభుత్వ శాఖలు ముందుగానే పనుల్లోకి దిగాయి. గోదావరి జిల్లాల్లో పుష్కర ఘాట్ల అభివృద్ధికి మాత్రమే ₹904 కోట్ల భారీ ప్రతిపాదనలు సిద్ధం చేశారు. రాజమహేంద్రవరం పరిధిలో రోడ్లు, బ్రిడ్జిల అభివృద్ధికి ₹678.76 కోట్లు, కార్పొరేషన్ రోడ్ల కోసం ₹456.5 కోట్లు, సిటీ బ్యూటిఫికేషన్–ఐకానిక్ టూరిజం ప్రాజెక్టులకు ₹75 కోట్లు ప్రతిపాదించారు. భక్తుల కోసం ఉచిత మెడికల్ క్యాంపులు, ఔషధాలు, హెల్ప్డెస్క్లు, ట్రాఫిక్ నియంత్రణ వంటి అంశాలకు ప్రత్యేక ప్రాధాన్యం ఇస్తున్నారు.
ప్రభుత్వం భక్తులకు రెండు రోజులపాటు సౌకర్యవంతమైన వసతి కల్పించేందుకు “స్టే హోమ్” కాన్సెప్ట్ను ప్రవేశపెడుతోంది. స్వయం సహాయక సంఘాల మహిళలకు 30 రోజుల శిక్షణ ఇచ్చి వసతి, భోజనం, గైడ్ సేవలు అందించేలా చూస్తున్నారు. రాష్ట్రం మొత్తం పుష్కరాలను అత్యంత ఘనంగా నిర్వహించాలని ముఖ్యమంత్రి చంద్రబాబు నాయుడు సంకల్పించారు. త్వరలో ఆయన సమక్షంలో ఉన్నతస్థాయి సమీక్ష నిర్వహించి అన్ని ఏర్పాట్లపై సమగ్ర ప్రణాళికను ఖరారు చేయనున్నారు. కుంభమేళా స్థాయి భద్రత, సౌకర్యాలు, రవాణా, వైద్య సేవలు అందించాలనేది ప్రభుత్వ లక్ష్యం.
