కోట్లాది మంది తల్లిదండ్రులకు ఉపశమనం.. ఆ ఏజ్ వారికి బయోమెట్రిక్ వివరాలు ఉచితంగా మార్చుకోవచ్చు!

దేశవ్యాప్తంగా ఉన్న కోట్లాది మంది తల్లిదండ్రులకు ఒక ముఖ్యమైన మరియు పెద్ద శుభవార్త! భారత విశిష్ట గుర్తింపు ప్రాధికార సంస్థ (యూఐడీఏఐ - UIDAI) కీలక నిర్ణయం తీసుకుంది. పిల్లల ఆధార్ బయోమెట్రిక్ అప్‌డేట్‌ (MBU) పై వసూలు చేస్తున్న ఛార్జీలను పూర్తిగా రద్దు చేస్తున్నట్లు ప్రకటించింది. ఈ నిర్ణయం ద్వారా సుమారు 6 కోట్ల మంది చిన్నారులకు నేరుగా ప్రయోజనం చేకూరనుంది.

తల్లిదండ్రులపై ఆర్థిక భారం తగ్గించడంతో పాటు, పిల్లలందరికీ తాజా బయోమెట్రిక్ వివరాలు ఉండేలా చూడాలనే ఉద్దేశంతో ఈ నిర్ణయం తీసుకున్నామని అధికారులు తెలిపారు. ఈ కొత్త నిబంధన అక్టోబర్ 1 నుంచి ఏడాది పాటు అమలులో ఉంటుందని యూఐడీఏఐ స్పష్టం చేసింది. కాబట్టి ఈ అవకాశాన్ని వినియోగించుకోవడం చాలా ముఖ్యం.

సాధారణంగా ఐదేళ్లలోపు పిల్లలకు ఆధార్ నమోదు చేసేటప్పుడు వారి వేలిముద్రలు, కనుపాపల వివరాలు తీసుకోరు. ఎందుకంటే ఆ వయసులో ఈ వివరాలు పూర్తిగా అభివృద్ధి చెందవు, నిలకడగా ఉండవు.

పిల్లలకు ఐదేళ్లు నిండిన తర్వాత తప్పనిసరిగా వారి బయోమెట్రిక్ వివరాలను తొలిసారిగా అప్‌డేట్ చేయించాలి. వారికి 15 ఏళ్లు నిండిన తర్వాత రెండోసారి కూడా తప్పనిసరిగా బయోమెట్రిక్ వివరాలను అప్‌డేట్ చేయాల్సి ఉంటుంది. ఎందుకంటే 15 ఏళ్ల తర్వాత వివరాలు నిలకడగా ఉంటాయి.

గతంలో ఈ బయోమెట్రిక్ అప్‌డేట్‌కు సంబంధించి యూఐడీఏఐ కొంత ఫీజు వసూలు చేసేది. తంలో 5-7 ఏళ్ల మధ్య మరియు 15-17 ఏళ్ల మధ్య చేసే అప్‌డేట్‌ మాత్రమే ఉచితంగా ఉండేది. మిగిలిన సమయాల్లో అప్‌డేట్ చేసుకోవాలంటే ₹125 ఫీజు వసూలు చేసేవారు.

తాజా నిర్ణయంతో ఇకపై 5 నుంచి 17 ఏళ్ల మధ్య వయసున్న పిల్లలందరికీ వారి బయోమెట్రిక్ అప్‌డేట్ సేవ పూర్తిగా ఉచితం కానుంది. దీనివల్ల తల్లిదండ్రులు ఇష్టం ఉన్నప్పుడు, వీలైనప్పుడు పిల్లల అప్‌డేట్ చేయించుకోవచ్చు.

పిల్లల భవిష్యత్తుకు ఆధార్ అనేది చాలా ముఖ్యమైన గుర్తింపు పత్రం. బయోమెట్రిక్ వివరాలు అప్‌డేట్ చేయకపోతే అనేక సేవలు ఆగిపోతాయి. పాఠశాలల్లో ప్రవేశాలు, అలాగే వివిధ ప్రవేశ పరీక్షల రిజిస్ట్రేషన్లకు ఆధార్ తప్పనిసరి.

ఉపకార వేతనాలు (స్కాలర్‌షిప్‌లు), వివిధ ప్రభుత్వ పథకాల లబ్ధి పొందడానికి ఆధార్ లింక్ అవసరం. పాత బయోమెట్రిక్స్ ఉంటే లబ్ధి పొందడంలో ఇబ్బందులు వస్తాయి. కేంద్ర ఎలక్ట్రానిక్స్, ఐటీ శాఖ కార్యదర్శి ఎస్. కృష్ణన్ చెప్పినట్లుగా, భారతదేశ డిజిటల్ మౌలిక సదుపాయాలకు ఆధార్ ఒక పునాది వంటిది. దీని ఆధారంగానే ఎన్నో సేవలు అందుబాటులోకి వచ్చాయి.

తల్లిదండ్రులు ఈ ఉచిత అవకాశాన్ని సద్వినియోగం చేసుకొని, తమ పిల్లల ఆధార్ వివరాలను ఆలస్యం చేయకుండా వెంటనే అప్‌డేట్ చేయించాలని యూఐడీఏఐ అధికారులు సూచిస్తున్నారు. ఆధార్ డేటాబేస్ అత్యంత సురక్షితమైనదని, దీని గురించి ఆందోళన అవసరం లేదని అధికారులు భరోసా ఇచ్చారు. ఈ ఉచిత సేవను ఉపయోగించుకొని మీ పిల్లల భవిష్యత్తుకు భరోసా కల్పించండి.